നാരകം വീട്ടിൽ വളർത്തിയാൽ !

സത്യത്തിൽ നമ്മൾ മലയാളികൾക്കു മാത്രമാണോ , കൗതുകകരമായ ഇത്തരം സംശയങ്ങൾ കൂടുതലായി ഉള്ളതായി പലപ്പോഴും തോന്നിയിട്ടുണ്ട് !

ഇവിടുത്തെ പ്രധാന പ്രശ്നം വീടിൻ്റെ ചുറ്റുവട്ടത്തെ ഒരു നാരകമാണങ്കിൽ, മറ്റൊരാളുടെ വിഷയം പറമ്പിനകത്ത് ശരിയായ സ്ഥാനത്തല്ലാതെ നിലകൊള്ളുന്ന മറ്റൊരു മരത്തെ

സംബന്ധിച്ചായിരിക്കും!

 ഇങ്ങിനെ വീടും, വീടിൻ്റെ നിർമ്മാണവും, അതിൻ്റെ ചുറ്റുവട്ടങ്ങളിലെ പ്രശ്‌നങ്ങളുമൊക്കെയായി ഒരു നൂറ് കണക്കിന് വിഷയങ്ങളാണ് പലപ്പോഴും, പലരും അഭിമുഖീകരിക്കേണ്ടി വരുന്നത്.

കാരണം, വീടുമായി ബന്ധപ്പെട്ട ഒരാളുടെ സംശയവും, പ്രശ്നങ്ങളും കഴിഞ്ഞ ദിവസം ഒരു, നാരകത്തെ സംബന്ധിച്ചായിരുന്നു!

അത്യുൽപ്പാദനശേഷിയുള്ള മേൽത്തരം ഒരു നാരകച്ചെടി, ഒരു സുഹൃത്ത് നൽകിയതോടെ ആയിരുന്നു. പ്രശ്നങ്ങളുടെ തുടക്കം !

നാരകം വീട്ടിൽ വളർത്തിയാൽ

വീട്ടിൽ നാരകം വളർത്തിയാൽ

 ഓരോ ദിവസവും അത്യധികം കൂടി വരുന്ന വല്ലാത്ത ഉഷ്ണകാലത്ത് ,ഒരു നാരകവും, അതിൽ ആരെയും മോഹിപ്പിക്കുന്ന രീതിയിൽ പച്ചയും, മഞ്ഞയും, നിറങ്ങളിൽ ഇടതൂർന്ന് കിടക്കുന്ന നാരങ്ങയും, വീടിന് മുന്നിൽ നിറഞ്ഞു നിൽക്കുന്നത് സ്വപ്നം കണ്ടുകൊണ്ടാണ് അയാൾ അത് വാങ്ങിയത്.

പക്ഷെ കഷ്ടകാലമെന്നല്ലാതെ എന്ത് പറയാൻ?! 

അമ്മായിഅമ്മയും , ഭാര്യയും അത് നട്ടുപിടിപ്പിക്കുവാൻ തീരെ സമ്മതിക്കുന്നില്ല .

കാരണം തിരക്കിയ അദ്ദേഹത്തോട് ...

" നാരകം നിന്നിടം. നാരി മുടിഞ്ഞിടും !" എന്ന് തുടങ്ങി ഒരു നിമിഷം കൊണ്ട് പത്തിലേറെ പഴഞ്ചൊല്ലുകൾ പാടി ഫലിപ്പിച്ച്,

 ശുദ്ധ ദാരിദ്ര്യമാണ് ഇതിൻ്റെയൊക്കെ അനന്തരഫലങ്ങളെന്നും, കൂടെ വേറെ എന്തെല്ലാമോ, കഥകളും, ഉപകഥകളുമെല്ലാം പറഞ്ഞ്, നാരക മാഹാത്മ്യത്തെ ... ഭാര്യയുടെ അമ്മ നിലം പരിശാക്കി...!!

" നമ്മൾ നന്നായി ജീവിച്ചു പോകുന്നതിലുള്ള അസൂയ കൊണ്ടാകാം ഒരു പക്ഷേ നിങ്ങളുടെ സുഹൃത്തെന്ന് പറഞ്ഞ മഹാൻ, നാരകത്തിൻ്റെ തൈകൾ സമ്മാനമായി നൽകിയെന്നു വരെ " ഭാര്യയും പറയാൻ തുടങ്ങിയതോടെ ആ മനുഷ്യൻ ധർമ്മസങ്കടത്തിലായി..!!

