എന്തുകൊണ്ട് സെൽഫ് മോട്ടിവേറ്ററായിക്കൂടാ?

 എല്ലാം നമ്മുടെ ഉള്ളിൽത്തന്നെയുണ്ട്. തെറ്റും, ശരിയും, നന്മയും, തിൻമയും,ഭയവും, ധൈര്യവും... എന്നുവേണ്ട എല്ലാം.!

 സെൽഫ് മോട്ടിവേഷൻ.

എന്താണ് സെൽഫ് മോട്ടിവേഷൻറെ അടിസ്ഥാനം?

ഒരിക്കലും ഒരാൾ  ഭീരുവായോ, ധൈര്യവാനായിട്ടോ ജനിക്കുന്നതേയില്ല. അതെല്ലാം വ്യത്യസ്ഥ സാഹചര്യങ്ങളുടേയും, മനസ്സിൻറെ പ്രവർത്തനങ്ങളുടേയും ഫലം മാത്രമാണ്. കുറച്ച് പാരമ്പര്യ ഘടകങ്ങളൊഴിച്ചാൽ.

പിന്നെ എപ്പോഴാണ് മാറ്റങ്ങളുടെ തുടക്കം.? ചുഴിഞ്ഞാലോചിച്ചാൽ ഒരുപാട് ഘടകങ്ങളുണ്ടാകാം. സാമ്പത്തികം മുതൽ, ജീവിത ചുറ്റുപാടുകൾ വരെ.എങ്കിലും കനത്ത നിരാശയും, നിരന്തര ജീവിത പരാജയങ്ങളിലൂടെയുമെല്ലാം,  മനുഷ്യർ കടന്നുപോകുവാൻ തുടങ്ങുമ്പോൾ മാത്രമാണ് പലരും മോട്ടിവേഷൻ, അല്ലങ്കിൽ മോട്ടിവേഷൻ പ്രസംഗങ്ങളിലേയ്‌ക്കുമൊക്കെ തിരിയാൻ തുടങ്ങുന്നത്.

എന്നാൽ ഇത്തരം പ്രസംഗങ്ങൾ നമ്മുടെ ജീവിതത്തിൽ എന്തെങ്കിലും ചലനമുണ്ടാക്കുന്നുണ്ടോ എന്ന്ചോദിച്ചാൽ അതിനുള്ള ഉത്തരം വെറും വട്ടപൂജ്യമായിരിക്കും. ഇപ്പോൾ മോട്ടിവേഷൻ പ്രസംഗങ്ങളെല്ലാം, ഒരുപാട് രസക്കൂട്ടുകൾ നിറഞ്ഞ ഒരുപാക്കേജയാണ് പലരും അവതരിപ്പിക്കുന്നത്, വളരെ മനോഹരമായ ഒരു കലാസൃഷ്ടിയുടെ ആസ്വാദനം പോലെ തന്നെ നമ്മൾ അത് അനുഭവിച്ചറിഞ്ഞ് തിരികെ പോരുന്നു.

എന്നാൽ നല്ലൊരുമോട്ടിവേട്ടറും, ഒന്നാം തരം ഒരു സൈക്കോളജിസ്റ്റും നമ്മുടെ ഏവരുടേയും ഉള്ളിൽ മറഞ്ഞിരിപ്പുണ്ട് എന്ന് പറഞ്ഞാലോ...?

 സ്വയം മോട്ടിവേഷൻ എങ്ങിനെ?

തീർച്ചയായുമുണ്ട്. അതിന് നമ്മൾ സ്വയം തിരിച്ചറിയുക എന്നതുമാത്രമാണ് ഏക പോംവഴി. .ഒന്നാമതായി ഏതൊരു പ്രശ്നമായാലും അതിനെ വളരെ ബോധപൂർവ്വം മാറ്റിമറിക്കേണ്ടതുണ്ട് . അതിനായി ചിലതയ്യാറെടുപ്പുകളും.

 മുഖ്യമായും എല്ലാവരുടേയും ജീവിത പ്രശ്‌നങ്ങളുടെ കാതൽ ആത്മ വിശ്വാസമില്ലായ്‌മയാണ്. ഇങ്ങിനെ പോയാൽ ജീവിതം നാളെ എങ്ങിനെയായിത്തീരുമെന്നചിന്ത. സഹായിക്കാൻ ആരുമില്ലന്നതോന്നൽ, തൊഴിലിടങ്ങളിലെ സാഹചര്യങ്ങൾ, സാമ്പത്തിക പ്രതിസന്ധി ഇങ്ങിനെ നൂറുകൂട്ടം വിഷയങ്ങൾ!

