സ്റ്റീലും,ഹുരുഡീസും, ഉപയോഗിച്ച് ഒരു സൂപ്പർ വീട്!

 

 സ്ഥിരമായി കാണുന്നതും, അനുവർത്തിച്ചു പോരുന്നതുമായ  പൊതുവായ ഒരു വീട് സങ്കൽപ്പങ്ങൾക്ക് എതിരാണ് മലപ്പുറം ജില്ലയിൽ വളരെ പ്രകൃതി സൗഹാർദ്ദമായും മനോഹരമായും പണി കഴിപ്പിച്ച ഈ വീട് .

വീടു സങ്കൽപ്പങ്ങൾ

പൊതുവിലുള്ള വീട് സങ്കൽപ്പങ്ങളിൽ സ്വകാര്യതയ്ക്ക് വളരെയേറെ പ്രാധാന്യം നൽകി വീടിൻ്റെ എല്ലാ ചുവരുകളും ഭദ്രമായി അടച്ചു കെട്ടി ചില സക്വയർ ബോക്സുകൾ പോലെയാക്കി തീർക്കുമ്പോൾ, ഇവിടെ അതിന് വിപരീതമായി വളരെ തുറന്ന ഇടങ്ങൾക്കാണ് കൂടുതൽ പ്രാധാന്യം നൽകിയിരിക്കുന്നത്.

മിക്കവാറും ഇപ്പോഴത്തെ

 വീടുനിർമ്മാണ രീതികളിലെ

സ്വകാര്യത എന്നുവെച്ചാൽ കുടുംബത്തിലേ തന്നെ, മറ്റാർക്കും തമ്മിൽ, തമ്മിൽ കാണുവാൻ പോലും കഴിയാത്തവിധം ഓരോരുത്തർക്കും ഓരോ ഇടമെന്നെ രീതിയിലാണ്.!

അതല്ലങ്കിൽ ഓരോരുത്തർക്കായി വിഭാവനം ചെയ്യപ്പെട്ടിരിക്കുന്ന സ്വകാര്യ ഇടങ്ങളും, കെട്ടി മറയ്ക്കപ്പെട്ട മുറികളും.!

 പിന്നീട് ആവശ്യപ്പെടുന്നത് സമ്പൂർണ്ണ , സുരക്ഷയാണ്. വീടിൻറെ സുരക്ഷയെന്നാൽ, അതായത് ഒരു ഈച്ചയോ, പ്രാണിയോ, എറുമ്പിനോ പോലും കടന്നു വരുവാൻ കഴിയാത്തവിധം പൂർണ്ണമായും കൊട്ടിയടക്കപ്പെടണം.!

ഇങ്ങിനെയൊക്കെ പലരുടേയും വീട് സങ്കൽപ്പങ്ങൾ നീണ്ടുപോകുന്ന ഒരു കാലത്തിനിടയ്ക്കാണ് മലപ്പുറം ജില്ലയിൽ പൂർണ്ണമായും, സ്റ്റീലും, ഹുറുഡീസും ഉപയോഗിച്ചു നിർമ്മിച്ച, ഈ വീട് കാണുവാൻ ഇടയായത്.

 Nature Home

സ്വഭാവ രൂപീകരണത്തിൽ വീട്ടിടങ്ങളുടെ
പ്രാധാന്യം

പലപ്പോഴും, പലകാര്യങ്ങൾക്കായി പല ദേശങ്ങൾ, വീടുകൾ , മനുഷ്യർ, ജീവിതം ഇതെല്ലാം കാണാറുണ്ടങ്കിലും ... കേരളത്തിലെ ഒരു വടക്കൻ ജില്ലയിലേക്ക് നീണ്ട ഈ യാത്രയിൽ ഈ വീടിൻറെ അനുഭവം മനം കുളിർപ്പിക്കുന്നതായിരുന്നു.! 

കയറി ചെല്ലുമ്പോൾ പൊട്ടിച്ചിരിച്ച് പൂമ്പാറ്റകളെപ്പോലെ പാറി നടന്നിരുന്ന കുട്ടികളായിരുന്നു... മുഖ്യ ആകർഷണം ! വരാനിരിക്കുന്ന അതിഥികളെ കുറിച്ച് പറഞ്ഞു കേട്ടിട്ടോ എന്തോ എന്നറിയില്ല... വളരെക്കാലത്തെ മുൻപരിചയമുള്ള പോലെയുള്ള കുട്ടികളുടെ  പെരുമാറ്റം അത്ഭുതപ്പെടുത്തി! 

