ഷുഗർ ഫ്രീ ബനാന ഐസ് ക്രീം

വേനൽച്ചൂടിനെ വെല്ലാൻ പഞ്ചസാരയില്ലാത്ത ഒരു ' സൂപ്പർ ഐസ് ക്രീം ' കുട്ടികൾക്കായി വീട്ടിൽ തയ്യാറാക്കാം .

കടുത്ത വേനൽക്കാലത്ത് ചൂട് കൂടുമ്പോൾ തണുത്ത വിഭവങ്ങൾക്കു വേണ്ടി കുട്ടികൾ വാശിപിടിക്കുന്നത് സ്വാഭാവികമാണ്.

എന്നാൽ കടകളിൽ നിന്നു വാങ്ങുന്ന പല ഭക്ഷണസാധനങ്ങളിലും അമിതമായി അടങ്ങിയിരിക്കുന്ന പഞ്ചസാരയും , നിറങ്ങളും, പ്രിസർവേറ്റികളുമെല്ലാം ചേർന്ന ഭക്ഷണങ്ങൾ കുട്ടികൾക്ക് വാങ്ങിക്കൊടുക്കുന്നതും ആശാസ്യമല്ല.

അതുകൊണ്ട്, കഴിയുന്നതും കുട്ടികൾക്കായാലും മുതിർന്നവർക്കായാലും വീട്ടിൽത്തന്നെ പാചകം ചെയ്തെടുക്കുന്ന ഭക്ഷണസാധനങ്ങൾ മാത്രമേ കഴിക്കുകയൊള്ളൂ എന്നൊരു ശീലം വളർത്തിയെടുക്കുന്നത് എപ്പോഴും മികച്ച കുടുംബാരോഗ്യത്തിനും, ധനലാഭത്തിനുമെല്ലാം നല്ലതാണ്.

അതിനാൽ, ഇവിടെ നമ്മൾ തയ്യാറാക്കുന്നത് കുട്ടികൾക്കും മുതിർന്നവർക്കും വളരെയേറെ ഇഷ്ടപ്പെടുകയും , കോൺഫ്ലവറും, പഞ്ചസാരയും , അരിപ്പൊടിയുമെല്ലാം പൂർണ്ണമായും ഒഴിവാക്കി പകരം പഴങ്ങൾ ഉപയോഗിച്ചുള്ള ഒരു പ്രകൃതിദത്ത ( Healthy Homemade Icecream ) ഐസ് ക്രീമാണ്.

പ്രകൃതിദത്ത ഷുഗർഫ്രീ ബനാന ഐസ് ക്രീം റസിപ്പി

ഈന്തപ്പഴം - നേന്ത്രപ്പഴം ഹെൽത്തി ഐസ് ക്രീം .

ഈ ഐസ്ക്രീമിൻ്റെ പ്രധാന പ്രത്യേകത ഇതിൽ പാൽ കുറുക്കേണ്ട ആവശ്യമില്ലന്നുള്ളതാണ്. പഴത്തിൻ്റെ സ്വാഭാവികമായ ഒരു ക്രീമി ഘടന ഇതിന് മികച്ച ഒരു ടെക്സ്ചർ നൽകുന്നുണ്ട്.

ആവശ്യമായ ചേരുവകൾ.

1. നേന്ത്രപ്പഴം നന്നായി പഴുത്തത് - 2 എണ്ണം. കഷണങ്ങളാക്കി മുറിച്ച ശേഷം 4 മണിക്കൂർ ഫ്രീസറിൽ വെച്ച് തണുപ്പിച്ചത്.

2. ഈന്തപ്പഴം 6-8 എണ്ണം

3. ബദാം അതല്ലെങ്കിൽ കശുവണ്ടി പൊടിച്ചത് ഒരു പിടി .

4. പാൽ അരച്ചെടുക്കാൻ പാകത്തിന് അരക്കപ്പ് തണുപ്പിച്ചത്.

5. ഏലക്കാപ്പൊടി ( ഒരു നുള്ള് രുചിക്ക് )

തയ്യാറാക്കുന്ന വിധം

ആദ്യം കഷണങ്ങളായി നുറുക്കി ഫ്രീസറിൽ വെച്ച് തണുപ്പിച്ചെടുത്ത പഴം , കുരുനീക്കിയ ഈന്തപ്പഴം കഷണങ്ങളാക്കിയത്, തണുപ്പിച്ച പാൽ, എന്നിവ മിക്സിയുടെ ജാറിലേക്കിട്ട് അടിച്ചെടുക്കുക . 

ഒരു സോഫ്റ്റ് സെർവ് ഐസ്ക്രീം പരുവത്തിലാകുന്നതുവരെ ഇടയ്ക്ക് മിക്സി തുറന്ന് ഒരു സ്പൂൺ ഉപയോഗിച്ച് ഇടക്കൊന്ന് ഇളക്കിക്കൊടുത്ത ശേഷം വീണ്ടും മിക്സിയിൽ നന്നായി അടിച്ചെടുക്കുക.

