വേനൽച്ചൂടിൽ ഒരു പ്രകൃതിദത്ത പാനീയം

പുതിന ഏലക്കായ് പ്രകൃതിദത്ത പാനീയം .

കേരളം ഇപ്പോൾ കടന്നുപോകുന്നത് സമാനതകളില്ലാത്ത വേനൽച്ചൂടിലൂടെയാണ്. സൂര്യഘാതവും , നിർജ്ജലീകരണവുമെല്ലാം എല്ലാവരേയും തളർത്തുന്നു. എന്നാൽ കടകളിൽ നിന്നു വാങ്ങുന്ന കൃത്രിമ പാനീയങ്ങളാകട്ടെ താത്ക്കാലിക ആശ്വാസം നൽകുമെങ്കിലും അത് പലപ്പോഴും ആരോഗ്യകരമായി ഗുണത്തേക്കാളേറെ , ദോഷമാണ് വരുത്തിവെയ്ക്കുന്നതും. 

എന്നാൽ വേനൽച്ചൂട് അധികരിച്ചു നിൽക്കുമ്പോൾ ,പ്രത്യേകിച്ച് കൊച്ചുകുട്ടികളുടേയും , പ്രായമായവരുടേയും ആരോഗ്യ സംരക്ഷണത്തിൽ മതിയായ  ശ്രദ്ധ നൽകേണ്ട സമയവും കൂടിയാണിത് . വെള്ളം ധാരളമായി കുടിക്കുവാൻ തന്നെയാണ്  അവരോട് പ്രത്യേകം നിർദ്ദേശിക്കേണ്ടതും. 

ഇവിടെ നമുക്ക് വളരെ എളുപ്പത്തിലും മികച്ച ശാരീരിക ഊർജ്ജം ലഭിക്കുവാനും ഉതകുന്ന സ്വന്തം വീട്ടുമുറ്റത്തെ പുതിനയിലയും, വീട്ടിൽ എപ്പോഴും ലഭ്യമാകുന്ന നാരങ്ങയും, ഏലക്കായുമെല്ലാം ചേർത്ത് വളരെ ഫ്രഷ് ആയ, ഒരു കൂൾ ഡ്രിംഗ് എങ്ങിനെയുണ്ടാക്കാമെന്ന് നോക്കാം.

ആവശ്യമായ ചേരുവകകൾ.

ചെറു നാരങ്ങ - 1

പുതിനയില      - ഒരു പിടി

ഏലക്കായ്        - 2 എണ്ണം ചതച്ചത്

ഇഞ്ചി                    ഒരു ചെറിയ കഷണം ചതച്ചത്

പനം കൽക്കണ്ടം / തേൻ ( മധുരം ആവശ്യമുള്ളത്രയും )

കസ്കസ്           - 1 ടീസ്പൂൺ

ഇന്തുപ്പ്               - ഒരു നുള്ള്.

തണുത്ത വെള്ളം ( മൺപാത്രത്തിൽ വെച്ച് തണുത്തത് ഉത്തമം )

ചൂട് കാലത്ത് പ്രകൃതിദത്തപാനീയം

തയ്യാറാക്കുന്ന വിധം

മുകളിൽ വിവരിച്ച പുതിനയിലയും , ഇഞ്ചിയും, ഏലക്കായും ചതച്ചെടുക്കുക. മറ്റൊരു പാത്രത്തിൽ നാരങ്ങാനീരും, ആവശ്യത്തിനുള്ള മധുരവും, ഒരു നുള്ള് മാത്രം ഉപ്പും ചേർത്ത് രണ്ട് ഗ്ലാസ്  വെള്ളമൊഴിക്കുക. പിന്നീട് ചതച്ചു വെച്ചിരിക്കുന്ന പുതിനയിലയും , ഏലക്കായും , ഇഞ്ചിയും ചേർത്ത് നന്നായി ഇളക്കി യോജിപ്പിച്ച് അരിച്ചെടുത്തതിന് ശേഷം കസ്കകസും ചേർത്തിളക്കിക്കഴിഞ്ഞാൽ മികച്ച എനർജി ഡ്രിംഗ് റെഡി.

ആരോഗൃഗുണം .

പ്രകൃതിദത്ത ഇലക്ട്രോലൈറ്റ് . ശരീരത്തിൽ വിയർപ്പിലൂടെ നഷ്ടപ്പെടുന്ന ലവണങ്ങളെ നാരങ്ങയും , ഉപ്പും ചേർന്ന ജലത്തിലൂടെ തിരികെ നൽകുന്നു.

ശരീരതാപം ശമിപ്പിക്കുന്നു.

പുതിനയിലയിലെ മെന്തോളും, ഏലക്കായിൻ്റെ അംശവും, ശരീരത്തിലെ താപത്തെ കുറച്ച് സാധാരണ രീതിയിലാക്കുവാൻ സഹായിക്കുന്നു.