 ഇനി തൻറേതായ അറിവില്ലായ്മ കൊണ്ട് കുടുംബത്തിന് ഏതെങ്കിലും തരത്തിലുള്ള ഒരു അത്യാപത്ത് വരേണ്ടന്ന് കരുതി അദ്ദേഹം ,സമാനഹൃദയരായ തൻ്റെ സുഹൃത്തുക്കളുമായും ഈ വിഷയം ചർച്ച ചെയ്യാമെന്ന് ആലോചിച്ചു.

എന്നാൽ , ആദ്യം കണ്ട സുഹൃത്ത് അദ്ദേഹത്തെ നേരെ കൊണ്ടുപോയത് ഒരു പ്രൈവറ്റ് ബാങ്കറുടെ വീട്ടിലേക്കാണ്.!

കൊട്ടാര സദൃശമായ ബാങ്കറുടെ വീട് കണ്ട ആ മനുഷ്യൻ, അക്ഷരാർത്ഥത്തിൽ ഞെട്ടി..!!

 മനോഹരമായി ലാൻ്റ് സ്കേപ്പ് ചെയ്തിരുന്ന ആ വലിയ വീടിൻ്റെ മുൻവശത്ത് പല വലുപ്പത്തിലും , നിറത്തിലും , പച്ചയും , പാകമായതുമായ ചെറുനാരങ്ങ കൂട്ടങ്ങൾ ഇളകിയാടുന്നു...!

നാരകം വീട്ടിൽ വളർത്തിയാൽ !

ഇതെന്ത് കൂത്തെന്ന് അറിയാതെ അയാൾ പരിഭ്രമിച്ചു നിൽക്കുമ്പോൾ വീട്ടുടമസ്ഥനായ ബാങ്കർ ഇറങ്ങി വന്നു

." വേണമെങ്കിൽ അത്യാവശ്യം വേണ്ടത് പറിച്ചെടുത്തോളൂ ... ഇവിടെ നിത്യേന വളരെയേറെ  ആവശ്യക്കാരാ .! പലർക്കും ആവശ്യമുണ്ടായിട്ടല്ല.... ഒരു കൗതുകം !" - ബാങ്കർപറഞ്ഞു.

സത്യത്തിൽ ഞാൻ ഇതു വളർത്തിയെടുത്തതും.. അത്തരം ഒരു കൗതുകത്തിൻറെ പുറത്തു തന്നെ...." !

- അത്രയും പറഞ്ഞ് അയാൾ അകത്തേക്ക് കയറിപ്പോയി -

 " അതു ശരി. ! സമ്പത്തുള്ളവൻ ചെയ്യുമ്പോൾ അത് ലാൻറ് സ്കേപ്പിംഗും , കൗതുകവും.!

 സാധാരണക്കാരൻ ചെയ്യുമ്പോൾ അത് നിഷിദ്ധവും , അശ്രീകരവും.!" 

ഏതായാലും വിവരക്കേടു മൂലം ഒരു നിമിഷമെങ്കിലും, അമ്മായിഅമ്മയുടെയും, ഭാര്യയുടെയും വാക്കുകൾക്ക് ചെവിയോർത്ത ആ നിമിഷങ്ങളെ സ്വയം ശപിച്ചു കൊണ്ട് ,

 ഇനി എന്തായാലും 

നാരകത്തൈകൾ വെച്ചു പിടിപ്പിച്ചിട്ടേ ബാക്കി കാര്യമൊള്ളൂ എന്നുറപ്പിച്ചാണ് അയാൾ അവിടെ നിന്നും പടിയിറങ്ങിയത് !  

കേട്ടാൽ കഥയാണന്നു തോന്നുമെങ്കിലും, സംഗതി നമ്മുടെ

ചുറ്റുവട്ടങ്ങളിൽ സംഭവിച്ച കാര്യങ്ങൾ തന്നെയാണ് .

വീട്ടിൽ വളർത്താവുന്നതും, വളർത്താൻ പാടില്ലാത്തതുമായ മരങ്ങളെക്കുറിച്ച് പല ഗ്രന്ഥങ്ങളിലും പറയുന്നുണ്ട്, എന്നാൽ അതിനെല്ലാം പ്രകൃതിയുമായും, പ്രകൃതി നിയമങ്ങളുമായും ബന്ധപ്പെട്ട അനേകം വിശദീകരണങ്ങളും, ശാസ്ത്രീയതകളുമുണ്ട്. അതെല്ലാം പല ഘട്ടങ്ങളിലായി, പലപ്പോഴും നമ്മൾ ഇതേ ബ്ലോഗിൽ തന്നെ പറഞ്ഞിട്ടുമുണ്ട്.  

