വീട് നിർമ്മാണത്തിനും മുൻപ് എന്താണ് ശ്രദ്ധിക്കേണ്ടത്..?

 വീട് നിർമ്മാണം.

വീട് നിർമ്മാണം എന്നത് ഒരു സാധാരണക്കാരനെ സംബന്ധിച്ചിടത്തോളം, എന്നും കുഴയ്ക്കുന്ന ഒരുചോദ്യം തന്നെ...!

ബജറ്റ് എത്ര...? സ്ക്വയർഫീറ്റ്...? മുറികളുടെ എണ്ണം, സൗകര്യങ്ങൾ, ഉപയോഗിക്കേണ്ട വസ്തുക്കൾ,ഇതിനെല്ലാം പുറമേ നിർമ്മാണം എങ്ങിനെ...? ആരെ ഏൽപ്പിക്കണം...? പണം എങ്ങിനെ കണ്ടെത്തും...തുടങ്ങി തുടക്കത്തിൽ നൂറുകൂട്ടം ചോദ്യങ്ങളാകും ആദ്യം കടന്നുവരിക...!

 എന്നാൽ ആരങ്കിലുമായി ചർച്ചചെയ്യാമെന്നുകരുതിയാലോ, അവരുടെ എല്ലാതാത്പര്യങ്ങളും നമ്മളിൽ അടിച്ചേൽപ്പിച്ച് ഒരുതരം ആശയക്കുഴപ്പത്തിലേയ്ക്ക് നമ്മെ തള്ളിവിടുകയും ചെയ്യും.! 

അപ്പോൾപ്പിന്നെ, സ്വന്തം നിലയ്ക്ക് കാര്യങ്ങൾ സമാധാനപരമായി ആലോചിച്ച് തീരുമാനിക്കുക എന്നതുമാത്രമേ വഴിയൊള്ളൂ.

വേണ്ടത് വ്യക്തമായ പ്ലാനിംഗ്

അതിൽ പ്രധാനപ്പെട്ട ഒരു സംഗതിയായി തോന്നിയിട്ടുള്ളത്, കുടുംബത്തിൻറെ ഒരു മൊത്തം സ്ഥിതിവിശേഷം ആദ്യം ഒന്ന് അവലോകനം ചെയ്യുക എന്നതാകും.

അതിൽ , പ്രായമായവർ, സ്ത്രീകൾ , പഠിക്കുന്ന കുട്ടികൾ ... എന്നിങ്ങിനെ തരം തിരിച്ചുള്ള കണക്കുകളാകാം...! 

 കാരണം, അച്ഛനും , അമ്മയും മാത്രമുള്ള ഉള്ള വീടാണ് എന്നിരിക്കട്ടെ . എന്നാൽ മക്കൾ സ്ഥലത്തില്ലാത്തതും,  പിന്നീട് അവർക്കു കൂടി അവകാശപ്പെട്ടതുമായ വീടാണങ്കിൽ, തീർച്ചയായും  സമീപ ഭാവിയിൽ , അവരുടെ പദവിക്കും, സാമ്പത്തിക നിലക്കും അനുസൃതമായ രീതിയിൽ അവർ ആ വീട് അവരുടെ താത്പ്പര്യ പ്രകാരവും, സൗകര്യങ്ങൾക്കനുസൃതമായും പുതുക്കിപ്പണിയുമെന്ന കാര്യം തീർച്ചയാണ്.  

അതിനാൽ  രണ്ടു പേർ മാത്രമുള്ള വീടാണെങ്കിൽ, അധികം പണം മുടക്കാതെ,  അത്യാവശ്യ സൗകര്യങ്ങളോടെ മാത്രം താമസിക്കാൻ ഉതകുന്ന വിധത്തിലുള്ള ചെറിയ ഒരു വീട് നിർമ്മിക്കുകയെന്നതാണ് ബുദ്ധി .

