ഇൻറർലോക്ക് ഇഷ്ടിക, വിലയും, ഗുണനിലവാരവും.

 

ഇൻറർലോക് ഇഷ്ടിക വീടുനിർമ്മാണം.

ഇൻറർലോക് ഇഷ്ടിക 

 ഇൻറർ ലോക്ക് ഇഷ്ടികകൾ ഉപയോഗിച്ചുള്ള വീടുനിർമ്മാണം പലസ്ഥലങ്ങളിലും, വ്യാപകമാകുവാൻ തുടങ്ങിയതോടെ എല്ലാവരുടേയും ചില പ്രധാന ചോദ്യങ്ങളിൽ ഒന്ന്, ഇഷ്ടികകളുടെ വിലനിലവാരത്തെക്കുറിച്ചാണ്.. പൊതുവിൽ  ഇതിന് ഒരു ഉത്തരം പറയുക എന്നത് ഒറ്റവാക്കിൽ ശരിയല്ല.

കാരണം ഓരോ ഇഷ്ടിക നിർമ്മാതാക്കളും ഉപയോഗിക്കുന്ന മണ്ണും, അതിൽ ചേർക്കുന്ന സിമൻ്റിൻ്റേയുമെല്ലാം ഗുണനിലവാരവും, വിലയുമെല്ലാം ഏറെ വ്യത്യസ്തമായതിനാൽ പല സ്ഥലങ്ങളിലും നിർമ്മിക്കുന്ന ഇഷ്ടികകൾക്കും പല തരത്തിലുള്ള വിലയാണ് ഈടാക്കുന്നത്. 

എന്തൊക്കെയായാലും  ഇഷ്ട്ടിക നിർമ്മാണത്തിലെ പ്രധാന ഘടകമായ മണ്ണ് നിലവാരം കുറഞ്ഞതാണങ്കിലും, അതിൽ ചേർക്കുന്ന സിമൻ്റിൻറേയും, വെള്ളത്തിൻറേയുമൊക്കെ അനുപാതത്തിൽ മാറ്റം സംഭവിച്ചാലും, ആ ഇഷ്ടിക വളരെ പെട്ടെന്ന് പൊടിഞ്ഞുപോകുവാനും, വെള്ളം വീണാൽ നശിച്ചു  പോകുവാനുമുള്ള  സാദ്ധ്യത കൂടുതലാണ്.ഇപ്പോൾ ബാംഗ്ലൂരിൽ നിന്നുവരെ മേൽത്തരം മണ്ണ് കൊണ്ടുവന്ന് ഇഷ്ടിക നിർമ്മിക്കുന്ന കമ്പനികൾവരെ ഇപ്പോൾ കേരളത്തിലുണ്ട്.

സാധാരണരീതിയിൽ ഇപ്പോൾ ലഭ്യമാകുന്ന ഇഷ്ടികയുടെ അളവ് 10 ഇഞ്ച് നീളം, 8 ഇഞ്ച് വീതി, 5 ഇഞ്ച് കനം  എന്നിങ്ങിനെയാണ്.

ഇത് എഴുതുമ്പോൾ പലസ്ഥലങ്ങളിലും ഇരുപത്തിയഞ്ച് മുതൽ നാൽപ്പത് രൂപ വരെ വില നിലവാരത്തിൽ  ഇൻറർ ലോക്ക് ഇഷ്ടികകൾ ലഭ്യമാണ്. എന്നുവെച്ച് വിലകൂടിയതുകൊണ്ട് ഇഷ്ടികകൾ നിലവാരം കൂടിയതാണന്നോ, കുറഞ്ഞതുകൊണ്ട് മോശമാണന്നോ അർത്ഥമാക്കേണ്ടതുമില്ല.

