മുന്തിരിങ്ങ, ഗുണഫലങ്ങളും, ദോഷവും.

മുന്തിരിങ്ങയുടെ ആരോഗ്യഗുണങ്ങൾ

രുചിയിൽ മാത്രമല്ല, ആരോഗ്യഗുണങ്ങളുടെ കാര്യത്തിലും ഏറെ മുൻപന്തിയിലാണ് നമ്മുടെ പ്രിയപ്പെട്ട മുന്തിരി.

ലോകത്തിൽത്തന്നെ വിവിധ രീതികളിൽ വികസിപ്പിച്ചെടുത്ത പതിനായിരത്തിൽ പരം മുന്തിരി ഇനങ്ങൾ ഉണ്ടന്നാണ് ചില പഠനങ്ങൾ പറയുന്നത്. 

എങ്കിൽപ്പോലും വൈൻ ആവശ്യങ്ങൾക്കും , ഭക്ഷണകാര്യങ്ങൾക്കുമെല്ലാമായി ചുവപ്പും, പച്ചയും, വെളുത്ത മുന്തിരിയുമെല്ലാമാണ് കൂടുതൽ ജനപ്രിയമായിട്ടുള്ളത്.

അതിനാൽ പ്രകൃതി കനിഞ്ഞനുഗ്രഹിച്ച ഈ ജനപ്രിയ പഴത്തിൻ്റെ ആരോഗ്യഗുണങ്ങൾ എന്തല്ലാമാണെന്ന് പരിശോധിക്കാം.

ഹൃദയാരോഗ്യം സംരക്ഷിക്കുന്നു

മുന്തിരിയിൽ അടങ്ങിയിരിക്കുന്ന റെസ്‌വെരാട്രോൾ (Resveratrol), പോളിഫെനോളുകൾ എന്നിവ രക്തസമ്മർദ്ദം നിയന്ത്രിക്കുവാൻ സഹായിക്കുന്നു. ഇത് ശരീരത്തിലെ മോശം കൊളസ്ട്രോളിന്റെ (LDL) അളവ് കുറയ്ക്കുകയും രക്തയോട്ടം സുഗമമാക്കുകയും ചെയ്തുകൊണ്ട് ഹൃദയാഘാത സാധ്യതഇല്ലാതാക്കുന്നു.

രോഗ- പ്രതിരോധശേഷി വർദ്ധിപ്പിക്കുന്നു

വിറ്റാമിൻ സി, വിറ്റാമിൻ കെ എന്നിവയാൽ സമ്പന്നമായ മുന്തിരി. ശരീരത്തിൻറെ, രോഗപ്രതിരോധ ശേഷി ശക്തിപ്പെടുത്തുകയും വിട്ടുമാറാത്ത അണുബാധകളിൽ നിന്നും പനി, ജലദോഷം തുടങ്ങിയവയിൽ നിന്നും സംരക്ഷിക്കുകയും ചെയ്യുന്നു.

വാർദ്ധക്യത്തെ ചെറുക്കുന്നു

മുന്തിരിയുടെ ഗുണങ്ങൾ

മുന്തിരിയിലുള്ള ശക്തമായ ആൻറി ഓക്‌സിഡൻറുകൾ ചർമ്മത്തിലെ കോശങ്ങളുടെ അകാല നാശത്തെ തടയുന്നു. ഇത് ചർമ്മത്തിന് തിളക്കവും യുവത്വവും നിലനിർത്താൻ സഹായിക്കും. ഇതിനാൽ വിപണിയിലെ അനേകം സൗന്ദര്യവർദ്ധക വസ്തുക്കളിലും മുന്തിരിയുടെ സത്ത് ഉപയോഗിക്കുന്നു.

കണ്ണുകളുടെ ആരോഗ്യത്തിന്

മുന്തിരിയിലുള്ള ലൂട്ടീൻ (Lutein), സിയാക്സാന്തിൻ (Zeaxanthin) എന്നീ ഘടകങ്ങൾ പ്രായമാകുമ്പോൾ ഉണ്ടാകുന്ന കാഴ്ച്ചക്കുറവിൽ നിന്നും തിമിരത്തിൽ നിന്നും കണ്ണുകളെ സംരക്ഷിക്കാൻ സഹായകരമാണന്ന് പഠനങ്ങൾ വ്യക്തമാക്കുന്നു.