ബജറ്റ്

തീരെ ചെറിയ കുട്ടികളടങ്ങുന്ന കുടുംബമാണങ്കിലും, വിവാഹ പ്രായമെത്തിയ പെൺകുട്ടികളടങ്ങിയ കുടുംബമാണെങ്കിലും അവരുടെ ഭാവിയിലേയ്ക്കുള്ള ചിലവുകൾ കൂടി കണക്കുകൂട്ടിയുള്ള ബജറ്റിൻ്റെ ഒരു വിഹിതം വീട് നിർമ്മാണത്തിനായി നീക്കിവെയ്ക്കാം.

കാരണം, പലപ്പോഴും വീടു നിർമ്മാണമെന്ന ബൃഹത്തായ ഒരു പദ്ധതിയിലേക്കു കടക്കുമ്പോൾ, നമ്മുടെ ആവശ്യങ്ങൾക്കുപരി അനേകം ആർഭാട ചിന്തകൾ കടന്നു കൂടുകയും അവസാനം എല്ലാ പരിധികളും ലംഘിച്ച് പലതും വിറ്റും, കടം വാങ്ങിയും വീടു നിർമ്മാണം പൂർത്തിയാക്കാൻ ബുദ്ധിമുട്ടുന്നവരെ എവിടേയും കാണാം.

അതിനാൽ തന്നെ നമ്മുടെ ആവശ്യങ്ങളെന്തെന്ന് തിരിച്ചറിഞ്ഞ് കഴിയുന്നത്ര കടത്തിൻ്റെ പരിധികൾ കുറച്ചും കൃത്യമായ ഒരു ബജറ്റ് മുൻകൂട്ടി ഉണ്ടാക്കുകയും അതിനനുസൃതമായ വീടു നിർമ്മിക്കുകയും ചെയ്യാം. ഇല്ലാത്ത പക്ഷം അടിയന്തിരമായി കുറച്ചേറെപ്പണം മറ്റേതെങ്കിലും ആവശ്യങ്ങൾക്ക് നിനച്ചിരിക്കാതെ ചിലവഴിക്കേണ്ടതായി വന്നാൽ വീടു നിർമ്മാണം മാത്രമല്ല . ഒരുപക്ഷേ നിത്യ ജീവിതം തന്നെ പ്രതിസന്ധികളിൽപ്പെടുവാനും സാദ്ധ്യതയുണ്ട്.

മാറിമറിയുന്ന സാമൂഹ്യ സാഹചര്യങ്ങൾ 

 ഇന്നിപ്പോൾ, നിത്യ ജീവിതത്തിൽ നമുക്കാർക്കും ഉറപ്പില്ലാത്ത വിധത്തിൽ  അനു നിമിഷം മാറി മറിയുന്ന ഒരു ലോക സാഹചര്യമാണ് നിലവിലുള്ളത്.

അതിനാൽത്തന്നെ, നാളെ , എന്ത്?, എങ്ങിനെ? എന്നതെല്ലാം ഇപ്പോൾ ആരെയും സംബന്ധിച്ചുള്ള വലിയ പ്രശ്നങ്ങളാണ്.!

ആയതിനാൽ കഴിയുന്നത്ര കടം വാങ്ങാതെയും, അത്യാവശ്യ സൗകര്യങ്ങൾ എല്ലാം തന്നെയുള്ള ലോ ബഡ്ജറ്റ് വീടുകളെക്കുറിച്ചാണ് ഇപ്പോൾ പലരും ചിന്തിക്കുന്നത്. എന്തായാലും നിർമ്മാണത്തിനാവശ്യമായ ബജറ്റ് ചിന്തിച്ചുറപ്പിച്ചു കഴിഞ്ഞാൽ അടുത്തതായി നിർമ്മാണത്തിന് ആവശ്യമായ പണം കണ്ടെത്തുക എന്നതാണ്.

പണം കണ്ടെത്തൽ, ലോണുകൾ.