ഈ ബ്ലോഗിൻറെ തന്നെ പല അദ്ധ്യായങ്ങളിലും ചൂണ്ടിക്കാട്ടിയിട്ടുള്ളതുപോലെ ഇഷ്ടികകളുടെ ഗുണ നിലവാരം ഉറപ്പു വരുത്തിമാത്രം വാങ്ങുക. അല്ലാത്തപക്ഷം  ആരെ സംബന്ധിച്ചും, ഇത്തരം വീടിൻ്റെ നിർമ്മാണം വലിയൊരു നഷ്ടക്കച്ചവടത്തിൽ മാത്രമാകും അവസാനിക്കുക.  അതിൻറെ ഏറ്റവും വലിയ ഉദാഹരണം, വളരെ ശ്രദ്ധയോടെ നിർമ്മിച്ച പലവീടുകളും മുപ്പത് വർഷങ്ങൾക്ക് ശേഷം ഇപ്പോഴും യാതൊരു കേടുപാടുകളും കൂടാതെ നിലനിൽക്കുന്നു  എന്നതുതന്നെയാണ് .

എന്താണ് പ്രധാനമായും ഇതിൻ്റെ ദൂഷ്യവശങ്ങൾ?

 എന്താണ്, ഇത്തരം ഇൻറർ ലോക്ക് ഇഷ്ടിക വീടുകളുടെ ദൂഷ്യവശം?  അതിനുള്ള പ്രധാന ഉത്തരം, മുകളിൽ സൂചിപ്പിച്ചവ തന്നെ. തിരഞ്ഞെടുക്കുന്ന ഇഷ്ടിക തന്നെയാണ് പ്രധാന ഘടകം. സിമൻ്റ് പ്ളാസ്റ്ററിംഗ് ഇല്ലാതെ തന്നെ, ഈർപ്പത്തേയും, ജലത്തേയും, പ്രതിരോധിക്കുവാൻ കഴിയുമെന്ന് ഉറപ്പു വരുത്തുകയും,. മറ്റൊന്ന്, ഇത്തരം ഇൻറർലോക് ഇഷ്ടിക വീട് നിർമ്മിച്ച് നല്ല പ്രാവീണ്യം ഉള്ളവരെ മാത്രം ഭിത്തികെട്ടുവാൻ ഏൽപ്പിക്കുകയും ചെയ്യുക. അല്ലാത്തപക്ഷം മറ്റുനിർമ്മാണ പ്രവർത്തനങ്ങൾ നടക്കുമ്പോഴോ അല്ലാതെയോ ഇഷ്ടികകൾ പുറത്തേക്ക് തള്ളിപ്പോകുവാനും, വളരെയേറെ ഇഷ്ടികകൾ ഉപയോഗശൂന്യമാകുവാനുമുള്ള സാദ്ധ്യതകൾ കൂടുതലാണ്. 

പിന്നീട് പലപ്പോഴും കണ്ടുവരുന്നത് ഇഷ്ടിക ഉപയോഗിച്ച് ഭിത്തികെട്ടിയശേഷം, അറിവില്ലായ്മകൊണ്ടോ പണമില്ലാത്തതുകൊണ്ടോ എന്നറിയില്ല. ഭിത്തിയുടെ മൂലകളും, ലിൻറിലിനോട് ചേരുന്ന ഭാഗങ്ങളും ബോർഡറുപോലെ സിമൻറുതേച്ച് ബലപ്പെടുത്താതിരിക്കുകയും, ഇഷ്ടികകൾ ചേരുന്ന ഭാഗങ്ങളിലുള്ള വിടവുകൾ ' പോയൻ്റ് ' ചെയ്യാതിരിക്കുകയും ചെയ്യുക എന്നതാണ്.

തത്ഫലമായി ഇഷ്ടികകളുടെ വിടവിൽ പ്രാണി , ഉറുമ്പ് എന്നിവ കൂടുകെട്ടി ഭിത്തി ദുർബലമാകുവാനും, ഭിത്തിയിൽ ആണിപോലുള്ളവ തറക്കുമ്പോൾ, ഇഷ്ടികകൾക്ക് വിള്ളൽ വീഴുവാനും, ഭിത്തിയുടെ മൂലകൾ തള്ളിപ്പോവാനുമുള്ള സാദ്ധ്യതകളും,ഏറെയാണ്.