ഇനി ഈ കുഴമ്പു പരുവത്തിലായ മിശ്രിതം മിക്സിയുടെ ജാറിൽ നിന്നും മറ്റൊരു പാത്രത്തിലേയ്ക്ക് മാറ്റിയ ശേഷം പൊടിച്ചു വെച്ചിരിക്കുന്ന നട്സും, ഏലയ്ക്കാപ്പൊടിയും ചേർത്ത് നന്നായി ഇളക്കി യോജിപ്പിക്കുക.

 പിന്നീട് നല്ല എയർ ടൈറ്റായ പാത്രത്തിലേയ്ക്ക് ഈ മിശ്രിതം മാറ്റിയ ശേഷം രണ്ട് മണിക്കൂർ കൂടി ഫ്രീസറിനകത്ത് വെച്ച് ഐസ്ക്രീം സെറ്റായ ശേഷം ആവശ്യത്തിന് എടുത്ത് ഉപയോഗിക്കാം.

രോഗപ്രതിരോധത്തിനും, അനേകം ആരോഗ്യഗുണങ്ങളുമുള്ള ഇഞ്ചിച്ചായ തയ്യാറാക്കിയിട്ടുണ്ടോ? വായിക്കാൻ ക്ലിക്കുചെയ്യുക.

ഷുഗർ ഫ്രീ ബനാന ഐസ് ക്രീം

എന്തുകൊണ്ട് ഈ ഐസ്ക്രീം മികച്ചതാകുന്നു?

ഒന്നാമതായി ഇതിൽ ഏതെങ്കിലും വിധത്തിലുള്ള പൗഡറുകളോ, പൊടിയോ, നിറങ്ങളോ ഒന്നും ഉപയോഗിക്കാതെ നമ്മുടെ ചുറ്റുവട്ടത്തും വീട്ടിലുള്ളതുമായ പോഷകസമ്പുഷ്ടമായ ഭക്ഷ്യ പദാർഥങ്ങൾ ചേർത്ത് ഉണ്ടാക്കുന്നവയായതുകൊണ്ട് ഇത് തീർത്തും ആരോഗ്യപ്രദമാണ്.

നേന്ത്രപ്പഴത്തിലുള്ള വിറ്റാമിനുകളും , പൊട്ടാസ്യവുമാണ് ഇതുവഴി കുട്ടികളിലേക്കെത്തുന്നത്.

പ്രകൃതിദത്ത മധുരം

സാധാരണയായി ഐസ്ക്രീമിൽ ഉപയോഗിക്കുന്ന പഞ്ചസാര കുട്ടികളിൽ അമിത വണ്ണത്തിനും , പല്ല് കേടു വരാനുമെല്ലാം കാരണമാകും. എന്നാൽ ഇവിടെ നമ്മൾ ഉപയോഗിച്ച ഈന്തപ്പഴത്തിലെ മധുരം കുട്ടികൾക്ക് കൂടുതൽ ഊർജ്ജം നൽകുവാനും ശരീരത്തിലെ അയേണിൻ്റെ അളവ് വർദ്ധിപ്പിക്കുകയും ചെയ്യും.

ഷുഗർ ഫ്രീ ബനാന ഐസ് ക്രീം റസിപ്പി

ദഹനത്തിന് ഉത്തമം

കൂടുതൽ നാരുകൾ ( Fiber) അടങ്ങിയ ഭക്ഷണമായതിനാൽ ദഹന പ്രക്രിയ സുഗമമാക്കുവാനും, മലബന്ധം പോലുള്ളവ ഒഴിവാക്കുന്നതിനും സഹായകരമാണ്.

വേനൽക്കാല സംരക്ഷണം.

കൂടുതൽ കൃത്രിമ പദാർഥങ്ങളോ, നിറങ്ങളോ പോലുള്ളവയോ ചേർക്കാതെ തീർത്തും പ്രകൃതിദത്തമായ രീതിയിൽ തന്നെ തയ്യാറാക്കുന്നതുകൊണ്ട് അതിലുള്ള പോഷകങ്ങൾ ഒന്നും നശിക്കാതെ തന്നെ ശരീരത്തിലേക്കെത്തുന്നു. കൂടാതെ ഇതിലുള്ള ഈന്തപ്പഴവും, നേന്ത്രപ്പഴവും, രോഗപ്രതിരോധത്തിനും ചർമ്മ സംരക്ഷണത്തിനും മികച്ചവയാണ്.

ആവശ്യമെങ്കിൽ ഒരു ഫ്ളേവറിനായി നമ്മൾ കഴിഞ്ഞ ലേഖനത്തിൽ പ്രതിപാദിച്ച മാംഗോ ഷെയ്ക്കിൻ്റെ ഒരംശവും കൂടി ഇതിൽ ചേർത്താൽ തീർത്തും വ്യത്യസ്ഥ രുചിയിലും , മണത്തിലുമുള്ള ഒരു മാംഗോ - ബനാന ഐസ്ക്രീമായും ഇതിനെ മാറ്റിയെടുക്കാം.

ചർമ്മസംരക്ഷണത്തിനും, ശാരീരികാരോഗ്യത്തിനും രുചിയേറും പ്രകൃതിദത്ത മാംഗോ ഷെയ്ക്ക്. വായിക്കാൻ ക്ളിക്കുചെയ്യുക.