 പണം കണ്ടെത്തുക വലിയ പ്രയാസമുള്ള കാര്യമല്ലന്നും ബാങ്ക് വായ്പ്പകൾ യഥേഷ്ടം കിട്ടുമെന്നും പലരും പറയുമ്പോൾ തന്നെ . അതിൻ്റെ പലിശയും, കാലാവധിയും കൂടി  കൂട്ടി നോക്കുകയും അത്രയും വർഷ കാലാവധിയിൽ തടസ്സങ്ങളൊന്നുമില്ലാതെ ലോൺ ബാദ്ധ്യത തീർക്കാൻ കഴിയുമെന്ന് ഉറപ്പാക്കുകയും വേണം.

കാരണം മിക്കവാറും ബാങ്കുകളിൽ നിന്നും നൽകുന്ന ഭവന വായ്പ്പകളുടെ പലിശ നിരക്ക് ഇടയ്ക്കിടെ വർദ്ധിപ്പിക്കുന്നതും, കൂടാതെ ഒളിച്ചിരിക്കുന്ന ചില പ്രൊസസിംഗ് ചാർജുകളും, മറ്റു നിരക്കുകളുമൊന്നും ബാങ്കുകൾ നമ്മോട് പറയാത്തതിനാൽ കാലാവധി തീരുന്ന മുറയോളം നിലവിൽ അടക്കുന്നതുകയോ,  അതിൽ കൂടുതലോ തന്നെ അടക്കേണ്ടിവരുമെന്നതും വസ്തുതയാണ്.

ഇത് എഴുതുമ്പോൾ ഇപ്പോൾ പുറത്തുവരുന്ന വാർത്തകൾ പ്രകാരം വായ്പ്പകൾക്കുള്ള പലിശ നിരക്കുകൾ ഇനിയും ഉയരുമെന്ന് തന്നെയാണ്.!

 അതിനാൽ, വീട് നിർമ്മാണം പോലുള്ളവയ്ക്ക്  വളരെ കൂടിയ തുകകൾ വായ്പ്പയായി വാങ്ങുമ്പോൾ ശ്രദ്ധാപൂർവ്വമല്ലാത്ത പക്ഷം , ഒരു മനുഷ്യജീവിതത്തിൻറെ മുഴുവൻ അധ്വാനവും മറ്റുള്ളവർക്കായി പണയപ്പെടുത്തേണ്ടി വരികയും, അവസാനം, മുഴുവൻ വിയർപ്പും നൽകി പടുത്തുയർത്തിയ കിടപ്പാടം പിന്നീടൊരിക്കൽ മറ്റുള്ളവരുടേതായി മാറുകയും ചെയ്യുന്ന  ഹൃദയഭേദകമായ കാഴ്ചകൾക്കാണ് നാം പലപ്പോഴായി സാക്ഷ്യം വഹിക്കേണ്ടി വരുന്നത്. ...!

 അതിനാൽ നല്ല ഉറച്ച ആത്മവിശ്വാസം ഉണ്ടങ്കിൽ മാത്രം വലിയ വായ്പ്പകൾ എടുക്കുവാൻ ശ്രമിക്കുകയും, എടുക്കുന്ന തുകയുടെ ഇരട്ടിയിൽ കൂടുതലാണ് അടവുതുക  എന്ന ബോദ്ധ്യത്തിലുമാകണം വായ്പ്പാത്തുകകളെ സംബന്ധിച്ച് ചിന്തിച്ചു തുടങ്ങുവാനും ! 

കൂടാതെ ഇത്തരം സാമ്പത്തിക കാര്യങ്ങളിലും വീടു നിർമ്മാണ ഘട്ടത്തിലും ആരാണോ പണം മുടക്കുന്നത് അവരുടെ മാത്രം തീരുമാനത്തിൽ കാര്യങ്ങൾ കുടുംബാംഗങ്ങളുമായി ചർച്ച ചെയ്ത് മുന്നോട്ട് പാേകുന്നതുമാകും നല്ലത്.