ആദ്യമായി ഏതുപ്രശ്നത്തേയും സമീപിക്കുമ്പോൾ , ഈ ലോകത്തെ അനേകകോടികളിൽ ഒരാൾ മാത്രമായ നമുക്കു മാത്രമല്ല വിഷയങ്ങൾ ! അത് ലോകാരംഭം മുതൽ തുടങ്ങുന്നതും , ലോകാവസാനം വരെ നീണ്ടു പോകുന്നതുമാണ്. കാരണം പ്രപഞ്ചവും, മനുഷരും, മറ്റെല്ലാ ജീവജാലങ്ങളും എല്ലായ്‌പ്പോഴും മാറ്റങ്ങൾക്ക് വിധേയമാണ് . അപ്പോൾ  നിലനിൽപ്പിനായുള്ള പോരാട്ടങ്ങളും സ്വാഭാവികം  ! എങ്കിലും ഓരോ മനുഷ്യർക്കും സ്വന്തമായി ഒരിടവും , വെളിച്ചവും കണ്ടത്തേണ്ടതായുള്ളതിനാൽ, നമുക്ക് എന്തെല്ലാം പ്രതിസന്ധികളുണ്ടങ്കിലും അതിനെ മറികടന്ന് മുന്നോട്ടു പോയേ മതിയാകൂ !

 പണ്ടുകാലത്ത് ഓരോ   മനുഷ്യരും കാടുവെട്ടിത്തെളിച്ച് അവനവന് താമസയോഗ്യമായ സ്ഥലമൊരുക്കുന്നതുപോലെ നമ്മൾ സ്വയം നമ്മുടേതായ ഇടങ്ങൾ കണ്ടെത്തുക എന്നതാണ് ഏറ്റവും വലിയ പ്രശ്‌നവും പ്രതിസന്ധിയും , കണ്ടെത്തിയാൽ മാത്രം പോരാ, അത് മനോഹരമാക്കി തീർക്കേണ്ടതും സ്വന്തം ഉത്തരവാദിത്വം തന്നെയാണ്.

 സെൽഫ് മോട്ടിവേഷൻ.

 

അപ്പോൾ ഉത്തരവാദിത്വം കൂടുക എന്നാൽ അതിനനുസരിച്ച് നമ്മുടെ ആത്മവിശ്വാസവും കരുത്തും വർദ്ധിപ്പിക്കുക എന്നൊരു കടമ്പകൂടിയുണ്ട്. അതുതന്നെയാണ് പലരുടെയും പ്രശ്നവും, നേരിടാൻ ബുദ്ധിമുട്ടുന്നതും.

നമ്മൾ പലപ്പോഴും ഏതെങ്കിലും ഒരു വ്യക്തിയെ മാതൃകയാക്കിയോ അതല്ലങ്കിൽ എന്തെങ്കിലും പ്രത്യേക ലക്ഷ്യം മനസ്സിൽ സൂക്ഷിച്ചോ ഒക്കെയാകും ആദ്യകാലങ്ങളിൽ മുന്നോട്ടുള്ള സഞ്ചാരം.

 അപ്പോൾ സ്വാഭാവികമായും നമുക്കു മുന്നിൽ ആരാണോ സഞ്ചരിക്കുന്നത് ഒന്നുകിൽ അവരെ മുറിച്ചു കടക്കുവാനോ, അതല്ലങ്കിൽ മറ്റാരുടേയെങ്കിലും തണൽ പറ്റി നടക്കുവാനോ  ഉള്ള ചിന്താപദ്ധതികളൊക്കെയാകും ആദ്യഘട്ടങ്ങളിൽ മനസ്സിൽ ഉറപ്പിച്ചിട്ടുണ്ടാവുക.

അതുകൊണ്ട്  അത്തരം റോൾ മോഡലുകളെയും, ആരുടെയെങ്കിലും തണൽപറ്റി ജീവിതം മുന്നോട്ടു നീക്കാമെന്നുമൊക്കെയുള്ള വ്യാമോഹങ്ങളെയെല്ലാം ആദ്യമേ തന്നെ പറിച്ച് ദൂരെയെറിയുക.