മേൽപ്പറഞ്ഞ അരികുകളും, മൂലകളുമെല്ലാം സിമൻറുതേച്ച് ബലപ്പെടുത്തുകയും, വിടവുകൾ സുർക്കിയോ. പുട്ടിയോ ഉപയോഗിച്ച് നികത്തുമ്പോൾ മാത്രമാണ് ഇൻറർലോക്ക് ഇഷ്ടിക ഉപയോഗിച്ചുള്ള ഭിത്തിനിർമ്മാണം പൂർത്തിയാകുന്നൊള്ളൂ. ഭിത്തിനിർമ്മാണത്തിന് ശേഷം ക്ലിയർ വാർണിഷ് അടിക്കുന്നത് ഇഷ്ടികകൾക്ക് കൂടുതൽ ദൃഢതയും, തിളക്കവും, പൂപ്പൽ പായൽ എന്നിവയുടെ ശല്യമോ,ഇല്ലാതെ ഈർപ്പത്തിൽ നിന്ന് ഭിത്തികളെ സംരക്ഷിക്കാനും സഹായകരമാണ്. 

ഇൻറർലോക് ഇഷ്ടികയും, ഇൻറർലോക്ക് സിമൻറ് കട്ടകളും.

 എന്താണ് ഇൻറർലോക്ക്  സിമൻറ് കട്ടകളും, ഇൻറർ ലോക്ക് ഇഷ്ടിക ഉപയോഗിച്ചുള്ള വീട് നിർമ്മാണത്തിലുമുള്ള വ്യത്യാസം..?    

ഒന്നാമതായി രണ്ടും വ്യത്യസ്‌തമായ കാരണങ്ങളെ പ്രതിനിധീകരിക്കുന്നു എന്നതുതന്നെയാണ്. 

കൂടുതൽ പരിസ്ഥി സൗഹാർദ്ദമാഗ്രഹിക്കുന്നവർ മാത്രമാണ് ഇൻറർ ലോക്ക് ഇഷ്ടികകളുടെ ഉപയോക്താക്കൾ. കൂടാതെ ചൂടിനെ വളരെ നന്നായി പ്രതിരോധിക്കുകയും, സിമൻറ്, മണൽ, കോൺക്രീറ്റ് എന്നിവയുടെ ഉപയോഗം കുറയ്ക്കുകയും ചെയ്യുന്നതാണ് ഇൻറർ ലോക്ക് ഇഷ്ടികകൾ ഉപയോഗിച്ച് നിർമ്മിക്കുന്നതിൻറെ പ്രധാനകാര്യം.

ഇൻറർലോക്ക് സിമൻറ് കട്ടകൾ

     എന്നാൽ മേൽപ്പറഞ്ഞതിന് നേരെ വിപരീതമാണ് ഇൻറർലോക്ക് സിമൻ്റ് കട്ടകൾ ഉപയോഗിച്ചുള്ള നിർമ്മാണം, സിമൻ്റ്, മണൽ എന്നിവയുടെ ഉപയോഗം വളരെയേറെകുറയ്ക്കുവാനും, നിർമ്മാണ പ്രവർത്തനങ്ങൾ വളരെപെട്ടന്ന് തീർക്കുവാനും കഴിയുന്നു എന്നത് ഗുണകരമാണങ്കിൽ പോലും, ചൂടിനെ പ്രതിരോധിക്കുകയല്ല മറിച്ച് ചൂടിനെ കൂട്ടുന്നു  എന്നതാണ് പ്രധാനവ്യത്യാസം

.
 ഇപ്പോൾ ഇൻറർലോക് ബ്ലോക്കുകൾ 12 ഇഞ്ച് നീളം, 8 ഇഞ്ച് വീതി, 6 ഇഞ്ച് കനം, എന്നിങ്ങനെയുള്ള അളവുകളിൽ 40 രൂപ മുതൽ പലയിടങ്ങളിലും ലഭ്യമാണ്.