ആദ്യമായി കാണുന്ന അപരിചിതത്വമെന്നുമില്ലാതെ തന്നെ ഗൃഹനാഥൻ ചോദിച്ചു " വഴി കണ്ടുപിടിക്കാൻ ബുദ്ധിമുട്ടായോ ?"

" ഇല്ല !"

" എവിടെയാ .. നാട്?" ചോദ്യം കുട്ടികളുടെ വകയായിരുന്നു...!

നാട് .. വീട് ... ജനിച്ച സ്ഥലം.. ജോലി..എല്ലാത്തിൻറേയും കതിരും , പതിരും പെറുക്കിയുള്ള ചോദ്യങ്ങൾ ...!

അവർക്ക് എല്ലാം അറിയണമായിരുന്നു.. യാതൊരു മുൻ വിധികളുമില്ലാതെ ...!

വളരെക്കാലങ്ങൾക്കു ശേഷമാണ് വീട്ടിലേക്കു കടന്നുവരുന്ന അതിഥികളുമായി ഇടപഴകുന്ന ഇത്തരം കുഞ്ഞുങ്ങളെ നേരിൽക്കാണുന്നത്.! കാരണം, ഗൃഹനിർമ്മാണ സമയത്തു തന്നെ അവർക്കു വേണ്ടി മുൻകൂട്ടി തയ്യാറാക്കി വെയ്ക്കപ്പെട്ട തീപ്പട്ടിക്കൂടു പോലുള്ള മുറികളിൽ , മൊബൈൽ ഫോണുകൾക്കിടയിൽ മുഖം പൂഴ്ത്തി കിടക്കുന്ന ദൃശ്യങ്ങളാണ് കുറേക്കാലങ്ങളായി , എവിടെയും കണ്ടുകൊണ്ടിരിക്കുന്നത്.! 

അത്തരം വീടുകളിലെ കുട്ടികൾ അവിടെ ആരൊക്കെ വരുന്നുവോ, എന്തെല്ലാം സംസാരിക്കുന്നുവെന്നോ ഒന്നും ശ്രദ്ധിക്കാറുപോലുമില്ല. മാത്രമല്ല വളരെ ചെറുപ്രായത്തിലേ വലിയ അന്തർമുഖത്വവും ദൃശ്യമാകും. ഇനി അഥവാ വീടിന്  പുറത്തിറങ്ങിയാൽത്തന്നെ,മറ്റാരേയും ശ്രദ്ധിക്കാത്ത ഏതോ ചില അന്യഗ്രഹജീവികളെപ്പോലെയാകും അവരുടെ പെരുമാറ്റങ്ങൾ..! അതുമല്ലങ്കിൽ മറ്റുള്ളവരുടെ സാമീപ്യം തീരെ ആഗഹിക്കാത്തതു പോലെയോ ...എന്തെക്കെയോ. ആയാണ് ബോദ്ധ്യപ്പെടുക..!! പ്രത്യേകിച്ച്, നാടും, വീടും, ചുറ്റുപാടുകളേയുമൊക്കെ ഒരുപോലെ തുറന്നുകാണുകയും, കേൾക്കുകയും ചെയ്യേണ്ട ,പിന്നീടൊരിക്കലും തിരിച്ചുകിട്ടിയിട്ടില്ലന്നുറപ്പുള്ള ഈ ബാല്യകാലത്ത്.

- അതും, നെഞ്ചിടിപ്പോടെ മാത്രം കണ്ടിരുന്ന ഒരു, കോവിഡ്, കാലത്തിനു ശേഷം - ! 

വീടും കുട്ടികളുടെ കളിസ്ഥലം
 

അതുകൊണ്ട് തന്നെ ഗൃഹനാഥനോട് ചോദിച്ചു. " ഇവർക്ക്, മൊബൈൽ ഗയിമുകളിലൊന്നും താത്പര്യമില്ലേ..?"