എന്നാൽ ഒരു നാരകച്ചെടി വെച്ചുപിടിപ്പിച്ചു എന്നതിൻ്റെ പേരിൽ എവിടെയെങ്കിലും, ഒരു മനുഷ്യ കുലമോ , വീടോ, കുടുംബമോ ഒന്നും എവിടെയും തകർന്നു പോയതായി കേട്ടിട്ടുമില്ല. പിന്നെയെന്താണ് ഇതിനെ കുറിച്ച് ഇങ്ങിനെയൊരു പ്രചരണം?

  

 എന്നാൽ ഇതൊന്നും ഒരു നാരകത്തെക്കുറിച്ചു മാത്രമെന്നല്ല. വീടും, അതിൻ്റെ അനുബന്ധമായി ഉള്ള പല കാര്യങ്ങളേയും ബന്ധപ്പെടുത്തുന്ന അനേകം സങ്കൽപ്പങ്ങൾ എന്നതിൽക്കവിഞ്ഞ് ഇത് മറ്റേതെങ്കിലും ശാസ്ത്രീയത ഉള്ളതായി തെളിയിക്കപ്പെട്ടിട്ടുമില്ല .

   

എന്നാൽ ഇതിൽ രസകരമായ വസ്തുത, നാരകം വീട്ടിടങ്ങളിൽ കൃഷി ചെയ്യുന്നത് നല്ലതല്ലെന്ന് പറയുമ്പോൾ തന്നെ, വീട് സംബന്ധമായ ചില ആചാര വിധികളിൽ നാരങ്ങ പലയിടങ്ങളിലും കെട്ടിത്തൂക്കുന്നതുൾപ്പടെ... ... മുറിച്ച് വീടിന് പ്രദക്ഷിണം ചെയ്ത് നെഗറ്റീവ് എനർജിയെ പുറന്തള്ളാമെന്നുമൊക്കെ പറയുന്നുമുണ്ട്. 

അപ്പോഴും നാരങ്ങയെ സംബന്ധിച്ച് മുകളിൽ പ്രസ്ഥാവിച്ച രണ്ടു കാര്യങ്ങളും വൈരുദ്ധ്യമാണന്നിരിക്കേ .. മുറിച്ചു വെച്ച നാരങ്ങയെന്ന ഭക്ഷ്യവസ്തു എങ്ങിനെയാണ് വീടിന് പരിസരങ്ങളിലെ നെഗറ്റീവ് എനർജിയെ വലിച്ചെടുക്കുന്നതെന്നിനൊന്നും വിശദീകരണമില്ല.

ചിലർ പറയുന്നത് അതിന് മുള്ളുകൾ ഉണ്ട് എന്നതാണത്രേ കാരണം. .

അങ്ങിനെയെങ്കിൽ അതിലും എത്രയേറെ മുള്ളുകൾ കൊണ്ട് നിറഞ്ഞിരിക്കുന്ന റോസാച്ചെടികൾ നട്ടുപിടിപ്പിച്ചല്ലേ നമ്മുടെ വീടുകളുടെ ഗാർഡനുകൾ മനോഹരമാക്കുന്നത്.!

എന്നിട്ടും വളരെയേറെ പോഷക ഗുണങ്ങൾ

ളുള്ളതും, ഒരു വീട്ടിൽ ചില നാടൻ പ്രയോഗങ്ങൾക്കായി എപ്പോഴും അത്യാവശ്യമായി വരുന്നതും , ചില സീസണുകളിൽ അഞ്ചു രൂപ വരെ വില വരുന്ന മൂല്യമുള്ള ഒരു മനോഹരവൃക്ഷത്തിനെ പടിക്ക് പുറത്ത് നിർത്തുന്നതിൻ്റെ സാംഗത്യം ഒരിക്കലും വെളിവാക്കപ്പെടുന്നുമില്ല.

