ഭക്ഷണസംരക്ഷണം ശാസ്ത്രീയ മാർഗ്ഗങ്ങൾ
ഭക്ഷണം കേടുകൂടാതെ സംരക്ഷിക്കാം
 |
| ഭക്ഷണം കേടുകൂടാതെ സംരക്ഷിക്കാം. |
പച്ചക്കറിയായാലും, പഴവർഗ്ഗമായാലും, പാചകം ചെയ്തവയോ, അല്ലാത്തവയോ മാംസാഹാരങ്ങളോ എന്ത് തന്നെയാകട്ടെ , അത് എങ്ങനെ നമുക്ക് അനേകദിവസങ്ങൾ കേടുകൂടാതെ സൂക്ഷിക്കാനാകും?
സംശയമെന്ത്? ഫ്രിഡ്ജിൽ വെച്ചു തന്നെ സൂക്ഷിക്കാമെന്നാകും ഉത്തരം .
എന്നാൽ ഫ്രിഡ്ജിൽ, ഏതൊരു ഭക്ഷണസാധനവും അനേക ദിവസങ്ങൾ കേടുകൂടാതെ സൂക്ഷിക്കുവാൻ സാധിക്കുമോ?
ഒരിക്കലുമില്ല ! ഒരു പക്ഷേ ഏതെങ്കിലും പ്രത്യേക ഭക്ഷ്യവസ്തുക്കൾ കുറച്ചു ദിവസം കൂടുതൽ സൂക്ഷിക്കാമെന്നല്ലാതെ എല്ലാം സൂക്ഷിക്കുന്നത് അത്ര എളുപ്പമല്ല.
അങ്ങിനെയെങ്കിൽ എല്ലാ ഭക്ഷ്യവസ്തുക്കളും കുറച്ചു ദിവസത്തേക്ക് കേടുകൂടാതെയിരിക്കുവാൻ എന്താണ് ഒരു മാർഗ്ഗം?
പച്ചക്കറി, പഴവർഗ്ഗങ്ങൾ ഇവയെ തരം തിരിച്ചു വെയ്ക്കുക എന്നതാണ് ആദ്യത്തെ മാർഗ്ഗം .
പച്ചക്കറികൾ പൊതുവിൽ പച്ചക്കറി വർഗ്ഗമെന്നാണ് വിശേഷിപ്പിക്കുന്നതെങ്കിലും, പലപ്പോഴും അവയെല്ലാം ഒരേ വർഗ്ഗത്തിൽത്തന്നെ വിഭിന്നങ്ങളായ ഗുണവിശേഷങ്ങൾ നിലനിർത്തുന്നുന്നവയുമാണ്.
ഒരു ഉദാഹരണം പറഞ്ഞാൽ സവാളയും, ഉരുളക്കിഴങ്ങും ഒരേ ഇനത്തിൽപ്പെട്ട പച്ചക്കറികളാണെന്ന് പറയാമെങ്കിലും രണ്ടും ഒരുമിച്ച് വെച്ചാൽ ഒന്നുകിൽ ഉരുളക്കിഴങ്ങ് വളരെ പെട്ടെന്ന് ചീഞ്ഞ് അഴുകിത്തുടങ്ങുകയോ, അതല്ലങ്കിൽ മുളച്ചുപൊങ്ങുവാനോ തുടങ്ങും.
എന്താണതിന് കാരണം ?
സവാളയിൽ നിന്ന് പുറത്തുവരുന്ന എഥിലിൻ എന്ന വാതകവും, അത് വളരെ പെട്ടെന്ന് ആഗിരണം ചെയ്യാൻ ശേഷിയുള്ള ഉരുളക്കിഴങ്ങും.
ഇതുപോലെ തന്നെയാണ് ആപ്പിളും , ഏത്തപ്പഴവും ഒരുമിച്ച് വെച്ചാലുമുള്ള അനുഭവവും, ആപ്പിൾ പുറത്തുവിടുന്ന എഥിലിൻ വാതകവും, അത് വളരെ പെട്ടെന്ന് വലിച്ചെടുത്ത് കറുത്ത് കേടായിത്തീർന്ന ഏത്തപ്പഴവും നമുക്ക് കാണാം.
 |
| ഭക്ഷണം എങ്ങിനെ കേടുകൂടാതെ സംരക്ഷിക്കാം ? |
അപ്പോൾ ഇതെല്ലാം ദീർഘനാൾ കേടുകൂടാതെയിരിക്കുവാൻ ആദ്യമായി ചെയ്യേണ്ടത്, പഴങ്ങളും, പച്ചക്കറികളും, മത്സ്യവും, മാംസവും, പാലുമെല്ലാം ഫ്രിഡ്ജിനുള്ളിൽ വെവ്വേറെയായി തരം തിരിച്ച് സൂക്ഷിക്കുക എന്നതാണ്.
