എറണാകുളം ജില്ലയിൽ മനോഹരങ്ങളായ നിരവധി ബീച്ചുകളുണ്ടങ്കിലും, എന്തുകൊണ്ടോ നിരവധി ആളുകൾ വന്നുകൂടുന്നതും, താമസിക്കുന്നതും, പണംചിലവഴിക്കുന്നതുമെല്ലാം ചെറായി ബീച്ചിലാണ്. ഒരുപക്ഷേ സുനാമിയ്ക്കും മുൻപേ വളരെ വിശാലമായ കടൽത്തീരമുണ്ടായിരുന്നതും, നവീകരിക്കപ്പെട്ടതും, ടൂറിസം വകുപ്പ് കൂടുതലായി അതിനെ പ്രമോട്ടു ചെയ്തതുകൊണ്ടുമാകാം അതിന് തൊട്ടടുത്തായുള്ള മനോഹരമായ നിരവധി ബീച്ചുകൾക്ക് അത്രയേറെ പ്രശസ്ഥി കൈവരിക്കുവാൻ കഴിയാതെ പോയതും.!
എന്തായാലും ഇപ്പോൾ പറഞ്ഞുവന്നത് എറണാകുളം ജില്ലയിലെ മറ്റൊരു മനോഹരമായ ബീച്ചായ മുനമ്പം ബീച്ചിനെക്കുറിച്ചാണ്.
 |
| മുനമ്പം ബീച്ച് |
എന്താണ് മുനമ്പം ബീച്ചിൻറെ പ്രത്യേകത ?
ഒന്നാമതായി അതിൻറെ ഏറ്റവും വലിയ ആകർഷകത്വം, വിശാലമായ കടൽത്തീരം തന്നെ.! കൂടാതെ വളരെയേറെ ദൂരത്തോളം കടലിലേയ്ക്കിറങ്ങിച്ചെല്ലുന്ന വിശാലമായ നടപ്പാത, അതിന് വശങ്ങളിലായുള്ള കുട്ടികളുടെ കളിസ്ഥലങ്ങളും, അതിലൂടെ കടന്നുപോകുന്ന ചെറിയ മൺപാതകളും.!
 |
| മുനമ്പം ബീച്ചിലേയ്ക്കുള്ള വിശാലമായ നടപ്പാത. |
വൈകീട്ട് അഞ്ചു മണിയ്ക്കുശേഷമാണ് അവിടെ സഞ്ചാരികൾ അധികമായി എത്തിച്ചേരുന്നത്. കാരണം ബീച്ചിലും അതിൻറെ നടപ്പാതകളിലുമെല്ലാം വെയിലും, ചൂടും അത്രയേറെ ശക്തമായാണ് പതിക്കുന്നത്. എന്നാൽ അഞ്ചുമണിയ്ക്കുശേഷം സുര്യൻ കടലിലേയ്ക്കുതാഴ്ന്നിറങ്ങുന്ന കാഴ്ച്ചയുടെ ദൃശ്യ സൗന്ദര്യം പകർത്തുവാനും, ആസ്വദിക്കുവാനും ഇതിനേക്കാൾ മനോഹരമായ ബീച്ച് ആപരിസരങ്ങളിൽ വേറെയുണ്ടോ എന്നുചോദിച്ചാൽ ഒരുപക്ഷേ ഇല്ലന്നുതന്നെ പറയേണ്ടിവരും.!
കാരണം മറ്റ് കടൽത്തീരങ്ങളിൽ അസ്തമയത്തിൻറെ സൗന്ദര്യം ഒരുപക്ഷേ ഏതെങ്കിലും ഒരു കോണിൽ നിന്നുമാത്രമാണ് ആസ്വദിക്കുവാൻ കഴിയുന്നതെങ്കിൽ, ഇവിടെ പരന്നുകിടക്കുന്ന കടൽത്തീരത്തിൻറെ ഏതുവശങ്ങളിൽ നിന്ന് നോക്കിയാലും മനോഹരമായ കാഴ്ച്ചതന്നെ.
വൈകീട്ട് അഞ്ചുമണിക്കുശേഷമാണ് ബീച്ചിലെ ഭക്ഷണശാലകളെല്ലാം തുറന്ന് പ്രവർത്തിക്കുവാനാരംഭിക്കുന്നതും, കടൽത്തീരത്തിന് ഒരു സജീവതകൈവരുന്നതും, കൂടാതെ നിരവധി ചീനവലകളും ഈ കടൽക്കാഴ്ച്ചയുടെ സൗന്ദര്യത്തിന് മാറ്റ്കൂട്ടുന്നു.
രാത്രിയാകുന്നതോടെ നടപ്പാതയിലെ നിയോൺ വിളക്കുകൾ തെളിഞ്ഞുതുടങ്ങുകയും കടലിൻറെ കനത്തഇരുളോളങ്ങളുടെ താളത്തിൽ അങ്ങ് ദൂരെ കപ്പൽ ചാനലുകളുടെ ദിക്കുകളിൽ വർണ്ണവെളിച്ചങ്ങൾ നിറഞ്ഞുവീഴുന്നതുമെല്ലാം മനസ്സിന് കുളിരേകുന്നവ തന്നെ.!
 |
| മുനമ്പം ബീച്ചിലെ വിശാലമായ കടൽത്തീരം. |
കുട്ടികളെ സംബന്ധിച്ചും എന്തുകൊണ്ടും ഇഷ്ടപ്പെടാവുന്ന ഒന്നു തന്നെയാണ് ഈ ബീച്ച്. അവർക്ക് കളിക്കാൻ ആവശ്യമായ ചെറിയ പ്ളേഗ്രൗണ്ടുകളും മിനി പാർക്കുമെല്ലാം ഉൾപ്പെടുന്നതാണ് ഈ പ്രദേശം.
