മകരജ്യോതി മനുഷ്യനിർമ്മിതമോ?

ശബരിമല മകരജ്യോതി

ചോദ്യത്തിന് കാലങ്ങളുടെ പഴക്കമുണ്ട് .

എന്തുതന്നെയായാലും, സംവാദങ്ങൾ ഒരു പുരോഗമന ജനാധിപത്യ സമൂഹത്തിൽ തീർച്ചയായും ഉണ്ടാകേണ്ടതുതന്നെയാണ്. പക്ഷെ അത് ആരോഗ്യകരവും, സമൂഹത്തിൻറെ ഉന്നമനത്തിന് ഉതകുന്നതുമായിരിക്കണം.

പറഞ്ഞുവന്നത്, ചില സീസൺവർക്കുപോലെ എല്ലാ മണ്ഡലക്കാലമെത്തുമ്പോഴും. കേരളത്തിൽ എപ്പോഴും ഉയർന്നുവരുന്ന ഒരു പൊതു ചർച്ചയാണ് ശബരിമല

എങ്കിൽപ്പോലും, എത്രശക്തിയായി ഇതിനെതിരെ എതിർവാദമുയരുന്നുവോ, അതിനനുസരിച്ച് ഓരോ വർഷവും ശബരിമലതീർഥാടകരുടെ എണ്ണവും കൂടിവരുന്നു എന്നതാണ് മറ്റൊരു യാഥാർത്ഥ്യവും.!

ശബരിമല

എന്താണ് ശബരിമലയുടെ പ്രത്യേകത?

ഇതിനുള്ള ഉത്തരം നൽകേണ്ടത് അവിടെപ്പോയി തിരിച്ചെത്തുന്ന ഭക്തജനങ്ങളാണ്!

അതിനാൽ തന്നെ ആ ചോദ്യം ഒരു ഭക്തനോടുതന്നെ ആകാമെന്നുകരുതി.

ഏകദേശം ഇരുപതിലധികം വർഷത്തോളമായി അദ്ദേഹം ശബരിമല തീർത്ഥാടനം തുടങ്ങിയിട്ട്. ഇന്നുവരെ എന്തെല്ലാം പ്രതിസന്ധികൾ ജീവിതത്തിലുണ്ടായിട്ടുണ്ടങ്കിലും അദ്ദേഹം ശബരിമലയാത്ര ഒരുകാരണവശാലും, മുടക്കിയിട്ടില്ല. മാത്രമല്ല കൃത്യമായ വൃതാനുഷ്ഠാനങ്ങളോടെ തന്നെയാകും ഓരോ വർഷവും, പുറപ്പെടുന്നതും. എങ്കിൽതന്നെയും അദ്ദേഹം മറ്റേതെങ്കിലും ക്ഷേത്രങ്ങളിൽ പോകുന്നതായോ, ഒരു വലിയ വിശ്വാസിയായൊന്നും തോന്നിയിട്ടുമില്ല. പിന്നെയെന്താകും ശബരിമലയോടുള്ള അദ്ദേഹത്തിൻ്റെ പ്രത്യേക അഭിമുഖൃം...?

"നമ്മുടെ ശബരിമലപോലെ ഇത്രയും, മനോഹരമായ ഒരു പുണ്യഭൂമി, നിങ്ങൾക്ക് മറ്റെവിടെയെങ്കിലും കാണിച്ചു തരുവാൻ കഴിയുമോ..?"

- അദ്ദേഹം തുടർന്നു -

"ഞാൻ ഒരിക്കലും അന്ധമായ ഒരുഭക്തിയുടെ ആരാധകനൊന്നുമല്ല. ദൈവം ഏതെങ്കിലും നാലു ചുവരുകൾക്കുള്ളിൽ കുടിയിരിക്കുന്നുവെന്ന പഴഞ്ചൻ ആചാരസങ്കൽപ്പങ്ങളുമില്ല....!"

