സദ്യ ഇഞ്ചിക്കറി റസിപ്പിയും; ഇഞ്ചിയുടെ ഗുണദോഷങ്ങളും.

പുളിയിഞ്ചി ഉണ്ടാക്കുന്നവിധം.

സാധാരണ സദ്യകളായാലും , ഒരു ഓണസദ്യക്കായാലും വളരെ രുചിയുള്ള ഇഞ്ചിപ്പുളി, അതല്ലെങ്കിൽ പുളിയിഞ്ചി , എന്നെല്ലാം വിളിക്കുന്ന നമ്മുടെ കേരളത്തിൻ്റെ ഒരു പരമ്പരാഗത വിഭവമായ ഇഞ്ചിക്കറി എങ്ങിനെയാണ് തയ്യാറാക്കുന്നതെന്ന് നോക്കാം.

ആവശ്യമുള്ള സാധനങ്ങൾ.

ഇഞ്ചി - ഒന്നര കപ്പ് ( ചെറുതായി അരിഞ്ഞത് ,
പുളി - നെല്ലിക്ക വലിപ്പത്തിൽ എടുത്ത് ചൂടുവെള്ളത്തിൽ ലയിപ്പിച്ചത്. 1 കപ്പ്
വെളിച്ചെണ്ണ - ആവശ്യത്തിന്
ചെറിയ ഉള്ളി, -5-6 ചെറുതായി അരിഞ്ഞത്.
പച്ചമുളക് , 2 - അരിഞ്ഞത്.
വേപ്പില,
ഉപ്പ് - ആവശ്യത്തിന്.

ആദ്യം ഒരു പാനിലേക്ക് ആവശ്യത്തിന് വെളിച്ചെണ്ണ ഒഴിച്ച് ഇഞ്ചി ഗോൾഡൻ ബ്രൗൺ നിറമാകുന്നതുവരെ, സ്റ്റൗവിൻ്റെ ഫ്ലയിം അൽപ്പം കുറച്ചു വെച്ച് വഴറ്റിയെടുക്കുക .

പിന്നീട് പാനിൽ നിന്നും അത് കോരി മാറ്റിയ ശേഷം ബാക്കി വരുന്ന വെളിച്ചെണ്ണയിൽ തന്നെ.  അരിഞ്ഞു വെച്ചിരിക്കുന്ന ചുവന്നുള്ളിയും, പച്ചമുളകും, വേപ്പിലയും ചേർത്ത് വഴറ്റുക.

ചുവന്നുള്ളി ചുവന്ന നിറമാകുമ്പോൾകോരി മാറ്റിയ ശേഷം, നേരത്തേ വഴറ്റി വെച്ചിരിക്കുന്ന ഇഞ്ചിയും, ഇപ്പോൾ വഴറ്റി കോരിയെടുത്ത ചുവന്നുള്ളിയും,  ഒരുമിച്ച് ഒരു മിക്സിയിലിട്ട് പൊടിച്ചെടുക്കുക.

ഇനി പാനിൽ, കടുക് ഇട്ട് അത്പൊട്ടിയ ശേഷം, ഒരു ടീസ്പൂൺ മുളകുപൊടി - അര ടീസ്പൂൺ മഞ്ഞൾപ്പൊടി - ലേശം ഉലുവ, കായപ്പൊടി,വേപ്പില, എന്നിവഓരോന്നായി   ചേർത്ത് ഇളക്കി മസാലകളുടെ പച്ചമണം മാറിക്കഴിയുമ്പോൾ.

അതിലേക്ക്, നേരത്തേ തയ്യാറാക്കിയ പുളിവെള്ളവും, ഒരു കപ്പ് തിളച്ച വെള്ളവുംകൂടി ഒഴിച്ച്  തിളക്കാൻ വെയ്ക്കുക.

പുളിവെള്ളം പതിയെ തിളച്ചു വരുമ്പോൾ അതിലേക്ക് മിക്സിയിൽ പൊടിച്ചുവെച്ചിരിക്കുന്ന_ ഇഞ്ചി മസാലക്കൂട്ടുകൾ ഇട്ട് നന്നായി ഇളക്കി യോജിപ്പിക്കാം.

.
അതിന് ശേഷം, കൂട്ട് കുറുകി വരുമ്പോൾ 4 ടേബിൾ സ്പൂൺ   ചിരകിവെച്ചിരിക്കുന്ന ശർക്കര ചേർത്ത് നന്നായി ഇളക്കി യോജിപ്പിക്കണം.