 കാരണം  ഏതൊരുകാര്യത്തിനും ഈഭൂമിയിൽ നമ്മൾ ഒറ്റക്കാണ് എന്നത് തന്നെയാണ് സത്യം. രണ്ടാമതായി വിജയമായാലും, പരാജയമായാലും   സ്വന്തം കഴിവുകൾ ഉപയോഗിച്ച് സ്വയം വെട്ടിത്തെളിച്ച പാതയിലൂടെ മാത്രം മുന്നേറുക. അവിടെ നമുക്കായി  ആരോടും കടപ്പാടോ, നന്ദിയോ ഒന്നും ആവശ്യമില്ലാത്ത നമ്മുടേതായ സ്വതന്ത്രമായ ഒരുലോകം നമ്മൾ അതിനകം പണിതുയർത്തിയിട്ടുണ്ടാകും.!

ഒരിക്കലും അർഹതയില്ലാത്തത്  വെട്ടിപ്പിടിക്കാമെന്നോ  മറ്റാരുടേയെങ്കിലുമൊക്കെ ജീവിതം കണ്ടോ മഞ്ഞളിക്കേണ്ടതായ ആവശ്യമൊന്നുമില്ല. കാരണം ജീവിതം അത്രത്തോളം നിസ്സാരവും ലളിതവും, ഹൃദ്യവുമാണ്.

 നമുക്ക് അർഹതപ്പെട്ടതെന്താണോ അത് നമ്മുടെ കഴിവിനും, പ്രയത്നത്തിനുമനുസരിച്ച് നമ്മളെത്തേടിവരും. ചുരുക്കിപ്പറഞ്ഞാൽ അവനവൻറെ കഴിവും താത്പര്യവും എന്താണോ, അതിനെ കണ്ടത്തുകയും പരിപോഷിപ്പിക്കുകയും അത് ഒരു ജീവിതമാർഗ്ഗവുമാക്കി തീർക്കുക. അതാണ് ഇന്ന് ഒരു ആഗോളവിപണിപോലെ തുറന്നുവെച്ചിരിക്കുന്ന മത്സരാധിഷ്ഠിത സമൂഹത്തിൽ നമുക്ക് മുന്നേറുവാനും, സ്വസ്ഥമായി ജീവിക്കുവാനുമുള്ള മനോഹരമായ മാർഗ്ഗം.

 പലപ്പോഴും ചിലമാതാപിതാക്കളുടെ അനാവശ്യമായപല എടുത്തുചാട്ടങ്ങളും അന്വേഷണങ്ങളുമെല്ലാം കണ്ട് വളരെ അത്ഭുതപ്പെട്ടിട്ടുണ്ട്. കാരണം അവരുടെ പ്രശ്‌നം സ്വന്തം കുട്ടികൾക്ക് വളരെ പെട്ടെന്ന് ഉന്നത സ്ഥാപനത്തിൽ ഉയർന്ന ശമ്പളത്തോടെ ഒരു ഉദ്യോഗവും,  പദവിയും,  അതിനു പഠിക്കാൻ കഴിയുന്ന കോഴ്‌സുകളും, വിദ്യാഭ്യാസ സ്ഥാപനങ്ങളും ഏതാണ്  എന്നതുമാത്രമാണ് അവരുടെ അന്വേഷണം.

 സെൽഫ് മോട്ടിവേഷൻ.

 അതിനിടയിൽ അത് പഠിക്കാൻ വിടുന്ന കുട്ടിയുടെ താത്പര്യമോ, മാനസികാവസഥയോ ഒന്നും തന്നെ അവർക്കൊരു പ്രശ്നമേയല്ല.,പെട്ടെന്ന് ധനാഢ്യരാകാനും, അതുവഴി തങ്ങൾക്കും, തങ്ങളുടെ കുടുംബത്തിനും മറ്റുള്ളവരുടെ മുന്നിൽ എങ്ങിനെ തലയുയർത്തിപ്പിടിച്ച് നടക്കാമെന്നതാണ് അവരുടെ വിഷയം.