"പിന്നെന്താണ്? 

ദൈവം കുടിയിരിക്കുന്നത് മനുഷ്യ ഹൃദയങ്ങളിലാകണം. മനുഷ്യരുടെ പ്രവർത്തനങ്ങളിലാകണം , അന്യോന്യമുള്ള കൂടിച്ചേരലുകളിലും, സഹാനുഭൂതിയിലും, സഹവർത്തിത്വത്തിലും, സ്നേഹത്തിലുമാകണം, അങ്ങിനെ നീ ചെയ്യുന്ന നന്മകളുടെ പുണ്യഫലങ്ങളാണ് നിനക്കും, നിൻ്റെ തലമുറകൾക്കും ഈ ജന്മം പകർന്നുകിട്ടുന്നത് . അടുത്ത ജന്മത്തിലല്ല !"

- ശ്രദ്ധിച്ചാൽ കാണാം. അതു തന്നെയാണ് അവിടെ ശബരിമലയിൽ എഴുതി വെച്ചിരിക്കുന്നതും - തത്ത്വമസി -

- അത് നീയാകുന്നു.!-

" പറഞ്ഞു വന്നാൽ ശബരിമല,   അത് യഥാർത്ഥത്തിൽ വല്ലാത്തൊരു വികാരമാണ്, അനുഭവമാണ്.

മനുഷ്യനും, പ്രകൃതിയുമായും, മനുഷ്യനും, മനുഷ്യനും ഒരിക്കലും ഒരു നേർരേഖ കൊണ്ടുപോലും വിഭജിക്കാനാകാത്ത വിധം , സകല പുണ്യപാപ ചുമടുകളും പേറി മനുഷ്യമനസ്സുകളെ ശുദ്ധീകരിച്ച് ചേർത്ത് വെയ്ക്കുന്നു ഒരു മാസ്മരിക വലയം "

"അടക്കാതെ എത്രയേറെ പ്രതിബന്ധങ്ങൾക്കിടയിലാണെങ്കിലും വീണ്ടും, വീണ്ടും മലകയറാൻ പ്രേരിപ്പിക്കുന്ന ഏതോ ഒരു പ്രകൃതിയുടെ അജ്ഞാത ശക്തി അവിടെ തങ്ങിനിൽക്കുന്നു എന്ന് ഞാൻ വിശ്വസിക്കുന്നു"

" നിങ്ങൾക്കറിയുമോ? പ്രകൃതിയും മനുഷ്യനുമായി ഇത്രയേറെ ഇടകലരുന്ന ഒരു ദൈവസങ്കൽപ്പം തന്നെ എത്ര ദിവ്യവും, പരിപാവനവുമാണ്.! മാത്രമല്ല അവിടെ ആ ദൈവമെന്ന് പറയുന്നത് നീ തന്നെയാണ് . നിൻ്റെ ചിന്തകളും, പ്രവർത്തികളും, അതല്ലങ്കിൽ നീ തന്നെയാണ് നിൻ്റെ രക്ഷയും, മോക്ഷവും, മാർഗ്ഗവും എന്ന വലിയ ഒരു ആത്മീയ ചിന്തയിൽ നിന്നൂന്നി ദർശനത്തിൻ്റെ രത്ന ചുരുക്കമാകണം പതിനെട്ടു പടി കയറി ഇരുമുടിക്കെട്ടും തലയിലേറി വരുന്ന തൻ്റെ പ്രിയപ്പെട്ട ഭക്തനോട് ഉപദേശിക്ക്കുമാർ മുന്നിൽ എഴുതി വെച്ചിരിക്കുന്ന തത്വമസി എന്ന വാചകം. "

"   ഏതെങ്കിലും, യുക്തിചിന്തയുടെ പുറത്തുനിന്നു സങ്കൽപ്പിക്കുമ്പോൾ പോലും, എത്രത്തോളം വലിയൊരു സത്യമാണത്.പ്രവൃത്തികളുടെആകെത്തുകതന്നെയല്ലേ...!പ്രവൃത്തികളും തന്നെയല്ലേ നമുക്കു ജീവിതത്തിൽ ഉടനീളം പ്രതിഫലമായി തിരിച്ചുകിട്ടുന്നത്. "