 ആവശ്യത്തിന് കറി വെള്ളം വറ്റി  പാകമാകുമ്പോൾ വാങ്ങി വെയ്ക്കാം.

( പ്രത്യേകം ശ്രദ്ധിക്കേണ്ടത്. ഇഞ്ചിക്കറിയുടെ പുളി അൽപ്പം മുന്നിൽ നിൽക്കുന്ന വിധമായിരിക്കണം - അതിൽ ആവശ്യത്തിനുള്ള ശർക്കരയും , ഉപ്പും ചേർക്കേണ്ടത്)

പിന്നീട് , ചൂടാറിയതിന് ശേഷം, 
 രുചിക്കൂട്ടുകൾ എല്ലാം ചേർന്ന് പിടിക്കുന്നതിന്, ഒരു ദിവസം സമയം നൽകാം. ഇനി ഇഞ്ചിക്കറി നമുക്ക് പ്രിയപ്പെട്ടവർക്ക് വിളമ്പിനൽകാം. .

ഇഞ്ചിക്കറിക്കുണ്ട് ഇത്രയേറെ ഗുണങ്ങൾ

101 കറികൾക്ക് തുല്യം

മലയാളികളുടെ സദ്യവട്ടങ്ങളിൽ ഒരു പ്രഥമസ്ഥാനമാണ് എപ്പോഴും ഇഞ്ചിക്കറിക്കുള്ളത്. മറ്റേതെല്ലാം വിഭവങ്ങൾ സദ്യയിൽ ഉൾപ്പെടുത്തിയില്ലങ്കിലും, ഇഞ്ചിക്കറിയെ മാത്രം ഒഴിച്ചു നിർത്തി ഒരു സദ്യവട്ടം ആലോചിക്കാനാവില്ല.

കാരണം ഇഞ്ചിക്കറിയെന്നാൽ 101 കൂട്ടം കറികൾക്ക് സമാനമാണന്നാണ് പഴമക്കാരുടെ മൊഴി.

 കൂടാതെ, മറ്റേതൊരു കറികളെ അപേക്ഷിച്ചും ഇഞ്ചിക്കറിയുടെ രുചി ഒന്ന് വേറിട്ടതു തന്നെ . 

പ്രത്യേകിച്ച് അതിൻ്റെ പുളിപ്പും, മധുരവും ചേർന്ന ഒരു സൂപ്പർ കോമ്പിനേഷൻ!

ഇഞ്ചിയുടെ ഗുണവും, ദോഷവും.

ഇങ്ങിനെയൊക്കെയാണങ്കിലും, ഇഞ്ചിക്കുമുണ്ട് നിരവധി ഗുണങ്ങളും, ദോഷങ്ങളും.

സദ്യ പോലുള്ള അനേകം വിഭവങ്ങൾ ഉപയോഗിച്ചുള്ള ആഹാരത്തിന് ശേഷം ഇഞ്ചിക്കറി അൽപ്പം കഴിക്കുന്നത് വയറിൽ ഗ്യാസ് പോലുള്ളവ ഉണ്ടാകാതിരിക്കാനും വയറ് വീർത്തു വരാതിരിക്കുവാനും നല്ലതാണ്.

ദഹനപ്രക്രിയ സുഗമമാക്കുന്നു.

കൂടാതെ ഇഞ്ചിയിലടങ്ങിയിട്ടുള്ള ജിഞ്ചറോൾ ദഹനരസങ്ങളെ ഉത്തേജിപ്പിക്കുകയും, ആഹാരം വേഗത്തിൽ ദഹിപ്പിക്കുന്നതിനും മികച്ചതാണ്.

ഇഞ്ചിയിലടങ്ങിയിട്ടുള്ള ആൻറി ഓക്സിഡൻറുകളും, ആൻറി ഇൻഫ്ലമേറ്ററി ഘടകങ്ങളും ശരീരത്തിൻ്റെ പ്രതിരോധശേഷി വർദ്ധിപ്പിക്കുന്നതോടൊപ്പം, ശരീരത്തിലെ അണുബാധകളിൽ നിന്ന് സംരക്ഷിക്കുകയും ചെയ്യുന്നു.