പല കാര്യങ്ങളും അങ്ങിനെയാണ്. ശാസ്ത്രീയമായ എന്തെങ്കിലും അടിത്തറയോ, യുക്തിയോ ഒന്നും ഉണ്ടാകണമെന്നൊന്നുമില്ല. എങ്കിലും നമ്മൾ വെറുതെയെങ്കിലും ഇത്തരം കേട്ടുകേൾവികൾ, അന്ധമായി വിശ്വസിക്കുവാനും , പ്രചരിപ്പിക്കുവാനും ഈ ആധുനിക യുഗത്തിലും തയ്യാറാണന്നുള്ളതാണ് ഏറെ രസകരം.

മാത്രമല്ല ഇതുപോലെ യാതൊരു അടിസ്ഥാനവുമില്ലാത്ത അനേകം കാര്യങ്ങൾക്കായി മനുഷ്യർ യാതൊരാവശ്യങ്ങളുമില്ലാതെ, തങ്ങളുടെ ഒരു പാട് പണവും, സമയവുമെല്ലാം വെറുതെ നഷ്ടപ്പെടുത്തുന്നതും കണ്ടിട്ടുണ്ട്.!

പ്രത്യേകിച്ച് വീട് നിർമ്മാണവുമായി ബന്ധപ്പെട്ട് .! 

 അതിനാൽ തന്നെ,എവിടെയായാലും, എപ്പോഴും , ഏതൊരു മനുഷ്യൻ്റെയും, ഉയർന്നതാഴ്ചകളുടെ ആഴവും, മഹത്വവും, കണക്കാക്കുവാൻ അവരുടെ വാസസ്ഥലങ്ങളുടെ പ്രത്യേകതകൾ പല വലിയ ഗണിതശാസ്ത്രങ്ങളാക്കി മാറ്റി അതിനെ യുക്തിരാഹിത്യത്തി

ൻ്റെ നിർവചനങ്ങളിലൂടെ വലിച്ചിഴക്കുന്നതും പലപ്പോഴും കാണാം.

വീടിൻ്റെ തറയുടെ അടിവാരത്തിൻ്റെ ആഴം മുതൽ, വീടു പണിക്കു ശേഷം വീട് അടിച്ചു വൃത്തിയാക്കാൻ ഉപയോഗിക്കുന്ന ബ്രഷിനെക്കുറിച്ചു വരെ ഇത്തരം അനാവശ്യമായ ഒരു പാട് അന്ധമായ ധാരണകളും , അഭിപ്രായങ്ങളും പലരും പ്രകടിപ്പിക്കുന്നതും കണ്ടിട്ടുണ്ട്. എന്നാൽ ഇതിൻ്റെയൊക്കെ അടിസ്ഥാനമെന്താണന്ന് ചോദിച്ചാൽ യാതൊരു നീതീകരണവുമില്ലാത്ത കുറേ കേട്ടുകേൾവികളെ അടിസ്ഥാനപ്പെടുത്തിയുള്ള ഉത്തരങ്ങളാകും ലഭിക്കുക.

യഥാർത്ഥത്തിൽ നമ്മൾ ചുഴിഞ്ഞ് ചിന്തിച്ചാൽ ഇത്തരം പ്രചരണം നൽകുന്നവർക്ക് കൃത്യമായ ചില ഉദ്ദേശങ്ങളും ലക്ഷ്യങ്ങളുമെല്ലാം ഉള്ളിൻ്റെയുള്ളിൽ പലപ്പോഴുമുണ്ടാകും.!

 പ്രത്യേകിച്ച് ഇന്ന് മനുഷ്യർ ഏറ്റവും കൂടുതൽ പണം ചിലവഴിക്കുന്ന വീട് നിർമ്മാണ രംഗത്ത്.

വീടും, അന്ധവിശ്വാസങ്ങളും

 ഒരു ഉദാഹരണത്തിന്,പണ്ട് ഒരു സ്ഥലത്ത് പ്രസിദ്ധനായ വീടിന് സ്ഥാനം നോക്കുന്ന ഒരു വിദഗ്ദനുണ്ടായിരുന്നു. വന്നു കഴിഞ്ഞാൽ അദ്ദേഹം ആദ്യം , പറമ്പിൽ വിലപിടിപ്പുള്ള ഏതെങ്കിലും  

 മരങ്ങൾ നിൽക്കുന്നുണ്ടോയെന്ന് നോക്കും..