ഉൻമേഷം നൽകുന്നു

ഇതിലടങ്ങിയിരിക്കുന്ന സ്വാഭാവിക ഗ്ലൂക്കോസ് ശരീരത്തിന് പെട്ടെന്ന് ഉന്മേഷം നൽകും.ക്ഷീണം തോന്നുമ്പോൾ ഒരു പിടി മുന്തിരി കഴിക്കുന്നത് പെട്ടെന്ന് ഊർജ്ജം വീണ്ടെടുക്കാൻ സഹായിക്കും.
മറ്റൊരു പ്രധാന കാര്യം: മുന്തിരിയുടെ തൊലിയിലാണ് ഏറ്റവും കൂടുതൽ ആൻ്റിഓക്‌സിഡൻ്റുകൾ അടങ്ങിയിരിക്കുന്നത്. അതിനാൽ തൊലി കളയാതെ കഴിക്കുന്നതാണ് കൂടുതൽ ഗുണകരം എങ്കിലും കൃഷിത്തോട്ടങ്ങളിലെ കീടനാശിനിപ്രയോഗം മൂലം മുന്തിരി കഴിക്കുന്നതിന് മുൻപ് അൽപ്പം മഞ്ഞൾപ്പൊട്ടിയോ, ഏതാനും തുള്ളി വിനാഗിരിയോ ഒഴിച്ച , ചെറു ചൂടുവെള്ളത്തിൽ കുറച്ചു നേരം ഇട്ടുവെച്ച ശേഷം നന്നായി കഴുകിയ ശേഷം മാത്രം ഉപയോഗിക്കുക. നല്ലതുപോലെ കഴുകി വൃത്തിയാക്കാൻ പ്രത്യേകം ശ്രദ്ധിക്കണം.

ഇത്രയും ആരോഗ്യ ഗുണങ്ങൾ ഉള്ളപ്പോഴും ചില പ്രത്യേക അസുഖങ്ങളും, ആരോഗ്യ അവസ്ഥകൾ ഉള്ളവരും, മുന്തിരി ഒഴിവാക്കേണ്ടതുണ്ട്.

മുന്തിരിക്കുണ്ട് ഗുണങ്ങളും, ദോഷങ്ങളും.

1. പ്രമേഹം (Diabetes) - ഉയർന്ന അളവിൽ ഉള്ളവർ

മുന്തിരിയിൽ സ്വാഭാവിക മധുരമായ ഫ്രക്ടോസ്, ഗ്ലൂക്കോസ് എന്നിവ ഉയർന്ന അളവിൽ അടങ്ങിയിട്ടുണ്ട്. അതിനാൽ ഇതിൻ്റെ ഗ്ലൈസെമിക് ഇൻഡക്സ് (Glycemic Index) ഇടത്തരം ആണെങ്കിലും, പെട്ടെന്ന് രക്തത്തിലെ പഞ്ചസാരയുടെ അളവ് (Blood Sugar) കൂട്ടാൻ ഇതിന് സാധിക്കും.

എന്തായാലും, പ്രമേഹം പൂർണ്ണമായി നിയന്ത്രണത്തിലല്ലാത്തവർ മുന്തിരി ഒഴിവാക്കുന്നതാണ് നല്ലത്. നിയന്ത്രണവിധേയമായവർക്ക് ഡോക്ടറുടെ നിർദ്ദേശപ്രകാരം വളരെ കുറഞ്ഞ അളവിൽ കഴിക്കാം. ഉണക്കമുന്തിരി (Raisins) പ്രമേഹരോഗികൾ പൂർണ്ണമായും ഒഴിവാക്കണം, കാരണം ഇതിൽ പഞ്ചസാരയുടെ അളവ് വളരെ കൂടുതലാണ്.

2. വിട്ടുമാറാത്ത വൃക്കരോഗങ്ങൾ (Chronic Kidney Disease - CKD)

മറ്റൊന്ന് വൃക്കരോഗം ബാധിച്ച രോഗികളാണ്. പലപ്പോഴും രോഗബാധിതരെ സന്ദർശിക്കുവാനായി വരുന്നവർ ഒരു പക്ഷേ രോഗികളുടെ ഒരു സന്തോഷത്തിന് എന്ന രീതിയിൽ മുന്തിരിയെല്ലാം കൊണ്ടുവരുന്നത് പലപ്പോഴും കണ്ടിട്ടുണ്ടെങ്കിലും ഇത്തരം രോഗബാധിതർ മുന്തിരിങ്ങ കഴിക്കുന്നത്, തീർച്ചയായും ഒഴിവാക്കേണ്ടതാണ്.