" മൊബൈൽ കൈയിൽ വാങ്ങിയാൽ പോലും തുറന്നു നോക്കില്ല...! അവർക്കെന്തോ അതിലൊന്നും വലിയ താത്പര്യമില്ലാത്തതു പോലെ ." അവരുടെ താത്പര്യങ്ങൾ കൂടുതലായും സമപ്രായക്കാരായ കുട്ടികളുമായി അവരുടെ കുഞ്ഞുകുഞ്ഞു ആശയങ്ങൾ പങ്കുവെക്കുന്നതിലും, ചുറ്റുപാടുകളോടും, പ്രകൃതിയോടുമെല്ലാം ഇടപഴുകി തുള്ളിക്കളിക്കുന്നതിലുമൊക്കയായിരുന്നു. ചുരുക്കിപ്പറഞ്ഞാൽ വീടുതന്നെ അവരുടെ വിശാലമായ ഒരു കളിസ്ഥലം പോലെതന്നെ.

പ്രധാനമായും ഇവിടെ ഇത്രയും പറഞ്ഞുവന്നത്, മനുഷ്യരുടെ സ്വഭാവരൂപീകരണത്തിലും, പെരുമാറ്റങ്ങളിലും , ഓരോരുത്തരും, അധിവസിക്കുന്ന ഇടങ്ങൾ എത്രയേറെ പങ്കു വഹിക്കുന്നു എന്നതാണ്. 

  ഒറ്റവാക്കിൽ, ഒരുവീടിൻറെ രൂപഘടനകൊണ്ടുമാത്രം, ആവീട്ടിലെ അംഗങ്ങളെക്കുറിച്ചുള്ള ഒരു ഏകദേശ ധാരണ പലപ്പോഴും ആദ്യമായി കയറിച്ചെല്ലുന്ന ഒരാൾക്ക് ,വളരെപ്പെട്ടെന്ന് ഉണ്ടാക്കിയെടുക്കുവാൻ കഴിഞ്ഞേക്കും. ഒരു പ്രഗത്ഭ സിനിമാതാരം പറഞ്ഞതുപോലെ, "ഓരോ വീടിനും ഓരോ ഭാവങ്ങളുണ്ട്. അതുകൊണ്ടാണ് സിനിമയിലെ ഓരോ പ്രത്യേക കഥാപാത്രങ്ങളുടേയും സ്വഭാവ സവിശേഷതകൾക്കനുസരിച്ചുള്ള വീടുകൾ കണ്ടെത്താൻ, കലാ സംവിധായകൻ പണിയെടുക്കുന്നതും." 

വീട് നിർമ്മാണം

ഇവിടെ ഈ വീടിന്റെ നിർമ്മാണം പൂർണ്ണമായും, പ്രകൃതി സൗഹാർദ്ദവും, സ്റ്റീലും, ഹുറുഡീസും മാത്രം ഉപയോഗിച്ച് നിർമ്മിച്ചതാണ്. ഇടഭിത്തികൾ കഴിയാവുന്നത്ര കുറച്ച് ,തുറസ്സായ ഇടങ്ങൾ കൂടുതൽ സൃഷ്ടിച്ചിരിക്കുന്നു, നന്നായി കാറ്റും, വെളിച്ചവും കയറിപ്പോകാവുന്ന തരത്തിലുള്ള മനോഹരമായ ഡിസൈനിംഗാണ് ഇതിന്റെ പ്രധാന പ്രത്യേകത.

ഭിത്തികൾ ഇല്ലാത്ത തുറന്ന യിടങ്ങൾ.

 ഇടഭിത്തികൾ ഇല്ലാത്തതുകൊണ്ട് കുട്ടികൾക്ക് ഓടിച്ചാടിയും , മറഞ്ഞു നിന്നും , തല കുത്തിയും , സൈക്കിൾ ചവിട്ടുവാനുമെല്ലാം കഴിയുന്ന രീതിയിൽ വിശാലമായ ഇടങ്ങൾ കൂടിയാണ് ഈ വീട്!

മനോഹരമായ, കോർട്ടുയാടുകളും , ബാൽക്കണികളും , അതിനിടയിൽ തലയുയർത്തി നിൽക്കുന്ന ചെടികളും , പൂക്കളും ! എല്ലാം കൊണ്ടും വീടിൻറെ ഇൻറീരിയറും വളരെ കുളിർമയും പോസിറ്റീവ് എനർജിയുമാണ് നൽകുന്നതും.

റോഡുവക്കിൽ നിന്നും വളരെ താഴ്ന്ന ചരിഞ്ഞ് താഴെ പോകുന്നതാണ് ഈ ഭൂപ്രദേശം.   സാധാരണ രീതിയിൽ അത് നിരപ്പാക്കി, കല്ലുകെട്ടി ഉയർത്തിയതിന് ശേഷം മാത്രമേ ആ വീട് പണി ഉയർത്തുവാൻ സാധിക്കുമായിരുന്നൊള്ളൂ.