 ഉണ്ടങ്കിൽ അത് ഏത് മരമായാലും നിൽക്കുന്ന സ്ഥാനം ശരിയല്ലന്നും, അതുകൊണ്ട് എത്രയും പെട്ടെന്ന് അത് വെട്ടിമാറ്റിയില്ലങ്കിൽ വീടു നിർമ്മാണത്തിന് ഭംഗം നേരിടുമെന്നുമെല്ലാം വീട്ടുകാരെ പറഞ്ഞ് വിശ്വസിപ്പിക്കും.! 

കേൾക്കേണ്ട താമസം വീട്ടുടമ 

പണമൊന്നും കിട്ടിയില്ലങ്കിലും കുഴപ്പമില്ല, അപകടങ്ങളൊന്നും സംഭവിക്കാതിരിക്കുവാൻ, എത്ര ലക്ഷം വിലമതിക്കുന്ന മരമായാലും , ഒരു പൈസ 

പോലും വാങ്ങാതെ കച്ചവടമുറപ്പിച്ച് മരം വെട്ടി നൽകുകയും ചെയ്യും .

എന്നാൽ, മരം വാങ്ങുവാൻ വരുന്നതോ ? സ്ഥാനക്കാരൻ്റെ സ്വന്തം, ആളുകളും... !!   

വർഷങ്ങളായി ഫർണീച്ചർ ബിസിനസ്സ് നടത്തുന്ന സ്ഥാനക്കാരൻ . അവസാനം മരം മുറിച്ചു മാറ്റിയ വീട്ടുകാരനു തന്നെ. അയാളുടെ മുറിച്ചു മാറ്റിയ മരം കൊണ്ടുണ്ടാക്കിയ ഫർണീച്ചർ സാമഗ്രികൾ കൂടിയ വിലയ്ക്ക് വിറ്റ് ലാഭമുണ്ടാക്കി സ്ഥലം കാലിയാക്കുകയും ചെയ്യും.

ഇങ്ങിനെ വീട് സംബന്ധമായ പലകാര്യങ്ങളിലും , നിർമ്മാണത്തിലും , പലരുടേയും അഭിപ്രായങ്ങൾക്ക് വഴങ്ങി  വീട് നിർമ്മിച്ച്, അവസാനം തനിക്ക് താമസിക്കാൻ യോഗ്യമായ വീടല്ല താൻ നിർമ്മിച്ചതെന്ന് അവസാനഘട്ടത്തിൽ സ്വയം ബോദ്ധ്യപ്പെട്ട്, പിന്നീട് നിരാശരായി വീട് വിറ്റുപോവുകയും ചെയ്ത, നിരവധി സംഭവങ്ങളും മനുഷ്യരേയുമെല്ലാം പിൽക്കാലത്ത് പലപ്പോഴും കാണുവാനും ,  കേൾക്കുവാനും കഴിഞ്ഞിട്ടുമുണ്ട്.! 

തട്ടിപ്പ് വാസ്തുവിൻ്റെ പേരിലും

എന്തായാലും ഇതോടൊപ്പം തന്നെ ചേർത്തു വെയ്ക്കുവാൻ കഴിയുന്ന മറ്റൊരു കാര്യം കൂടി പറഞ്ഞ് നമുക്ക് ഈ ബ്ലോഗ് അവസാനിപ്പിക്കാം.

ഒരാൾ, അനേകം വർഷത്തെ തൻ്റെ അദ്ധ്വാനത്തിൽ നിന്ന് മിച്ചം പിടിച്ചതും, കടം വാങ്ങിയതുമെല്ലാമായ , കുറച്ചു പണം കൊണ്ടാണ് അൽപ്പം ഉൾപ്രദേശത്തായി വിലകുറഞ്ഞ ഒരു വീടും സ്ഥലവും വാങ്ങിയത് !

എന്നാൽ കടമാണങ്കിലും, സ്വന്തമായി കുറച്ചു സ്ഥലവും, അതിലൊരു കെട്ടിടവുമുണ്ടന്ന് നാലാളുകളുടെ മുന്നിൽ അഭിമാനിക്കാമല്ലോ എന്നോർത്ത് സന്തോഷിച്ചിരിക്കുമ്പോഴാണ് അടുത്തുള്ള അയൽവാസി, പുതിയ സ്ഥലവാസിയോട് സ്നേഹം മൂത്ത് ആർക്കുമറിയാത്ത പുതിയ കുറച്ച് രഹസ്യങ്ങളുമായി അയാൾക്കരികിലേക്ക് കടന്നു വന്നത്!  