കാരണം, മുന്തിരിങ്ങയിൽ നല്ല രീതിയിൽ പൊട്ടാസ്യം ( Potassium)
അടങ്ങിയിട്ടുള്ളതിനാൽ വൃക്കകളുടെ പ്രവർത്തനം തകരാറിലായ രോഗികൾക്ക് ശരീരത്തിലെ കൂടുതലായുള്ള പൊട്ടാസ്യം അരിച്ചു കളയാൻ സാധിക്കാതെ വരുന്നു. കൂടാതെ രക്തത്തിൽ പൊട്ടാസ്യത്തിൻ്റെ അളവ് കൂടിയാൽ (Hyperkalemia) അത് ഹൃദയമിടിപ്പിൻ്റെ താളംതെറ്റുവാനും, മറ്റ് ഗുരുതരമായ ഹൃദയാരോഗ്യ പ്രശ്നങ്ങൾക്കും കാരണമാകും.

അതിനാൽ ഡയാലിസിസ് ചെയ്യുന്നവരും കടുത്ത വൃക്കരോഗമുള്ളവരും മുന്തിരി കഴിക്കാതിരിക്കുവാൻ ശ്രദ്ധിക്കുക.

രക്തം കട്ടപിടിക്കാതിരിക്കാൻ മരുന്ന് കഴിക്കുന്നവർ (Blood Thinners)

മുന്തിരിയിൽ വിറ്റാമിൻ കെ (Vitamin K), കൂടാതെ രക്തം കട്ടപിടിക്കുന്നത് തടയുന്ന റെസ്‌വെറാട്രോൾ (Resveratrol) എന്ന ഘടകവും അടങ്ങിയിട്ടുണ്ട്.

അതിനാൽ, ഹൃദയസംബന്ധമായ അസുഖങ്ങൾക്കോ സ്ട്രോക്കിനോ വേണ്ടി 'വാർഫറിൻ' (Warfarin) പോലുള്ള രക്തം കട്ടപിടിക്കാതിരിക്കാനുള്ള മരുന്നുകൾ (Blood thinners) കഴിക്കുന്നവർ മുന്തിരി അമിതമായി കഴിക്കരുത്. ഇത് രോഗി നിലവിൽ കഴിക്കുന്ന മരുന്നിൻ്റെ പ്രവർത്തനത്തെ ബാധിക്കാനും രക്തസ്രാവത്തിനുള്ള (Bleeding) സാധ്യത കൂട്ടുവാനും ഇടയാക്കും.

വിട്ടുമാറാത്ത വയറിളക്കവും ദഹനപ്രശ്നങ്ങളും (IBS / Diarrhea)

മുന്തിരിയുടെ തൊലിയിലും കുരുവിലും നാരുകൾ (Insoluble fiber) ധാരാളമുണ്ട്. കൂടാതെ ഇതിലടങ്ങിയിരിക്കുന്ന ഫ്രക്ടോസ് ചിലരിൽ ദഹനക്കേടുണ്ടാക്കാം.
കൂടാതെ, ഇറിറ്റബിൾ ബോവൽ സിൻഡ്രോം (IBS) ഉള്ളവർക്കോ, നിലവിൽ വയറിളക്കം, ഗ്യാസ്,വയറുവേദന തുടങ്ങിയ പ്രശ്നങ്ങൾ ഉള്ളവർക്കോ മുന്തിരി കഴിക്കുന്നത് അവസ്ഥ കൂടുതൽ വഷളാക്കിയേക്കാം.

മുന്തിരി ഗുണദോഷങ്ങൾ

അമിതഭാരവും പൊണ്ണത്തടിയും (Obesity)

മറ്റ് ചില പഴങ്ങളെ അപേക്ഷിച്ച് മുന്തിരിയിൽ കലോറിയും കാർബോഹൈഡ്രേറ്റും കൂടുതലാണ്. രുചി കാരണം നമ്മൾ അറിയാതെ തന്നെ കൂടുതൽ മുന്തിരി കഴിച്ചുപോകാറുണ്ട് (Binge eating).
അതിനാൽ,  ശരീരഭാരം കുറയ്ക്കാൻ കർശനമായ ഡയറ്റ് നോക്കുന്നവർ മുന്തിരിയുടെ അളവ് കൃത്യമായി നിയന്ത്രിക്കണം.

എന്തായാലും, ഏതൊരു രോഗാവസ്ഥയിലായാൽപോലും, ഭക്ഷണനിയന്ത്രണ കാര്യങ്ങൾ തീർച്ചയായും ഡോക്ടറുമായി സംസാരിക്കേണ്ടതുണ്ട്. കാരണം രോഗകാരണമെന്നതുപോലെതന്നെ, രോഗനിവാരണത്തിലും ഭക്ഷണം വളരെ വലിയ ഒരുപങ്കുതന്നെ വഹിക്കുന്നുവെന്നകാര്യം മറക്കാതിരിക്കുക.