"എനിക്ക് ധനികനോ, ദരിദ്രനോ ഇല്ല... ജാതിമത വർണ്ണ ഭേദങ്ങളൊന്നുമില്ല... അവിടെ എത്തിച്ചേരുന്നവരെല്ലാം അയ്യപ്പൻമാർ മാത്രം.!"

"എന്നിട്ടും ഇവിടെ ദൈവങ്ങളുടെ പേരിലും, ജാതി മതങ്ങളുടെ പേരിലും ഇന്ന് മനുഷ്യൻ സ്വയം തലതല്ലിച്ചാകുമ്പോഴും , തനിക്കു പ്രിയപ്പെട്ട ഭക്തജനങ്ങളെ ചേർത്തു നിർത്തുവാനും, ഏവരേയും മനുഷ്യരായിക്കുവാനും നന്മ ചൊരിയുന്ന ആ പ്രഭാവലയത്തെ ആർക്കാണ് ഹൃദയത്തിലേറ്റുവാനാകാതിരിക്കുക! "   

മാത്രമോ, ഹിന്ദു ദൈവമായി ആരാധിക്കപ്പെടുന്ന അയ്യപ്പൻറെ ആത്മ മിത്രം ആരാണ്...? മുസൽമാനായ വാവർ.!

 രാജ്യത്താകമാനം, ഇപ്പോഴും ജാതിമത സംഘർഷങ്ങൾ ഉച്ചസ്ഥായിയിലെത്തി നിൽക്കുമ്പോഴും, എന്നും മത നിരപേക്ഷതക്ക് പേരുകേട്ട കേരളത്തിൽ, മുസ്ലീങ്ങളും, ഹിന്ദുക്കളും ചേർന്ന് പ്രാർത്ഥിക്കുന്ന ഒരിടം.! 

അതും      ഒരുപക്ഷേ, ലോകത്തു തന്നെ ആദ്യമാകും.!"

വിശ്വാസിയോ, അവിശ്വാസിയോ എന്നതുപോലുമല്ല.

" അപ്പോൾപ്പിന്നെ,ഇവിടുത്തെ യഥാർത്ഥപ്രശ്നം, അയ്യപ്പനോ, സ്വാമിയോ, ദൈവമോ, വിശ്വാസമോ ഒന്നും തന്നെയല്ല. പിന്നെയെന്താണ്...? 

നിങ്ങൾക്കിവിടെ എത്തിച്ചേരുമ്പോൾ ജീവിതത്തെ മുന്നോട്ടു നയിക്കുവാനുള്ള ഒരു ആത്മ ബലം അതല്ലങ്കിൽ ഒരു പ്രവർത്തനവും ലഭിക്കുന്നുണ്ടോ എന്താണ് പ്രശ്നം ?."

അത് നിങ്ങൾക്ക് ലഭിക്കുന്നുണ്ടങ്കിൽ നിങ്ങളുടെ ലക്ഷ്യം പൂർണ്ണമായി. കാരണം ഓരോമനുഷ്യനും ദിനംതോറും ആയിരങ്ങളും ലക്ഷങ്ങളും മുടക്കുന്നത് അവനവൻ്റെ സ്വന്തം ജീവിത സൗഖ്യങ്ങൾക്ക് വേണ്ടി മാത്രമാണ്. 

അതിനായി പലരും അവലംബിക്കുന്ന മാർഗ്ഗങ്ങൾ പലതാണന്നുമാത്രം. ചിലർ വിദേശ ഉല്ലാസയാത്ര നടത്തുന്നു, ചിലർ സുഖചികിത്സ, മറ്റു ചിലർ മദ്യപാനം. ഇങ്ങിനെ അവനവന് സുഖം തരുന്നതെന്താണോ, അതിലേയ്ക്ക് കടക്കുന്നു.!