ഭക്ഷണസാധനങ്ങൾ തരം തിരിച്ച് സൂക്ഷിക്കാം
അതിന്, ആദ്യം മുകളിൽ സൂചിപ്പിച്ചതുപോലെ ഒരേ സ്വഭാവ സവിശേഷതകൾ അടങ്ങിയ ആപ്പിൾ, പപ്പായ, തക്കാളി തുടങ്ങിയവയുണ്ടെങ്കിൽ എല്ലാം ഒരേ ബോക്സിലിട്ട് തന്നെ ഫ്രിഡ്ജിൽ സൂക്ഷിക്കാം. കാരണം ഈ പറഞ്ഞ മൂന്നു വിഭവങ്ങളും എഥിലിൻ വാതകം പുറത്ത് വിടുന്നവയാണ്.
എന്നാൽ , ഏത്തപ്പഴം, കൂടാതെ പച്ചക്കറികളിലെ ഇലവർഗ്ഗങ്ങളായ ചീര, മല്ലിയില, പുതിനയില, ക്യാരറ്റ് എന്നിവയെല്ലാം നേരെ വിപരീത സ്വഭാവമുള്ളതും, എഥിലിൻ വാതകം പെട്ടെന്ന് ആകർഷിക്കപ്പെടുന്നതുമായതിനാൽ ഇവ റഫ്രിജറേറ്ററിൽ വേറെ സ്ഥലങ്ങളിൽത്തന്നെ സൂക്ഷിക്കണം.
അതോടൊപ്പം മുകളിൽ വിവരിച്ച , ഇലവർഗ്ഗങ്ങളായ ചീര , മല്ലിയില, പുതിന , ഇവയെല്ലാം മറ്റ് പച്ചക്കറികളിൽ നിന്ന് വേർതിരിച്ച്, ജലാംശം പൂർണ്ണമായും കളഞ്ഞ് . കോട്ടൺ തുണികളിലോ, പേപ്പറിലോ പൊതിഞ്ഞ് ഫ്രിഡ്ജിൽ പൊളിത്തീൻ ബാഗുകളിൽ സൂക്ഷിക്കാം . ഇല്ലാത്ത പക്ഷം ഇതിലെ ഈർപ്പം പെട്ടെന്ന് നഷ്ടപ്പെടുകയും . കേടായിപ്പോവുകയും ചെയ്യും
ആവശ്യമെങ്കിൽ തക്കാളി പോലുള്ളവ, അധികം പഴുക്കാത്തതാണങ്കിൽ മറ്റുള്ളവയിൽ നിന്ന് മാറ്റിവെക്കുവാനും, തനത് രുചി നഷ്ടപെടാതിരിക്കുവാനും ഫ്രിഡ്ജിന് പുറത്ത് സൂക്ഷിക്കുന്നതും നല്ലതാണ്.
എങ്കിലും, നല്ല വണ്ണം പഴുത്ത തക്കാളിയാണെങ്കിൽ കേടുകൂടാതെയിരിക്കുവാൻ മറ്റു പച്ചക്കറി പഴവർഗ്ഗങ്ങളിൽ നിന്നും മാറ്റി പ്രത്യേകം കവറിലാക്കി പൊതിഞ്ഞ്, ഫ്രിഡ്ജിൽ തന്നെ മറ്റൊരിടത്തായി സൂക്ഷിക്കാം.
 |
| ഭക്ഷണം എങ്ങിനെ കേടുകൂടാതെ സംരക്ഷിക്കാം ? |
ഏതൊരു പച്ചക്കറി - പഴവർഗ്ഗങ്ങളായാലും ഫ്രിഡ്ജിൽ സൂക്ഷിക്കുമ്പോൾ തീർച്ചയായും അതിലുള്ള ജലാംശം മുഴുവനും തുടച്ച് നീക്കം ചെയ്തതിന് ശേഷം മാത്രം വെയ്ക്കുവാൻ ശ്രദ്ധിക്കുക. അല്ലാത്ത പക്ഷം അതിൽ ബാക്ടീരിയകളും , ഫംഗസും ( പൂപ്പൽ ) വളരുകയും പച്ചക്കറികൾ വേഗത്തിൽ ചീഞ്ഞ് അഴുകുകയും ചെയ്യും. കൂടാതെ അതിൽ പറ്റിപ്പിടിച്ചിരിക്കുന്ന ജലാംശം പച്ചക്കറികളുടെ ഉപരിതലത്തിലെ സുഷിരങ്ങളെ അടയ്ക്കുകയും അതുവഴി കോശങ്ങൾ നശിപ്പിക്കപ്പെടുകയും ചെയ്യും.