ഹൃദയാരോഗ്യത്തിന്

രക്തപ്രവാഹം സുഗമമാക്കുവാനും , കൊളസ്ട്രോളും, രക്തസമ്മർദ്ദവും കുറക്കുവാനും ഹൃദയാരോഗ്യം മെച്ചപ്പെടുത്തുവാനും സഹായിക്കുന്നു.

ഛർദ്ദിക്ക്

ഗർഭകാലത്തെ മോർണിംഗ് സിക്നസ്, അതുപോലെ ബസ്സ് യാത്രക്കിടയിലെ ഛർദ്ദി, ഇവയെല്ലാം ഒഴിവാക്കാൻ ഇഞ്ചിയോ, ഇഞ്ചി ചേർന്ന ഭക്ഷണസാധനങ്ങളോ സഹായിക്കും.

ആർത്രൈറ്റിസ് പോലുള്ള പ്രശ്നങ്ങൾ കൊണ്ടുള്ള സന്ധിവേദനയും, വേദനയും കറക്കാൻ ഇഞ്ചി നീര് പോലുള്ളവയുടെ ഉപയോഗം സാദ്ധ്യമാകുന്നു.

എന്നാൽ ഇഞ്ചിയും, ഇഞ്ചിനീരും, ഇഞ്ചിയടങ്ങിയ ഭക്ഷണപദാർഥങ്ങളും ഒരു പ്രത്യേക അളവിൽക്കവിഞ്ഞ് നിത്യേന ഉപയോഗിക്കുന്ന ശീലം നല്ലതല്ല.

 മാത്രമല്ല അത് ഗുണത്തേക്കാളേറെ ദോഷം വരുത്തിവെയ്ക്കുകയും ചെയ്യും. ഒരാൾക്ക് നിത്യേന 3 - 4 ഗ്രാം ഇഞ്ചി കഴിക്കുന്നതുകൊണ്ട് കുഴപ്പമൊന്നുമില്ലന്നാണ് കണക്കാക്കപ്പെട്ടിരിക്കുന്നത്. 

എന്നതിനാൽ അതിൽ കൂടുതായുള്ള ഉപയോഗം നിയന്തിക്കുന്നതാകും നല്ലത്.

ഇഞ്ചിക്കറി കേടുകൂടാതെ ദീർഘകാലം സൂക്ഷിക്കാം? -വായിക്കുവാൻ ഇവിടെ ക്ലിക്ക് ചെയ്യൂ.

ഇഞ്ചി; ഗുണദോഷങ്ങൾ

ഇഞ്ചിയുടെ അമിത ഉപയോഗം

നെഞ്ചെരിച്ചിലിനും, വയർ എരിച്ചിലിനും കാരണമാകാം. കൂടാതെ മൂലക്കുരു, അൾസർ പോലുള്ള അസുഖമുള്ളവരേയും ഇഞ്ചിയുടെ കൂടുതലായുള്ള ഉപയോഗം പ്രതികൂലമായി ബാധിച്ചേക്കാം.

രക്തം കട്ടപിടിക്കുന്നത് തടയാനും, നേർപ്പിക്കുവാനുള്ള കഴിവ് ഇഞ്ചിക്ക് കൂടുതലായി ഉള്ളതിനാൽ , രക്തം നേർപ്പിക്കാനുള്ള മരുന്നുകൾ കഴിക്കുന്നവർ ഇഞ്ചിയുടെ ഉപയോഗത്തിൽ ശ്രദ്ധിക്കണം.

ഷുഗർ ലെവൽ നിയന്ത്രിക്കുവാൻ ഇഞ്ചിക്ക് കഴിവുള്ളതിനാൽ , പ്രമേഹത്തിനായി മരുന്ന് കഴിക്കുന്നവർ ഇഞ്ചി കൂടുതലായി ഉപയോഗിക്കുന്നത് ഷുഗർ ലെവൽ താഴാൻ കാരണമാകും.

ഇഞ്ചിക്കറിയിൽ നല്ല രീതിയിൽ പുളിയും, എരിവും, മധുരവും ചേർന്നതിനാൽ ഇഞ്ചിക്കറിയുടെ അമിത ഉപയോഗം പ്രമേഹ രോഗികൾക്കും, അസിഡിറ്റിയുള്ളവർക്കും ബുദ്ധിമുട്ട് ഉണ്ടാക്കിയേക്കാം.