 അങ്ങിനെ  തങ്ങളുടെ മാത്രം താത്‌പര്യങ്ങൾക്കനുസൃതമായി ഒരു പ്രത്യേകതരം മോൾഡിൽ വാർത്തെടുക്കാനാഗ്രഹിച്ച പല കുട്ടികളും പിൽക്കാലത്ത് സന്യാസം പോലുള്ള ആത്മീയ വഴികളിലൂടെ എങ്ങോട്ടെന്നില്ലാതെ സഞ്ചരിക്കുന്നതും. ഒരിക്കലും സങ്കൽപ്പിക്കാൻ പോലും കഴിയാത്ത തരത്തിൽ സമൂഹത്തിലെ ഏറ്റവും മലീമസമായ വഴികളിലും കണ്ടുമുട്ടേണ്ടി വന്നിട്ടുമുണ്ട്.

 എന്നാൽ ലോകത്തെവിടെയെങ്കിലും,  അങ്ങിനെ ആരുടെയെങ്കിലും ഭാവിശോഭനമാക്കുന്ന തരത്തിലുള്ള ഒരു തൊഴിലിടമോ, ജോലി സാദ്ധ്യതയോ,  പ്രത്യേകതരം കോഴ്‌സുകളോ ഉണ്ടോ?

 ഒരുപക്ഷേ കുറേക്കാലങ്ങൾക്കുമുൻപുവരെ അങ്ങിനെ ഉണ്ടായിരുന്നിരിക്കാം, അല്ലങ്കിൽ ഏതെങ്കിലും വിധത്തിൽ അത്തരം താത്പര്യങ്ങളോടെ കയറിക്കൂടിയവരുണ്ടാകാം, എന്നാൽ ഇന്ന് അതാണോ സ്ഥിതി...? ലോകം അനുദിനം മാറിക്കൊണ്ടിരിക്കുകയും, ആധുനിക സാങ്കേതിക വിദ്യ വളർന്ന് അതിൻറെ പരമമായ ഉച്ചകോടിയിലെത്തുവാനും  ശ്രമിക്കുമ്പോൾ ലോകത്തെ ഒരു തൊഴിലിടവും ശാശ്വതമല്ലെന്നു മാത്രമല്ല. ഏതുതൊഴിലിനാണ് പ്രാമുഖ്യമെന്നതും   ഒരാൾക്കും പ്രവചിക്കുമാനുമാകില്ല. പ്രത്യേകിച്ച് ആർട്ടിഫിഷ്യൽ ഇൻറലിജൻസിൻറെ സാന്നിദ്ധ്യം  ഓരോ മേഖലയിലും കൂടുതൽ ശക്തമാകുന്ന ഈ ഒരു ലോക സാഹചര്യത്തിൽ.

 അതുകൊണ്ടാണ് കൂടുതൽ മത്സരാധിഷ്ഠിതമായ ഈ ഒരു സാമൂഹികാന്തരീക്ഷത്തിൽ നമ്മുടെ താത്പര്യവും കഴിവും സ്വയം കണ്ടെത്തുകയും,   അതിനെ  കാലത്തിൻറെ മാറ്റങ്ങൾക്കനുസൃതമായി തങ്ങളുടേതായ ഒരിടം സൃഷ്ടിച്ചെടുക്കുവാൻ പാകത്തിൽ നിർമ്മിക്കപ്പെടേണ്ടതായും വരുന്നത്. അതിൽ പരമാവധി സുഖവും, സന്തോഷവും നമുക്ക് കണ്ടെത്താനും,  സംതൃപ്തിയോടെ  മുന്നോട്ടു നീങ്ങാനുമായാൽ, നമ്മൾ എന്താണോ ജീവിതത്തിൽ സ്വപ്നം കണ്ടിരുന്നത് അതെല്ലാം നമ്മെത്തേടിവരും എന്നതു മാത്രമല്ല. അതുതന്നെയാകും നമുക്കെല്ലാവർക്കും മുന്നോട്ടു നീങ്ങുവാനുള്ള ശാശ്വതവും, എളുപ്പമുള്ള വഴിയും. 

ചുറ്റുമൊന്നുകണ്ണോടിച്ചാൽ നമുക്ക് കാണാം, മുകളിൽ വിവരിച്ച പലകാര്യങ്ങളുടേയും ഉന്നതമായ മാതൃകകൾ.