പച്ചക്കറികൾ എങ്ങിനെ കഴുകി സൂക്ഷിക്കാം?
മാർക്കറ്റിൽ നിന്ന് വാങ്ങുന്ന പച്ചക്കറികളാണ് പ്രധാനമായും ഏവരും കഴുകി സൂക്ഷിക്കുന്നത്. കാരണം അതിൽ തളിച്ചിരിക്കുവാൻ ഇടയുള്ള കീടനാശിനികളും , അഴുക്കുകളും നീക്കം ചെയ്യുവാൻ തീർച്ചയായും ഇവ നന്നായി കഴുകിയെടുക്കേണ്ടവ തന്നെയാണ്. അതിനായി ആദ്യം, പച്ചക്കറികൾ അൽപ്പം കല്ലുപ്പും, മഞ്ഞൾപ്പൊടിയും ചേർന്ന വെള്ളത്തിലോ, വിനാഗിരി കലർത്തിയ വെള്ളത്തിലോ അര മണിക്കൂർ മുക്കിവെക്കുക. പിന്നീട്, അത് ശുദ്ധജലത്തിൽ കഴുകിയെടുത്ത് അതിൽ പറ്റിച്ചേർന്നിരിക്കുന്ന ഈർപ്പം പൂർണ്ണമായും വിട്ടു മാറാൻ അനുവദിക്കുക.
ഈർപ്പം നന്നായി കളയുവാൻ പച്ചക്കറിയിലെ ജലാംശം ഒരു കോട്ടൺ തുണി ഉപയോഗിച്ച് തുടച്ച ശേഷം ആവശ്യമെങ്കിൽ അൽപ്പ സമയം ഒരു ഫാനിൻ അടിയിൽ വെക്കാവുന്നതാണ്.
പലപ്പോഴും പഴങ്ങളും പച്ചക്കറികളും കേടാകുന്നതിൻ്റെ മുഖ്യകാരണങ്ങളിൽ ഒന്ന് പറ്റിപ്പിടിച്ചിരിക്കുന്ന ജലാംശം തന്നെയാണ്.
അതിനാൽ പച്ചക്കറിയും, ഫലവർഗ്ഗങ്ങളും ഒന്നുകിൽ കഴിക്കുന്നതിന് മുൻപോ, അതല്ലങ്കിൽ പാചകം ചെയ്യുന്നതിന് മുൻപോ കഴുകുന്നതാകും നല്ലത്.
കൂടാതെ മുറിച്ചു വെച്ച പച്ചക്കറികളാണെങ്കിൽ അവ വായു കടക്കാത്ത പാത്രങ്ങളിലടച്ച് സൂക്ഷിക്കുവാനും ശ്രദ്ധിക്കുക.
പയർ വർഗ്ഗങ്ങൾ
നന്നായി ഉണക്കിയെടുത്ത് വായു കടക്കാത്ത പാത്രങ്ങളിൽ പയർ വർഗ്ഗങ്ങൾ അടച്ചു വെച്ചാൽ ദീർഘകാലം ഫ്രിഡ്ജിൽ കേടുകൂടാതെ സൂക്ഷിക്കുവാനാകും. കൂടാതെ ഒരു മുൻകരുതൽ എന്ന നിലയ്ക്ക് മറ്റ് കീടങ്ങളൊന്നും പയർ വർഗ്ഗങ്ങളിൽ പറ്റിപ്പിടിച്ച് വളരാതിരിക്കുവാൻ ഒരു ഉണക്ക മുളകോ , അൽപ്പം വേപ്പിലയോ പാത്രത്തിനകത്ത് ഇടുന്നതും നല്ലതാണ്.
പച്ചമുളക് വളരെ പെട്ടെന്ന് ചീഞ്ഞു പോകാതിരിക്കാൻ അതിൻ്റെ തണ്ട് നീക്കം ചെയ്ത ശേഷം വായു കടക്കാത്ത ഒരു പാത്രത്തിൽ അടച്ചു സൂക്ഷിക്കുന്നത് ദീർഘകാലത്തേക്ക് കേടുകൂടാതെയിരിക്കുവാൻ സഹായിക്കും.