Nature Home

എന്നാൽ ഇവിടെ ഭൂമിയുടെ കിടപ്പിന് യാതൊരു മാറ്റവും വരുത്താതെ, ചരിഞ്ഞ ഭൂപ്രകൃതിയിൽ സ്റ്റീൽ ബീമുകളും, പൈപ്പുകളും, ഉപയോഗിച്ചാണ് വീടിന്റെ ഫൗണ്ടേഷൻ നിർമ്മിച്ചിരിക്കുന്നത്.

മുകളിലേക്കുള്ള ഭിത്തികൾ ഹുറുഡീസും , വി. ബോർഡും ഉപയോഗിച്ചും നിർമ്മിച്ചു..

മുകൾ വശം പൂർണ്ണമായും, താൽക്കാലികമായി ഒഴിവാക്കി ട്രസ്സ് വർക്ക് ചെയ്തിരിക്കുന്നു.!

വിശാലമായ അകത്തളവും , ഓപ്പൺ കിച്ചനും അവയ്ക്കു നടുവിലുള്ള കോർട്ട്യാർഡും തന്നെയാണ് ഈ വീടിന്റെ മുഖ്യ ആകർഷണം !

വീടിൻറെ നിർമ്മാണത്തെക്കുറിച്ച് ഗൃഹനാഥന് തുടക്കം മുതലേ വ്യക്തമായ 

ധാരണകളും, കാഴ്ച്ചപ്പാടുകളും ഉണ്ടായിരുന്നതുകൊണ്ട് തന്നെയാകണം. ഒരുപക്ഷേ , ഇതിൻറെ നിർമ്മാണം ഇത്ര മനോഹരമാക്കിതീർക്കുവാൻ സാധിച്ചതും.

"വളരെ കുറഞ്ഞ സ്ഥലത്ത് ജനങ്ങൾ തിങ്ങിപ്പാർക്കുന്ന കേരളം പോലുള്ള ഒരു ഭൂപ്രദേശത്ത് , കഴിയാവുന്നത്ര പ്രകൃതി വിഭവങ്ങൾ ചൂഷണം ചെയ്യാതിരിക്കുക ,

 പ്രകൃതിയെ ചൂഷണം ചെയ്യുന്നത് പരമാവധി ഒഴിവാക്കുകയും, പരിസ്ഥിതിക്ക് ചേരുന്ന വിധത്തിലുള്ള ഒരു നിർമ്മാണം സാദ്ധ്യമാക്കുകയും ചെയ്യുക ഇതാണ് നമ്മൾ മനുഷ്യർക്ക് വരും തലമുറയ്ക്കുവേണ്ടി ചെയ്യാൻ കഴിയുന്ന ഏറ്റവും വലിയ ത്യാഗം. കാരണം പ്രകൃതിയില്ലങ്കിൽ പിന്നെ ഏത് മനുഷ്യനാണ് ഇവിടെ ജീവിതം സാദ്ധ്യമാവുക? പലരുടേയും ധാരണ തങ്ങൾ ജീവിക്കുന്ന കാലം വരേയും മാത്രം എല്ലാം മതിയെന്നാണ്. അതെങ്ങിനെയാണ് ഇനിയും എത്രയേറെ വർഷങ്ങൾ മന്നോട്ടു കടന്നു പോകേണ്ട ലോകമാണ് ." 

പ്രകൃതി സൗഹൃദം

-പലപ്പോഴും പരിസ്ഥിതിപ്രേമം വിളിച്ചുകൂവുന്നവർ അത് കേവലം മുദ്രാവാക്യങ്ങളിൽ മാത്രമായി ഒതുക്കുമ്പോൾ, ഇവിടെ ഇതിൻറെ ഗൃഹനാഥൻ അത് എത്രയേറെ മനോഹാരിതയോടെയാണ് വിഭാവനം ചെയ്തിരിക്കുന്നത് എന്നോർത്തപ്പോൾ വലിയ സന്തോഷവും, സ്നേഹവും തോന്നി.-    

അപ്രകാരം, ഇത്തരം, ഒരു വീടിൻറെ നിർമ്മാണത്തിൻറെ ഭാഗമായി കിട്ടാവുന്ന എല്ലാ പോസിറ്റീവ് എനർജിയും, ആ വീടിൻറെ ഉൾഭാഗങ്ങളിലും, അതിൽ താമസിക്കുന്ന വ്യകതികളിലും പ്രകടമായിരുന്നു. മാത്രമല്ല അവിടെ എത്തിച്ചേരുന്ന ഏതൊരു മനുഷ്യനേയും ഉൾക്കൊള്ളുവാൻ പാകത്തിൽ വീട് ഒരുങ്ങി നിൽക്കുകയാണന്നു തന്നെ നമുക്ക് തോന്നിപ്പോകും.