 എല്ലാ ജീവിതമാർഗ്ഗങ്ങളും അടഞ്ഞപ്പോൾ, ഒരുകടയിലെ വെറുമൊരു സെയിൽസ്മാനായി തൊഴിൽ ആരംഭിച്ച ഒരു വ്യക്തിയാണ് ഇന്ന് ലോകം മുഴുവൻ പടർന്ന് പന്തലിച്ചുകിടക്കുന്ന വലിയൊരു വ്യവസായ സാമ്രാജ്യത്തിൻറെ അധിപനായി  ലോകത്തെ തന്നെ വിസ്മയിപ്പിക്കുന്നത്. വലിയ ബിരുദാനന്തരബിരുദമോ, ബിസിനസ്സ് മാനേജ്മെന്റ് കോഴ്സുകളോ ഒന്നും അറിയാത്ത ആ മനുഷ്യൻറെ ആകെ കൈമുതൽ   പ്രാഥമിക വിദ്യാഭ്യാസം മാത്രമാണ്.

ഇന്നത്തെ   ലോകപ്രശസ്തമായ പല   മൾട്ടി നാഷണൽ   കമ്പനികളുടെ തുടക്കം പോലും    ആദ്യകാലത്ത് വളരെ ചെറിയ ഒരു ആശയത്തിലും, തുകയിൽ നിന്നുമായിരുന്നു. ഒന്നോരണ്ടോ ചെറുപ്പക്കാരുടെ ആത്മ ധൈര്യവും, താത്പര്യവും മാത്രമായിരുന്നു. ആകെയുള്ള സമ്പാദ്യം. എന്നാൽ കാലം കടന്നുപോകുന്തോറും കമ്പനി വളരെയധികം ലാഭം നേടുകയും ഷെയർമാർക്കറ്റുകളിൽ അവരുടെ ഓഹരികളുടെ മൂല്യം കൂടിവരികയും ചെയ്തു.

  ഇങ്ങിനെ ഏതൊരുകാര്യത്തിലായാലും,  അത് കലയോ, സാഹിത്യമോ കച്ചവടമോ, എന്തുതന്നെയാകട്ടെ, അത് കണ്ടെത്തുകയും, പരിപോഷിപ്പിക്കുകയും, വളർത്തിയെടുക്കുകയും ചെയ്യുക എന്നതാണ് ഓരോ വ്യക്തിക്കും അവരുടെ കാര്യത്തിൽ ചെയ്യാവുന്നത്. അതല്ലായിരുന്നുവെങ്കിൽ മലയാളികൾക്ക് ഇന്ന് ലോകം കണ്ട മികച്ച പ്രതിഭകളായ ഒരു യേശുദാസിനെയോ, രാജ്യത്തിൻറെ അഭിമാനമായ ഒരു സച്ചിൻതെണ്ടുൽക്കറേയോ, ജീവിതത്തിൻറെ കഠിനമായ വേദനകളിൽ നിന്ന് വിശ്വോത്തര ഹാസ്യം സൃഷ്ടിച്ചെടുത്ത ഒരു ചാർളി ചാപ്ളിനേയോ  കാണുവാനാകുമായിരുന്നില്ല.

 നമ്മൾ പറഞ്ഞുവന്നത് സെൽഫ് മോട്ടിവേഷനെക്കുറിച്ചായിരുന്നു. അതിൻറെ പ്രധാന ഘടകങ്ങളിലൊന്നായ സ്വയം തിരിച്ചറിവും, അതുവഴി നേടിയെടുക്കേണ്ട ആത്മവിശ്വാസവും.എല്ലാത്തിലുമുപരി സെൽഫ് ലൗ എന്ന ഒരു പ്രാക്ടീസുമുണ്ടങ്കിൽ ജീവിതം മാത്രമല്ല, ഒരുപക്ഷേ ലോകം തന്നെ കൈപ്പിടിയിലൊതുക്കുവാനും, ജീവിതത്തെ മനോഹരമായി ആ ഘോഷിക്കുവാനും ആർക്കാണ് സാധിക്കാത്തത്?

അതുകൊണ്ട് കൃത്യമായും മനസ്സിലാക്കപ്പെടേണ്ടത്,  ​​നമ്മുടെ ഓരോരുത്തരുടെയും ഉള്ളിൽ നമുക്കുവേണ്ടി മാത്രം നല്ലൊരു മോട്ടിവേറ്റർ ഉണർന്നിരിക്കുന്നുവെന്നതാണ്. അതിനാൽ  അതിനെതിരിച്ചറിഞ്ഞ് പരമാവധി ഉപയോഗപ്പെടുത്തിജീവിതം നന്നായി മുന്നോട്ടു കൊണ്ടുപോവുക എന്നതുമാത്രമാണ് നമ്മുടെ മുന്നിലുള്ള ഏകപോംവഴിയും, പ്രത്യാശയും!.