ദഹനം സുഗമമാക്കുന്നു.

ഇഞ്ചിയും, പുതിനയിലയും , ചൂടുകാലത്തുണ്ടാകുന്ന നെഞ്ചെരിച്ചലിനും , ദഹന സംബന്ധമായ പ്രശ്നങ്ങൾക്കുമെല്ലാം മികച്ചതാണ്.

കൂടാതെ ഏലക്കായിൻ്റെ സാന്നിദ്ധ്യം പാനീയത്തിന് പ്രത്യേക ഗന്ധവും, രുചിയും നൽകുന്നതോടൊപ്പം ഇൻസ്റ്റൻ്റ് റിഫ്രഷ്മെൻ്റും നൽകും.

നമ്മൾ ഇത്രയും പറഞ്ഞ കാര്യങ്ങൾക്കപ്പുറം അനുദിനം ഉയർന്നു വരുന്ന ചൂടിനെ പ്രതിരോധിക്കുവാൻ ഒരാൾ ഒരു ദിവസം എത്ര ലിറ്റർ ജലം കുടിക്കണമെന്നതു കൂടി പരിശോധിക്കാം.

ഒരുദിവസം എത്രഗ്ളാസ്സ് വെള്ളം കുടിക്കണം ?

1 - മുതൽ 3 വയസ്സുവരെ - 1 - മുതൽ 1.2 - ലിറ്റർ വരെ ( ഏകദേശം 4 ഗ്ലാസ് )

4 - മുതൽ 8 വയസ്സുവരെ - 1.2 - മുതൽ 1.5 ലിറ്റർ വരെ ( ഏകദേശം 5-6 ഗ്ലാസ്)

9 - മുതൽ 13 വയസ്സുവരെ ഏകദേശം 1.5 ലിറ്റർ മുതൽ 2 ലിറ്റർ വരെ ( 7-8 ഗ്ളാസ്സ് )

14 മുതൽ 18 വയസ്സുവരെ. 2 ലിറ്റർമുതൽ 2.5 ലിറ്റർ വരെ ( 8 - 10 ) ഗ്ലാസ്സ് .

മുതിർന്ന പുരുഷൻമാർ - 2.5 ലിറ്റർ മുതൽ, 3 ലിറ്റർ വരെ . ( 10 -12 ഗ്ലാസ്സ് )

മുതിർന്ന സ്ത്രീകൾ - 2 ലിറ്റർ മുതൽ  2.5 ലിറ്റർ വരെ . ( ഏകദേശം 8 - 10 ഗ്ലാസ്സ്) 

പ്രത്യേകം ശ്രദ്ധിക്കുക.

ഇപ്പോൾ അനുഭവപ്പെടുന്ന കഠിനമായ ചൂടിൽ വിയർപ്പിലൂടെ ധാരാളം ജലം നഷ്ടപ്പെടുന്നതിനാൽ  മുകളിൽപ്പറഞ്ഞ അളവുകൾക്കും മുകളിൽ വെള്ളംകുടിക്കുന്നതുകൊണ്ടും ദൂഷ്യങ്ങളൊന്നുമില്ല.

ദാഹം തുടങ്ങുന്നതുവരെ കാത്തിരിക്കേണ്ടതില്ല.

ദാഹം തുടങ്ങുന്നത് ശരീരം വെള്ളമില്ലാതെ തളർന്നുതുടങ്ങുന്നതിൻറെ സൂചനയാണ്.അതിനാൽ ദാഹം തുടങ്ങുന്നതിനും മുൻപേ വെള്ളം കുടിച്ചുതുടങ്ങുക. പ്രത്യേകിച്ച് നല്ല വെയിലിൽ പണിയെടുക്കുന്നവരും, കഠിനാദ്ധ്വാനത്തിൽ ഏർപ്പെട്ടിരിക്കുന്നവരുമെല്ലാം, കഠിനമായ ഈ ചൂടുകാലത്ത് അരമണിക്കൂർ ഇടവിട്ട് ഒരു ഗ്ളാസ്സ് വെള്ളമെങ്കിലും കുടിക്കുവാൻ ശ്രദ്ധിക്കുക.

ചൂട് കാലത്ത് തണ്ണിമത്തൻ

പഴം, പച്ചക്കറികൾ.

തള്ളിമത്തൻ, വെള്ളരി, ഓറഞ്ചുപോലുള്ള ജലാംശംകൂടിയ പഴവർഗ്ഗങ്ങൾ ഭക്ഷണത്തിൽ ഉൾപ്പെടുത്തുന്നത് ശരീരത്തിന് ആവശ്യമായ ലവണങ്ങൾ ലഭിക്കുവാനും സഹായകരമാണ്.