ഇതെല്ലാമാണ് ആ വീട്ടിൽ കയറിച്ചെല്ലുമ്പോൾ ആർക്കും തോന്നിപ്പോകുന്ന ഒരു നേരനുഭവം.

 ഏതൊരു, വീടിൻറെ നിർമ്മാണത്തിലും , ഡിസൈനിലും , അത് നിർമ്മിക്കുന്ന വ്യക്തിയുടെ മനോനില തീർച്ചയായും നമുക്ക് കാണുവാൻ കഴിയുമെന്ന് പറയുന്നത് ഇവിടേയും വളരെ കൃത്യമാണ് .!

 Nature Home

- ഈ വീടിൻറെ മേൽക്കൂരയുടെ കോൺക്രീറ്റും. ഇടഭിത്തികളും ഒഴിവാക്കിയപ്പോൾ പലരുടേയും സംശയം, ആ വീടിൻറെ സുരക്ഷയെ കുറിച്ചായിരുന്നു.

 - പ്രത്യേകിച്ച്, ഇപ്പോൾ എന്തിനും ഏതിനും കണ്ണടച്ച് വെടിവെക്കുകയും, യാതൊരു ധാരണകളോ, ചിന്തകളോ ഇല്ലാതെ ആർക്കെതിരെയും, എന്തും വാരി വിതറുന്ന സോഷ്യൽ മീഡിയയിൽ നിന്ന് തന്നെയായിരുന്നു അത്തരം  പഴികൾ ഏറെ കേൾക്കേണ്ടി വന്നതും.-

എന്നാൽ അത്തരം ആരോപണങ്ങളോടുള്ള വീട്ടുടമയുടെ പ്രതികരണവും രസാവഹമായിരുന്നു.

"ഒരുപക്ഷേ ഒരിക്കലും വരാൻ സാദ്ധ്യതയില്ലാത്തതോ , അതല്ലങ്കിൽ എന്നെങ്കിലും ഒരിക്കൽ മാത്രം വന്നേക്കാവുന്നതോ ആയ ഒരു കള്ളനെ ഭയന്ന് നമ്മൾ , ആഗ്രഹങ്ങളും , സങ്കൽപ്പങ്ങളും , സൗകര്യങ്ങളും ഭയത്തിൻറെ കലവറയിൽ പൂട്ടി ഒരു ജീവിതം തന്നെ എന്തിന് ഹോമിക്കണം ? ഏതായാലും ആ പണിക്ക് താനില്ല " ഇതായിരുന്നു അദ്ദേഹത്തിൻറെ പ്രതികരണം!

- ഇതിനെല്ലാത്തിനുമുപരി പണവും, സമൂഹത്തിലെ പദവിയും മാത്രം ലക്ഷ്യം വെയ്ക്കുന്ന ഇക്കാലത്ത് കുട്ടികളെ പരിപാലിക്കുന്നതിനു വേണ്ടി സ്കൂൾ അദ്ധ്യാപക വൃത്തി ഉപേക്ഷിച്ച അയാളുടെ ഭാര്യയും ... ഇന്നിൻറെ മറ്റൊരു അത്ഭുതമായിരുന്നു ...!

- അതെ കുടുംബം എന്നത്

 'കൂടുമ്പോൾ ഇമ്പമുള്ളത്' എന്നതുതന്നെ. വെറും കോൺക്രീറ്റ് കൂരകൾക്കപ്പുറത്തേയ്ക്ക് എല്ലാവരും കൂടിച്ചേരുമ്പോഴുള്ള സന്തോഷത്തിൻറേയും, സ്നഹത്തിൻറേയും പരിമളം വീശുവാൻ തുടങ്ങുമ്പോൾ മാത്രമേ വീട് എന്നത് യഥാർത്ഥത്തിൽ നമ്മളെ തൃപ്തിപ്പെടുത്തുകയും, അത് ശരിയായ അർത്ഥത്തിൽ നമ്മുടേത് മാത്രമായി തീരുകയും ചെയ്യുന്നൊള്ളൂ..!.!