 വന്നയുടൻ അയാൾ പറഞ്ഞു.

 " നിങ്ങൾ സ്ഥലത്തെക്കുറിച്ച് ശരിയാംവണ്ണം നോക്കിയിട്ടുതന്നെയായിരുന്നോ, ഈ വീടും സ്ഥലവും  വാങ്ങിയത്...?

ചോദ്യം കേട്ട് വീട്ടുടമസ്ഥൻ ഒന്നുഞെട്ടി...!

അതു കൂസക്കാതെ, അയൽവാസി തുടർന്നു..

എന്തായാലും, പടിഞ്ഞാറു ഭാഗത്തേക്ക് ദർശനമുള്ള നിങ്ങളുടെ ഈ വീട്ടിലേയ്ക്കുള്ള വഴി കന്നിമൂലയിലാണ്...!

 ശ്രദ്ധിച്ചിരുന്നോ.?

അതുവരെ വീടിൻ്റെ, കന്നിയും, മൂലയും, ഒന്നും കേൾക്കാതിരുന്ന ആ മനുഷ്യൻ ഒന്നു പതറി..!

 അയൽവാസി തുടർന്നു, .... ഒരിക്കലും ഒരു വീടിൻ്റെ വഴി, അവിടെ ആ കന്നിമൂലയിൽ, വരാൻ പാടില്ല. 

വന്നാൽ ദോഷമാണ്.   ആ ഒറ്റക്കാരണം കൊണ്ടു മാത്രമാണ് ഇതിൻ്റെ ഉടമസ്ഥൻ അത്, വിലകുറച്ച് വിൽക്കുവാൻ, തീരുമാനിച്ചതും , നിങ്ങൾക്ക് ഇത് വില കുറച്ചു കിട്ടിയതും..!

- അയൽവാസിയുടെ വർത്തമാനം കേട്ട് ഞെട്ടിത്തരിച്ചു നിന്ന വീട്ടുടമസ്ഥൻ്റെ മാനസികാവസ്ഥ നല്ലവണ്ണം വായിച്ചെടുത്ത അയൽവാസി തുടർന്നു.

"...ങാ.. എന്തായാലും, ഇനിയിപ്പോൾ പറഞ്ഞിട്ടെന്തുകാര്യം... എല്ലാം കഴിഞ്ഞുപോയില്ലേ...?! "

- ഇത്രയും പറഞ്ഞ് അയൽവാസി സ്ഥലം കാലിയാക്കി -

 - നോക്കണം. അതുവരെ കന്നിമൂലയെക്കുറിച്ചോ,വാസ്തുശാസ്ത്രത്തെക്കുറിച്ചോ, ഒന്നും ചിന്തിക്കാതെയും, അതെന്താണെന്നു പോലും അറിയാതിരുന്ന ഒരു ദുർബ്ബലഹൃദയനായ മനുഷ്യൻ്റെ മനസ്സിലേക്കാണ്, അയാൾ, സ്നേഹത്തിൻ്റെ ഭാഷയിലുള്ള ഒരിറ്റ് വിഷം വീഴ്ത്തിക്കൊണ്ട് കടന്നു പോയത്. 

അവിടെ ആ ഒരു സംഭാഷണത്തിലൂടെ വീട്ടുടമസ്ഥൻ്റെ മനസ്സിൽ ഏൽപ്പിച്ച മുറിവ് പെട്ടെന്ന് ദേദമാകുന്ന തരത്തിലുള്ള ഒന്നായിരുന്നില്ല.

എന്തുതന്നെയായാലും പിന്നീട് എന്തായിരിക്കാം സംഭവിച്ചതെന്നതിനെക്കുറിച്ചുള്ള വിവരങ്ങൾ ഇവിടെ പങ്കുവെയ്ക്കുന്നില്ല. ഇതിന് സമാനമാണ് മറ്റൊരു സ്ത്രീയുടെ അനുഭവം.

വാസ്തുവിൻ്റെ പേരിലുള്ള ചൂഷണം

 അവരുടെ പ്രശ്നം, കാലിൽ സ്ഥിരമായി വന്നിരുന്ന , മരവിപ്പും, വേദനയുമാണ്. അതിനായി പല മരുന്നുകളും ചികിത്സകളുമൊക്കെ പലവട്ടം നടത്തിയിട്ടും ഫലം കാണാതെ വന്നപ്പോഴാണ്   അവർ    മറ്റൊരാളുടെ ഉപദേശത്തിൽ ഒരു ജ്യോതിഷിയെ കാണാൻ തീരുമാനിച്ചത്.