ചെറുനാരങ്ങ
ചെറുനാരങ്ങകൾ എപ്പോഴും മിക്കവാറും വീടുകളിൽ ഫ്രിഡ്ജിൽ സ്ഥിരമായി സൂക്ഷിക്കുന്ന ഒന്നാണ് . എന്നാൽ പലപ്പോഴും അത്യാവശ്യസമയങ്ങളിൽ ചെറുനാരങ്ങ ഫ്രിഡ്ജിൽ നിന്നെടുക്കുമ്പോൾ മിക്കവാറും അതിൻ്റെ പുറം തോടുകൾ ബ്രൗൺ നിറമായി ഉണങ്ങിത്തുടങ്ങിയ അവസ്ഥയിലാകും. എന്നാൽ ഒരു ചെറിയ കുപ്പിയിൽ അൽപ്പം വെള്ളം നിറച്ച് ചെറു നാരങ്ങകൾ അതിലിട്ട് വെച്ചു നോക്കൂ. വളരെയേറെ ദിവസം അത് യാതൊരു കേടുകൂടാതെ സംരക്ഷിക്കപ്പെട്ടിരിക്കുന്നതായി കാണാം.
ഇഞ്ചി, വെളുത്തുള്ളി
ഇഞ്ചി ഫ്രിഡ്ജിനകത്ത് ഒരു പേപ്പറിൽ പൊതിഞ്ഞ് റഫ്രിജറേറ്ററിൽ കേടുകൂടാതെ വെയ്ക്കാമെങ്കിലും , വെളുത്തുള്ളി പോലുള്ളവ ഫ്രിഡ്ജിന് പുറത്ത് സൂക്ഷിക്കുന്നതാണ് ഉചിതം.
കാരറ്റ്, ബീറ്റ്റൂട്ട് എന്നിവ അതിനു മുകളിൽ തണ്ടോ ഇലകളോ ഉണ്ടെങ്കിൽ അത് മുറിച്ചു മാറ്റിയ ശേഷം പ്രത്യേകം കവറുകളിൽ സൂക്ഷിക്കാം.
പച്ചക്കറികൾ സൂക്ഷിക്കുന്ന ബാഗുകൾ
ഫ്രിഡ്ജിനകത്ത് പച്ചക്കറികൾ പ്രത്യേകമായി പൊതിഞ്ഞു സൂക്ഷിക്കുമ്പോൾ താഴെ പറയുന്ന കാര്യങ്ങൾ കൂടി ശ്രദ്ധിച്ചാൽ കൂടുതൽ പച്ചക്കറികൾ കേടുകൂടാതെയിരിക്കുവാൻ സഹായകരമാണ്.
 |
| ഭക്ഷണം എങ്ങിനെ കേടുകൂടാതെ സംരക്ഷിക്കാം ? |
ബാഗുകൾ .
വായുസഞ്ചാരമില്ലാതെ, തണുത്ത അന്തരീക്ഷത്തിൽ ഭക്ഷണസാധനങ്ങൾ കൂടുതൽ ദിവസം സംരക്ഷിക്കാൻ, സിപ് ലോക്ക് ബാഗുകൾ ഉപയോഗിക്കുന്നതുവഴി കഴിയും.
കോട്ടൺ ബാഗുകൾ
ഇവ വായുസഞ്ചാരം ആവശ്യമുള്ള വെണ്ടയ്ക്ക, അച്ചിങ്ങ , ബീൻസ് പോലുള്ള പയർവർഗ്ഗങ്ങളെല്ലാം സംരക്ഷിക്കപ്പെടുവാൻ ഉപയോഗിക്കാം.
പ്ലാസ്റ്റിക് കവറുകൾ
പ്ലാസ്റ്റിക്ക് കവറുകൾ ഉപയോഗിക്കുമ്പോൾ അതിൽ സുഷിരങ്ങൾ ഇട്ട ശേഷം ഉപയോഗിക്കുന്നത് നല്ല രീതിയിലുള്ള വായു സഞ്ചാരത്തിന് നല്ലതാണ്.