കാരണം വീട് എന്നത് അവിടെ താമസിക്കുന്നവരുടെ മാത്രം താത്പര്യങ്ങൾ സംരക്ഷിക്കപ്പെടുവാൻ മാത്രമുള്ളതാണ്.

വേണമെങ്കിൽ ലോൺ എടുത്തുള്ള ഒരു വീടു നിർമ്മാണത്തിന്, താത്പര്യമില്ലാത്തവർക്ക് ,വളരെ ചെറിയ സമ്പാദ്യങ്ങളെ ആശ്രയിച്ചും ഘട്ടം ഘട്ടമായി വീടുനിർമ്മാണം നടത്തി മുന്നോട്ടു പോകാവുന്നതാണ്. 

 ഇക്കാര്യത്തിൽ ഒരുവേള, ഒരു പഴയ തലമുറ ശീലങ്ങളെ വേണമെങ്കിൽ മാതൃകയാക്കാവുന്നതുമാണ്. കാരണം, കുറച്ചുകൂടി പഴയതലമുറകളിലേയ്ക്ക് ഓർമ്മകളെ പിന്നോട്ടുവലിച്ചാൽ, കാണാവുന്ന ഒരു മനോഹര ദൃശ്യം, അക്കാലങ്ങളിൽ വളരെ തുച്ഛമായ വരുമാനത്തിനിടയിലും, അവർ ജീവിതം വളരെ   മനോഹരമായി തന്നെ മുന്നോട്ടു കൊണ്ടുപോയിരുന്നു എന്നതാണ്. എന്നാൽ എന്താണ് ആ രഹസ്യത്തിൻ്റെ പിന്നാമ്പുറമെന്ന് അന്വേഷിച്ചാൽ, കിട്ടുന്ന വരുമാനത്തിനനുസൃതമായി ജീവിതത്തെ ക്ലിപ്തപ്പെടുത്തുക എന്നതു മാത്രമായിരുന്നു !

അതായത് ഇപ്പോൾ പുറത്തുവരുന്ന ചില റിപ്പോർട്ടുകൾ ,വീടു നിർമ്മാണ വായ്പ്പകളും, വിവാഹ ആവശ്യങ്ങൾക്കായി എടുക്കുന്ന വായ്പ്പകളും ഒരു ഇടത്തരം മലയാളിയുടെ ജീവിതാവസഥയെ പാടെ തകിടം മറിക്കുന്നുവെന്നതാണ്. 

എന്തായാലും, ഏതെല്ലാം ഉദാഹരണങ്ങൾ ചൂണ്ടിക്കാട്ടിയാലും സാമ്പത്തിക സമാഹരണത്തിന്, കുറച്ചുകൂടി നല്ല ഒരു ഓപ്ഷനായി പലപ്പോഴും  തോന്നിയിട്ടുള്ളത് ഗ്രൂപ്പ് നിക്ഷേപമെന്നപേരിൽ അറിയപ്പെടുന്നചിട്ടികളാണ്. 

ചിട്ടികൾ

അതിൻറെ ഏറ്റവും വലിയ മെച്ചമായി അനുഭവപ്പെട്ടിട്ടുള്ളത്, അടവുഗഡുക്കൾ ഏതെങ്കിലും ഘട്ടത്തിൽ മുടങ്ങിയാൽ തന്നെയും ,പലിശയും, കൂട്ടുപലിശയും, പിഴപ്പലിശകളുമെല്ലാം ചേർന്ന് ഉറക്കം കെടുത്തുന്ന ദുർഭൂതത്തെ ഭയക്കേണ്ട  എന്നതാണ്.