പരിശോധിച്ചാൽ  എല്ലാത്തിൻറേയും അടിസ്ഥാനം സ്വന്തം ആത്മ സുഖം എന്നതുതന്നെ.

മകര ജ്യോതി സത്യമോ?

ഇവിടെ പറഞ്ഞു വന്നത് മകരജ്യോതിയെ സംബന്ധിച്ച തർക്കത്തെക്കുറിച്ചാണ്...! ജനകോടികളെ സാക്ഷി നിർത്തി മകര സംക്രമ ദിവസം ശബരിമലയിൽ ഉദിച്ചുയരുന്ന നക്ഷത്രത്തിന് താഴെ തെളിയുന്നജ്യോതി മനുഷ്യ നിർമ്മിതമാണോ? അതല്ല പ്രകൃതിയിലെ അത്ഭുതമാണോ എന്നതാണ് പലരുടേയും പ്രധാന തർക്കവിഷയം .

എന്തായാലും ആ കാലങ്ങളിലെല്ലാം, അവിടെ ജോലികൾക്ക് നേതൃത്വം നൽകിയിരുന്ന ഉന്നത പോലീസ് ഉദ്യോഗസ്ഥരും, ദേവസ്വം ബോർഡ് അധികൃതരും പല ഘട്ടങ്ങളിലും പലപ്പോഴും മാദ്ധ്യമങ്ങളിൽ പങ്കുവെച്ചിട്ടുള്ളത് അവിടെ ദൂരെ മലമുകളിൽ ദീപം ജ്വലിപ്പിക്കുന്നത് തന്നെയാണന്ന്.

എന്നാൽ അത് കാലങ്ങളായി തുടർന്നു പോരുന്ന ഒരു വിശ്വാസത്തിൻ്റെ ഭാഗമായതിനാൽ, അതിൻ്റെ ശാസ്ത്രീയതയെക്കുറിച്ചോ, അശാസ്ത്രീയതയെക്കുറിച്ചോ ഒന്നും ആരും ചിന്തിക്കാറില്ല. മാത്രമല്ല ശാസ്ത്രവും യുക്തിബോധവുമെല്ലാം ഇത്രയേറെ വളർന്നിട്ടും അവിടെ ഇപ്പോഴും ഭക്തജനത്തിരക്ക് ഏറിവരികയും ചെയ്യുന്നു എന്നതാണ് മറ്റൊരു യാഥാർത്ഥ്യവും!

എങ്കിൽപ്പോലും കാലങ്ങളായി തുടർന്നു വരുന്ന ഒരു സീസൺജോലി പോലെ ബുദ്ധിജീവികളും, വിമർശകരുമെല്ലാം ശബരിമല മണ്ഡലക്കാലമാകുമ്പോഴേക്കും , ശബരിമല മകരജ്യോതിയുടെ വിശ്വാസ്യതയെ ചോദ്യം ചെയ്തു കൊണ്ട് രംഗത്ത് വരുന്നതും പതിവാണ്.!

എന്നാൽ പലരും പറയുന്നതുപോലെ അത് മനുഷ്യ നിർമ്മിതമാണന്ന് തന്നെയിരിക്കട്ടെ, അത്തരക്കാർക്ക് അത്തരം അന്ധവിശ്വാസങ്ങളെ എതിർക്കുവാനും, അവിടെ പോകാതിരിക്കുവാനും , സ്വാതന്ത്ര്യമുള്ളതുപോലെതന്നെ , വിശ്വാസികൾക്ക് അവിടെ ഒത്തുചേരുവാനും , അതിൽ വിശ്വസിക്കാനുമുള്ള സ്വാതന്ത്ര്യവുമുള്ളത് ഇക്കൂട്ടർ മറക്കുന്നുണ്ടോയെന്ന് സംശയം തോന്നും !