ക്രമീകരിക്കാം
മാംസാഹാരങ്ങൾ
മാംസാഹാരങ്ങൾ ഫ്രിഡ്ജിലെ ഏറ്റവും അടിയിലെ തട്ടിലായി സൂക്ഷിക്കാം. കാരണം ഫ്രിഡ്ജിൻ്റെ മുകൾനിലകളിലുള്ള സ്പെയ്സുകളിൽ മീൻ, ഇറച്ചി പോലുള്ളവ സൂക്ഷിച്ചാൽ ഒരു പക്ഷേ അതിൽ നിന്ന് വീഴാവുന്ന ജലാംശം മറ്റു ഭക്ഷണപദാർഥങ്ങളിൽ വീണ് കേടായിപ്പോകുന്നതിനും, അതിൻ്റെ മണം, രുചി, ഗന്ധങ്ങൾക്കെല്ലാം വ്യത്യാസം വരാനും സാദ്ധ്യതയുണ്ട്.
കൂടാതെ മാംസാഹാരങ്ങൾ പഴം, പച്ചക്കറി എന്നിവയിൽ നിന്നും മാറ്റി Cross - Contamination ന് വിധേയമാകാത്ത വിധം മറ്റൊരു തട്ടിലായോ, ഫ്രീസറിലോ സൂക്ഷിവാനും ശ്രദ്ധിക്കണം.
 |
| ഭക്ഷണം എങ്ങിനെ കേടുകൂടാതെ സംരക്ഷിക്കാം ? |
മാർക്കറ്റിൽ നിന്ന് വാങ്ങുന്ന ഇറച്ചി നന്നായി കഴുകി, പൂർണ്ണമായി ജലാംശം കളഞ്ഞ് കണ്ടയ്നർ പാത്രങ്ങളിലോ, അതല്ലങ്കിൽ സിപ്പ് ലോക്ക് കവറുകളിലോ ഭദ്രമായി റഫ്രിജറേറ്ററിൽ സൂക്ഷിക്കാം. ഇത് മാംസാഹാരങ്ങളിൽ ഫ്രീസർ ബേണിംഗ് ഇല്ലാതിരിക്കുന്നതിനും മറ്റ് ഭക്ഷ്യവസ്തുക്കളിലേക്ക് ഗന്ധം പടരാതിരിക്കുന്നതിനും സഹായിക്കും.
ഫ്രിഡ്ജിലെ ഫ്രീസറിൽ നിന്നെടുത്ത ഇറച്ചി, മീൻ പോലുള്ള ഭക്ഷ്യവസ്തുക്കൾ പാചകത്തിന് മുൻപ് അൽപ്പ സമയം ഫ്രിഡ്ജിലെ സാധാരണ ഭാഗങ്ങളിലേക്ക് മാറ്റി തണുപ്പ് കുറയ്ക്കുക. പുറത്തെടുത്ത് വെള്ളത്തിലിടുന്നതിനേക്കാൾ കൂടുതൽ സുരക്ഷിതം ഇതാണ്.
മത്സ്യം സൂക്ഷിക്കുമ്പോൾ
മത്സ്യം വാങ്ങിക്കൊണ്ടുവന്ന് അതിൻ്റെ ചെകിളകളും, കുടലുകളും നീക്കം ചെയ്ത് കഴുകി വൃത്തിയാക്കി മാത്രം ഫ്രിഡ്ജിൽ സൂക്ഷിക്കുക. അല്ലാത്ത പക്ഷം മത്സ്യത്തിന് കേടുപാടുകൾ സംഭവിക്കുവാനോ, ചീഞ്ഞ ഗന്ധം പടരുവാനോ സാദ്ധ്യതയുണ്ട്.
മത്സ്യം നന്നായി എടുത്ത ശേഷം അതിൽ കറിയുപ്പും, മഞ്ഞളും ചേർത്ത് പുരട്ടി വെയ്ക്കുന്നത് അതിൽ ബാക്ടീരിയകളുടെ വളർച്ച തടയുവാൻ സഹായിക്കുന്നു.
മത്സ്യം കുറച്ചധികം ദിവസങ്ങൾ ഫ്രിഡ്ജിൽ കേടുകൂടാതെ സംരക്ഷിക്കുന്നതിന് ഫ്രീസറിൽ തന്നെ സൂക്ഷിക്കേണ്ടത് ആവശ്യമാണ്. അതിനായി ഓരോ ദിവസങ്ങളിലും എടുത്ത് ഉപയോഗിക്കേണ്ട ഭാഗങ്ങൾ ഓരോ പാക്കറ്റുകളിലായി വെയ്ക്കുക. കൂടാതെ ഫ്രീസറിൽ നിന്ന് പുറത്തേക്കെടുത്ത മത്സ്യം വീണ്ടും ഫ്രീസറിലേക്ക് കയറ്റി വെയ്ക്കുന്നതും ഒഴിവാക്കേണ്ടതാണ്.
അഭിപ്രായങ്ങള്