കൂടാതെ വാഹനങ്ങൾക്കുപാർക്കുചെയ്യുവാൻ ആവശ്യമായ സ്ഥലവും, മണൽപ്പരപ്പിലൂടെ കുട്ടികൾക്ക് ഓടിച്ചുകളിയ്ക്കുവാൻ പാകത്തിലുള്ള ചെറിയ മോട്ടോർ കാറുകളുമെല്ലാം നമുക്കിവിടെ കാണാം
തൊട്ടടുത്തായുള്ള മുനമ്പം ഹാർബറിലേയ്ക്കു നിരനിരയായി കടന്നുപോകുന്ന നിരവധി ഫിഷിംഗ് ബോട്ടുകളും കടലിൻറെ വശങ്ങളിൽ പരന്നുകിടക്കുന്ന വലിയ കരിങ്കല്ലുകളിൽ പതിയിരിക്കുന്ന ഞണ്ടുകളും, വലിയ ചൂണ്ടകളുമായി മത്സ്യം പിടിക്കാൻ വരുന്നവരുമെല്ലാം ഇവിടുത്തെ കൗതുകക്കാഴ്ച്ചകൾ തന്നെ.
 |
| മുനമ്പം ബീച്ച് സഞ്ചാരികളെ കാത്ത്. |
കൂടാതെ ആധുനിക രീതിയിലുള്ള സ്പീഡ് ബോട്ടുകളും, ഒരുഗ്രൂപ്പിനായി കടൽ സഞ്ചാരം നടത്താവുന്ന മറ്റനേകം ബോട്ടുകളുമെല്ലാം ഈ ബീച്ചിൽ ലഭ്യമാണ്. കടൽത്തീരത്തിനും നടപ്പാതകൾക്കും ഇടയിലായി വെച്ചുപിടിപ്പിച്ചിരിക്കുന്ന അനേകം മരങ്ങളും, മുളങ്കാടുകളുമെല്ലാം, കടൽത്തീരത്തെ വെയിലിനേയും, ചൂടിനേയും പ്രതിരോധിക്കുവാൻ കഴിയുന്നതരത്തിലും, അൽപ്പസമയം കടലോരക്കാഴ്ച്ചകൾ കണ്ട് ഏകാന്തമായി ഇരിക്കുവാൻ താത്പ്പര്യപ്പെടുന്നവർക്കും അനുയോജ്യമായ വിധത്തിൽ തന്നെയാണ് നട്ടുപിടിപ്പിച്ച് നിലനിർത്തിയിരിക്കുന്നത്. എന്തായാലും പ്രകൃതി സൗന്ദര്യം പരമാവധി ആസ്വദിക്കുവാൻ കഴിയും വിധത്തിലാണ് ഈ കടൽത്തീരം സംരക്ഷിക്കപ്പെട്ടിരിക്കുന്നതെന്നുള്ളതാണ് ശ്രദ്ധേയം.!
ഇത് മുസിരിസ്സ് പൈതൃകപദ്ധതിയുടെ ഭാഗമായി ഇപ്പോൾ കേരള ടൂറിസം വകുപ്പാണ് കൈകാര്യം ചെയ്യുന്നത്. ഇതിനോട് ചേർന്നും ഏകദേശം രണ്ടോ, മൂന്നോകിലോമീറ്ററുകൾ മാത്രം മാറിയാണ് മനോഹരമായ ചെറായി, കുഴുപ്പിള്ളി, മുനയ്ക്കൽ ബീച്ചുകളും.
 |
| മുനമ്പം ബീച്ചിലെ കുട്ടികളുടെ പാർക്ക് |
കടൽത്തീരത്തിൻറേയും, മറ്റുസൗകര്യങ്ങളുടേയുമെല്ലാം അടിസ്ഥാനത്തിൽ ഏകദേശം അഴീക്കോട് മുനയ്ക്കൽ ബീച്ചും, മുനമ്പം ബീച്ചും ഒരുമിച്ചു നിൽക്കുമെങ്കിലും, വൈപ്പിൻ കുഴുപ്പിള്ളിബീച്ചും, ചെറായിബീച്ചും വ്യത്യസ്ഥമായ മറ്റൊരു കടലോരക്കാഴ്ച്ചകളായാണ് നമുക്ക് മുന്നിൽ തെളിയുന്നത്.
മുനമ്പം ബീച്ച് സന്ദർശിക്കുവാൻ വരുന്നവർക്ക്, തൊട്ടടുത്തായി ഇൻഡ്യയിലെ തന്നെ ഏറ്റവും പഴക്കമേറിയതും, പുരാവസ്തു സംരക്ഷണവകുപ്പിൻറെ കീഴിലുള്ളതുമായ 1503- ൽ പോർച്ചുഗീസുകാർ നിർമ്മിച്ച പ്രശസ്ഥമായ പള്ളിപ്പുറം കോട്ടയും കാണാം.
കൊച്ചി, എറണാകുളം പ്രദേശങ്ങളിൽ നിന്നുള്ളവർക്ക് വൈപ്പിൻ വഴിയും, തൃശ്ശൂർ, ആലുവഭാഗത്തുനിന്നും വരുന്നവർക്ക് വടക്കൻ പറവൂർ വഴി ചെറായിയിൽ എത്തിച്ചേർന്ന് അവിടെ നിന്നും വലതുഭാഗം തിരിഞ്ഞ് മുനമ്പം ബീച്ചിലേയ്ക്കും, മുനമ്പത്തെ ബോട്ടുനിർമ്മാണശാലകളും, ഹാർബറുമെല്ലാം കാണാവുന്നതുമാണ്.
Comments