അപ്പോഴാണ് അടുത്ത ചോദ്യം! എല്ലാവരും ചേർന്ന് ഒരു വലിയ വിശ്വാസ സമൂഹത്തെ പറ്റിക്കുകയല്ലേ ഇതുവഴി ചെയ്യേണ്ടത് ?

അതിൻ്റെ മറു ചോദ്യം, സമൂഹത്തിൽ എങ്ങിനെയാണ് വിശ്വാസികളേയും, അവിശ്വാസികളേയും തരംതിരിക്കുക യെന്നതാണ്. ?

ശാസ്ത്രത്തിന് പോലും ഇന്നും മറുപടിയില്ലാത്തതും അത്ഭുതകരമായും, അവിശ്വസനീയമായും പലതും നിലനിൽക്കുകയും, അന്വേഷണങ്ങൾ പോലും പലപ്പോഴും വഴിമുട്ടുകയും ചെയ്യുമ്പോൾ, ഓരോ മനുഷ്യ ചിന്തകളും, നേരനുഭവങ്ങളുമാകും പലരേയും പലതിലും വിശ്വസിക്കുവാനും, ആ വഴിയിലൂടെ നടക്കുവാനും, ചിലപ്പോൾ തിരിഞ്ഞു നടക്കുവാണങ്കിൽ പോലും പ്രേരിപ്പിക്കുന്നതും .

അപ്പോൾപ്പിന്നെ സ്ഥിരമായ ഒരു വിശ്വാസി- അവിശ്വാസി സമൂഹം ഭൂമിയിൽ ഒരിടത്തും ഇല്ലാതിരിക്കേ ... ആർക്ക് ആരെയാണ് പറ്റിക്കുക ?

- അപ്പോൾ യഥാർത്ഥത്തിൽ എവിടെയാണ് പ്രശ്നം? -

പ്രശ്‌നം മനുഷ്യമനസ്സുകളിൽത്തന്നെ !

 കാരണം ഏതൊരു മനുഷ്യനും എന്തെല്ലാം ചെയ്തിട്ടും, എവിടെയെല്ലാം പോയിട്ടും ഒരിക്കലും ലഭിക്കാത്ത ഒന്നുണ്ട്. അതാകട്ടെ

 ഈ ഭൂമി ഗോളത്തിൽ മനുഷ്യവാസമുളളിടത്തോളം ആർക്കും , പലപ്പോഴും ലഭിക്കാത്തതും, അത്രയേറെ മൂല്യവത്തായതുമാണ് .

- എങ്കിലും അതിന് പലരും പല പേരുകൾ നൽകി വ്യാഖ്യാനിക്കുമെങ്കിലും ഒറ്റവാക്കിൽ സമാധാനം, സ്വസ്ഥത എന്നൊക്കെയാണ് പറഞ്ഞു പോകുന്നത് -

അതല്ലെങ്കിൽ ഏതൊരു മനുഷ്യനാകട്ടെ, ജീവിതത്തിൽ എന്തെല്ലാം നേടിയാൽ തന്നെയും അത്യന്തികമായി ആഗ്രഹിക്കുന്നു

തന്നെയാണ് .

ആ വിശ്വാസത്തിൻ്റെ പേരിലായാലും, അവിശ്വാസത്തിൻ്റെ പേരിലായാലും, സ്വന്തം മനസ്സിനെ, മനുഷ്യൻ അവൻ്റെ കൈവെള്ളയിൽ ഒതുക്കുവാനും, കൊണ്ടുനടക്കുവാനും സാധിക്കുന്നുണ്ടോ എന്നതാണ് പ്രശ്നം.

അങ്ങിനെ സാധിക്കുന്ന പക്ഷം, അത്തരം ഒരു സാമൂഹിക ജീവിതത്തിൽ എവിടേയും ഒരു പക്ഷേ നിത്യ ജീവിതത്തിൽ ശരിയായ മനുഷ്യരേയും, മനുഷ്യത്വം നിറഞ്ഞ മനുഷ്യ ജീവിതങ്ങളേയും കണ്ടുമുട്ടുവാനും കഴിയും.