അങ്ങിനെ , എന്തായാലും പണം കടം വാങ്ങി വീടു നിർമ്മിക്കേണ്ടതില്ലന്ന് തീരുമാനിച്ചാൽ,  അപ്പപ്പോൾ കിട്ടുന്നതും, സ്വരൂപിച്ചതും, ചെറു  കൈ വായ്പ്പകളുമായി  ലഭിച്ചതുമായ തുകകൾ ഉപയോഗിച്ച് വീടു നിർമ്മാണം ആരംഭിക്കാവുന്നതാണ്.  

നിർമ്മാണം 

നിർമ്മാണം കാരാറുകാരെ ഏൽപ്പിച്ച് മാറി നിൽക്കുന്നതിലും നല്ലത്. അതിനാവശ്യമായ സമയം കണ്ടത്തുകയും, പരിചയമുള്ള വിദഗ്ധ തൊഴിലാളികളുടെ മേ ൽ നോട്ടത്തിൽ ഘട്ടമായുളള  കരാർ അടിസ്ഥാനത്തിലോ അല്ലാതെയോ ചെയ്യിക്കാവുന്നതുമാണ്.

പ്ലാൻ, എസ്റ്റിമേറ്റ്, ബജറ്റ്

എങ്കിലും നിർമ്മാണത്തിന് മുൻപുള്ള പ്ലാൻ, എസ്റ്റിമേറ്റ്, ബജറ്റ് എന്നിവയെല്ലാം കണക്കുകൂട്ടുമ്പോൾ തന്നെ വീടിൻ്റെ പൂർണ്ണമായ ഒരു ചിത്രം വീട്ടുടമയുടെ മനസ്സിൽ ഉണ്ടാകണം. 

അത് പരമ്പരാഗത ശൈലിയാണോ, ആധുനിക രീതികളാണോ എന്നെതെല്ലാം മുൻകൂട്ടിത്തന്നെ തീരുമാനിച്ചുറപ്പിക്കുക.

കാരണം എങ്കിൽ മാത്രമേ നിർമ്മാണത്തിന് ആവശ്യമായ വസ്തുക്കൾ തരം തിരിച്ച് കണ്ടെത്തുവാനും, മുൻകൂട്ടി വില പറഞ്ഞ് ഉറപ്പിക്കാനും കഴിയൂ.

ഉദാഹരണത്തിന് വീട് വെട്ടുകല്ലുകൾ ഉപയോഗിച്ച് നിർമ്മിക്കണമോ, അതല്ല സിമൻ്റ് ഇഷ്ടികകളാണോ, അതൊന്നുമല്ല മറ്റേതെങ്കിലുമാണങ്കിൽകൂടി,കഴിയുന്നതും അധികം ദൂരെയല്ലാതെയും, പ്രകൃതി സൗഹാർദവുമായ വസ്തുക്കൾ തിരഞ്ഞെടുക്കുന്നതും നന്നായിരിക്കും.

നിർമ്മാണ സാമഗ്രികളുടെ തിരഞ്ഞെടുപ്പ്

എന്തായാലും,  വീടുനിർമ്മാണത്തിനായി    ഏതു തരം  സാധനസാമഗ്രികളോ, നിർമ്മാണ ശൈലിയോ അവലംബിച്ചാൽ തന്നെയും,  എല്ലാത്തിനും, ഒരുതരത്തിൽ, അല്ലങ്കിൽ മറ്റൊരു വിധത്തിൽ, അതിൻറേതായ ഗുണങ്ങളും, ദോഷങ്ങളുമുണ്ടന്നുള്ളതും യാഥാർത്ഥ്യമാണ്.

നിർമ്മാണശൈലിയുടെ കാര്യത്തിലാണങ്കിൽ, വീട് നിർമ്മിക്കുന്നവരുടെ, ജീവിതശൈലികളും, വീട് നിർമ്മിക്കാൻ ഉദ്ദേശിക്കുന്ന സ്ഥലത്തിൻറെ പ്രത്യേകതകളും തന്നെയാണ്  മുഖൃമായും ശ്രദ്ധിക്കേണ്ടത്. 