അതിനുള്ള മുഖ്യകാരണം, വീടിനകത്തേയ്ക്ക് കാലെടുത്ത് വെയ്ക്കുമ്പോൾ മാത്രമാണത്രേ... അവർക്ക് വേദന അനുഭവപ്പെടാൻ തുടങ്ങുന്നത്.!

- തീർച്ചയായും അതിൽ അത്ഭുതപ്പെടാനൊന്നുമില്ല. കുറച്ച് ശത്രു ദോഷവും, പിന്നെ അൽപ്പം വാസ്തു സംബന്ധമായ വിഷയങ്ങളും .

- അവർ കാണുവാൻ ചെന്ന, ജ്യോതിഷി ഉറപ്പിച്ചുപറഞ്ഞു

പിന്നീട് അധികമൊന്നും ആലോചിക്കേണ്ടി വന്നില്ല,... പലയിടങ്ങളിൽ നിന്നും വാങ്ങിക്കൂട്ടിയതും, മിച്ചമുണ്ടായിരുന്നതും, മറ്റു ചില സമ്പാദ്യങ്ങളുമെല്ലാം ചേർത്ത്, പരിഹാര ക്രിയകളും, പൂജകളുമൊക്കെ ആർഭാടമായിത്തന്നെ നടത്തി.

എന്തായാലും ഒരു ജീവിതകാലം മുഴുവൻ അനുഭവിക്കേണ്ടിവരുന്ന വേദനയിലും വലുതല്ലല്ലോ അൽപ്പം കടവും, പണവും.!

എന്നാൽ ജ്യോതിഷി പറഞ്ഞ സമയവും, രാഹുവും, കേതുവുമെല്ലാം പലവട്ടം മാറി മറിഞ്ഞുപോയെങ്കിലും, വേദന എന്നതുമാത്രം മാറിയില്ല.!

അങ്ങിനെ , ഒരു നാൾ വേദന അതികഠിനമായപ്പോൾ ആരെല്ലാമോ പറഞ്ഞുകേട്ട പ്രശസ്‌തനായ ഒരു വൈദ്യനെത്തന്നെ അവർ ചെന്നു കണ്ടു.

രോഗവിവരങ്ങളും, സാഹചര്യങ്ങളുമൊക്കെ കൃത്യമായി ചോദിച്ചു മനസ്സിലാക്കിയ വൈദ്യൻ കൽപ്പിച്ചു. ഒന്നുകിൽ വീടിനകത്തു വിരിച്ചിരിക്കുന്ന ടൈലിനുമുകളിൽ ഒരു കാർപ്പെറ്റു വിരിക്കുക, അതല്ലങ്കിൽ വീട്ടിൽ ചെരിപ്പുപയോഗിച്ച് നടക്കുക. എന്നിട്ടും കുറവില്ലെങ്കിൽ നമുക്ക് വിശദമായി പരിശോധിക്കാം.

എന്തായാലും രോഗത്തിൻറെ ആദ്യ വില്ലനും, കാരണഭൂതനും, വീടിനകത്ത് വിരിച്ചിരുന്ന ടൈലുതന്നെയായിരുന്നു..!

ഇങ്ങിനെ വീടും, അതിൻറെ നിർമ്മാണങ്ങളുമായും ബന്ധപ്പെട്ടിരിക്കുന്ന

എത്രയെത്ര വിശ്വാസങ്ങളുടേയും അന്ധവിശ്വാസങ്ങളുടേയും കഥകളാണ് ഓരോദിവസവും നമുക്ക് ചുറ്റും നിരന്തരം പ്രചരിക്കുന്നത്. !

പറഞ്ഞു വന്നത് നാരകത്തെക്കുറിച്ചാണങ്കിലും, അതെല്ലാം നമ്മുടെ സാധാരണ ജീവിതത്തിലും, കുടുംബ ജീവിതത്തിലുമെല്ലാം ഉണ്ടാക്കുന്ന അനേകം അസ്വസ്ഥകളും , അപകടങ്ങളുമെല്ലാം വളരെ നിസ്സാരങ്ങളായി കാണുവാനോ, തള്ളിക്കളയുവാനോ കഴിയുന്നതുമല്ല!