അപ്പോൾ ഇവിടേയും പ്രസക്തമായ ചോദ്യം ഇരുൾ മൂടിയ മനുഷ്യ ജീവിതത്തിൽ, മനസ്സിലും അൽപ്പമെങ്കിലും പ്രകാശം ചൊരിയുവാൻ ഇതെല്ലാം ഹേതുവാകുന്നുണ്ടോ എന്നതാണ് ! 

അങ്ങിനെ ഒരുപക്ഷേ, ഉണ്ടന്നാണ് നിങ്ങളുടെ ഉത്തരമെങ്കിൽ 

അത് വെറുമൊരു പ്രകാശകിരണമല്ല.!  അനേകായിരങ്ങളുടെ സങ്കടമോചനത്തിനുള്ള ഒരു ഒറ്റമൂലികൂടിയാണ്. 

സ്വയം തിരിച്ചറിവിനുള്ള ഒരുദീപനാളമാണ്.!

എന്തിന്, ലക്ഷോപലക്ഷം ജനഹൃദയങ്ങളിൽ നിന്നുള്ള ഒരിക്കലും വറ്റാത്ത അനേകം പ്രതീക്ഷകളുടെ ഒരു തിരിനാളം കൂടിയാണത്.

അതിനെ എന്തിനാണ് തല്ലിക്കെടുത്തണമെന്ന് നിങ്ങൾ രോഷംകൊള്ളുന്നത്...?

സമൂഹത്തിലോ, വീട്ടിടങ്ങളിലോ, എന്തിന് സൗഹൃദങ്ങളെന്നപേരിൽ ഇന്നറിയപ്പെടുന്ന പൊങ്ങച്ചകൂട്ടായ്മകളിലോ, പോലും യാതൊരു പരിഗണനയോ, സ്നേഹമോ, അൽപ്പം കനിവോ പോലും പ്രതീക്ഷിക്കുന്നു തരമില്ലാത്ത വിധം ഓരോ മനുഷ്യരും സ്വന്തം മതിലുകൾക്കുള്ളിൽ തീർത്തും ഒറ്റപ്പെട്ടുപോകുന്നു, ഇന്നത്തെ ഈ കെട്ടകാലത്ത്.!

 - അല്ലാതെ, ഒന്നും പ്രതീക്ഷിക്കുവാ ഇല്ല - ജീവിതം കെട്ടുപോകുവാൻ തുടങ്ങുന്ന അനേക ലക്ഷം മനുഷ്യരുടെ ഒരു അവസാന ഇടം കൂടിയാകാം, അന്ധവിശ്വാസമെന്ന പേരിൽ പലരും ആവർത്തിക്കുന്ന പലരുടെയും പലതും വിശ്വാസങ്ങളും,.!    

പക്ഷെ അതുകൊണ്ട് ഏതെങ്കിലും, വ്യക്തികൾക്കോ ​​, സമൂഹത്തിനാകുമ്പോൾ എന്തെങ്കിലും നഷ്ടങ്ങളോ, കഷ്ടപ്പാടുകളോ, അപമാനങ്ങളോ അത് വരുത്തിവെക്കാത്തിടത്തോളം കാലം,      മറ്റുള്ളവരുടെ കണ്ണുനീരൊപ്പുവാൻ നമുക്ക് തത്ക്കാലം സാധിക്കാത്തിടത്തോളം കാലം, പലതും

' എന്താണ് എന്നതല്ല... ' ' എന്തിനാണ് ' ? എന്നത് തന്നെയാകും നമ്മൾ നമ്മോട് തന്നെ ചോദിക്കേണ്ട കാലത്തേയും, പ്രസക്തമായ ചോദ്യവും.!