അടുത്തതായി, ഉപയോഗിക്കുന്ന വസ്തുക്കളെക്കുറിച്ചുള്ള ഒരു പഠനമാണ്. അതിൽ പ്രധാനമായും മനസ്സിലാക്കേണ്ടത്, ഒരേ സാധനങ്ങൾക്കുതന്നെ പലയിടങ്ങളിലും പലവിലകൾ ആണെന്നുള്ളതാണ്. അതായത് ഉപഭോക്താവിൻറെ ഔചിത്യം നന്നായി മനസ്സിലാക്കിയ ശേഷം പല വിലകൾ ഈടാക്കി കച്ചവടം നടത്തുന്നു  എന്നത് തന്നെ ! 

എന്തായാലും, ഏതുതരം പർച്ചേയ്‌സുകളും കഴിയുന്നതും, ഇടനിലക്കാരെ ഒഴിവാക്കി, വിശ്വാസവും, പരിചയമുള്ളവരിൽ നിന്നും ഡിസ്‌കൗണ്ട് ഉൾപ്പടെ ചോദിച്ചു വാങ്ങാൻ ശ്രമിച്ചാൽ കൂടുതൽ നല്ലത്.

 ഇപ്പോൾ കൂടുതലായി മരങ്ങൾ ഒഴിവാക്കി,കോൺക്രീറ്റ് അല്ലങ്കിൽ അലൂമിനിയം, സ്റ്റീൽ എന്നിവഉപയോഗിച്ചുള്ള വാതിൽ , ജനൽ ഫ്രൈമുകളുമൊക്കെയാണ് പലയിടങ്ങളിലും ഉപയോഗിക്കുന്നത്. ഒരുപരിധിവരെ ,ചിലവുകൾ പരമാവധികുറക്കുവാനും, ചിതൽ ശല്യം ഇല്ലാതാക്കുവാനും, ഭാവിയിൽ വരാവുന്ന അറ്റകുറ്റപ്പണികൾ ഒഴിവാക്കുവാനും അത്തരം രീതികൾ പര്യാപ്തമായിട്ടാണ് തോന്നിയിട്ടുള്ളത്.

അതുപോലെ തന്നെ, പെയിൻറിംഗ്, ഇൻറീരിയർ തുടങ്ങിയവയിലും, ആഡംബരം പൂർണ്ണമായും ഒഴിവാക്കുകയും, നമ്മുടെ വരുമാനത്തിനും, ആവശ്യങ്ങൾ കണ്ടറിഞ്ഞും മാത്രം പണം ചിലവഴിക്കുവാൻ തീരുമാനിക്കുകയും ചെ യ്താൽ വീടുനിർമ്മാണത്തിൽ വലിയ ഒരു തുക ഇന്നത്തെ സാഹചര്യത്തിൽ നമുക്ക് ലാഭിക്കുവാനും, യാതൊരുവിധ ടെൻഷനുകളുമില്ലാതെ പണിപൂർത്തീകരിക്കുവാനും സാധിക്കും.

 എന്തായാലും വീട് നിർമ്മാണത്തിന് ഇറങ്ങിത്തിരിക്കും മുൻപ് വ്യക്തമായ കാഴ്ച്ചപ്പാടും, പ്ലാനിങ്ങുമുണ്ടങ്കിൽ നമ്മുടെ ബജറ്റിന് അനുസൃതമായ വീടുകൾ ഏറ്റവും ചിലവ് കുറച്ചും , ടെൻഷൻ ഇല്ലാതെയും, വളരെ നല്ല രീതിയിൽ പൂർത്തീകരിക്കുവാനും, സമാധാനത്തോടും സന്തോഷത്തോടും കൂടെത്തന്നെ അതിൽ കഴിയുവാൻ സാധിക്കുമെന്നു തന്നെയാണ് ഈ രംഗത്തെ വിദഗ്ധരുടെ അഭിപ്രായവും .