നിര നിരയായി ഭംഗിയോടെ അടുക്കി വെച്ചിരിക്കുന്ന ഇഷ്ടികകൾ, !ഇഷ്ടികൾ ഓരോന്നായി എടുത്തു നോക്കി.
എല്ലാം നല്ല ഭാരമുള്ളവ തന്നെ!
" താഴേക്ക് ഇട്ട് നോക്കിക്കൊള്ളൂ "
ഇഷ്ടിക കമ്പനി നടത്തുന്ന മാത്യൂസ് ചേട്ടൻ പറഞ്ഞു.
"അതെന്തിനാ ..?"
ഞാൻ ചോദിച്ചു
"ഒരാൾ പൊക്കത്തിൽ നിന്നും ഇഷ്ടിക താഴേക്ക് ഇട്ടു നോക്കുക. പൊടിഞ്ഞു പോകുന്നങ്കിൽ .. ഒരു കാര്യം ഉറപ്പിക്കാം. ആ ഇഷ്ടിക മോശം തന്നെ..." ! - അദ്ദേഹം പറഞ്ഞു -
- ഞാൻ ഇഷ്ടിക താഴേക്ക് ഇട്ടു നോക്കി.
ഒരനക്കവും, സംഭവിക്കാതെ അത്, വലിയൊരു ശബ്ദത്തോടെ താഴേക്കുവീണു.
കുഴപ്പമില്ല
"രണ്ടു തരത്തിൽ നമുക്ക് ഇഷ്ടികയുടെ ഗുണനിലവാരം പരിശോധിക്കാം.
ഒന്ന് . ഒരാൾ പൊക്കത്തിൽ നിന്ന് താഴേക്കിട്ട്.
പിന്നെ,
രണ്ടോ മൂന്നോ ദിവസം ജലത്തിൽ മുക്കിവെച്ച്...! അതായത് മോശം ഇഷ്ടികയാണെങ്കിൽ അത് രണ്ട് ദിവസത്തിനകം തന്നെ വെള്ളത്തിൽ കിടന്ന് പൊടിഞ്ഞു പോകും.
"ഞാനേതായാലും രണ്ട് മൂന്ന് ദിവസം വെള്ളത്തിലിട്ട് പൊടിഞ്ഞ് പോകില്ലന്ന് ഉറപ്പ് വരുത്തിയ ശേഷം മാത്രമേ ഇഷ്ടികകൾ ആവശ്യക്കാർക്ക് നൽകാറൊള്ളൂ.."
അതുകൊണ്ട് തന്നെ ഇത്ര വർഷങ്ങളായിട്ടും ഒരാൾ പോലും പരാതിയുമായി ഇതുവരെ വന്നിട്ടുമില്ല. "
- മാത്യൂസ് ചേട്ടൻ പറഞ്ഞു.
- എനിക്കത് ആദ്യത്തെ അറിവായിരുന്നു. തൊട്ടപ്പുറത്ത് കൂട്ടിയിട്ടിരിക്കുന്ന ചെങ്കൽപ്പൊടി ചൂണ്ടി അദ്ദേഹം പറഞ്ഞു. "അതിനും ഉണ്ട് ക്വാളിറ്റി പരിശോധന.
ആ കാണുന്ന ചെങ്കൽപ്പൊടി അരിച്ചെടുത്ത് അതിൽ ആവശ്യത്തിനുള്ള സിമൻറും . വെള്ളവും മിക്സ് ചെയ്ത് കമ്പ്രസ് ചെയ്തതാണ് ഇഷ്ടിക നിർമ്മിക്കുന്നത്."
"ക്വാളിറ്റിക്ക് അനുസരിച്ചും വിലയിൽ മാറ്റം വരും.. ഇത് ഇപ്പോൾ ഏകദേശം അൻപത് രൂപയിൽ താഴെയായാണ് വിൽക്കുന്നത്.
ഇതിൽ തന്നെ വലിയ കട്ടകളും , ചെറിയ കട്ടകളുമുണ്ട്. ചെറിയ കട്ടകൾക്ക് വില കുറച്ചു കൂടി കുറയും.
അതാണ് ഇടഭിത്തികളൊക്കെ കെട്ടാൻ വേണ്ടി ഉപയോഗിക്കുന്നത്..."
"ഉപയോഗിക്കുന്ന ചെങ്കൽപ്പൊടി മോശമാണങ്കിലും ചേർക്കുന്ന സിമൻ്റിൻറെ അളവിലും മാറ്റം വന്നാൽ ഇഷ്ടികക്ക് നമ്മൾ ഉദ്ദേശിക്കുന്ന ഗുണമുണ്ടാകില്ല. അതാണ് ചിലർ വെള്ളം വീണാൽ പൊടിഞ്ഞു. പോകും എന്നൊക്കെ പറയുന്നത്.!
എന്തിന്, നിങ്ങൾ ചില പ്രദേശങ്ങളിലെ ചെങ്കൽപ്പൊടി ശ്രദ്ധിച്ചിട്ടുണ്ടോ? ചിലത് മഴ പെയ്ത് നനഞ്ഞാൽ കമ്പിപ്പാരക്ക് കുത്തി ഇളക്കാൻ ശ്രമിച്ചാൽ പോലും അനങ്ങില്ല...! അത്രയാണ് ഉറപ്പ്!
അതിന് സിമൻറും വേണ്ട, ഒന്നും വേണ്ട. എന്താ ശരിയല്ലേ ..." -ആദ്ദേഹം ചോദിച്ചു -
" അല്ലങ്കിൽ നമ്മുടെ നിർമ്മാണ മേഖലയിൽ സിമൻ്റിന് ഏറിയാൽ, എത്ര വർഷത്തെ പാരമ്പര്യമുണ്ട് ?
" കൂടി വന്നാൽ അറുപതോ എഴുപതോ വർഷം... !അതിന് മുൻപുള്ള എല്ലാ വീടുകളും മൺ വീടുകളോ ചെങ്കല്ലുകളോ ഇഷ്ടികകളോ ആയിരുന്നില്ലേ ...? എന്നിട്ട് ഇത്ര വർഷമായിട്ടും ഒരു കേടുപാടില്ലാത്ത എത്രയോ പഴയ വീടുകളും ഇപ്പോഴും ഇവിടെയുണ്ട് !"
- മാത്രമല്ല... സിമൻറും, മണലും, അല്ലങ്കിൽ ഇപ്പോൾ വരുന്ന പാറപ്പൊടിയുടേയുമൊന്നും ഇതിൻറെ ഭിത്തിയുടെ നിർമ്മാണത്തിൽ ആവശ്യമില്ലാത്തതിനാൽ ചൂട് വളരെ നന്നായി തടഞ്ഞുനിർത്തുകയും, ആ ഇനത്തിൽ വരാവുന്ന വലിയ തുക കെട്ടിട നിർമാണത്തിൽ ലാഭിക്കുകയും ചെയ്യാം.!
കൂടാതെ വീടിനുചുറ്റും, ഉയരം കുറഞ്ഞ ഏതാനും മരങ്ങൾ കൂടി വെച്ചു പിടിപ്പിച്ചാൽ വീടിനകത്ത് എപ്പോഴും നല്ലതണുത്ത അന്തരീക്ഷവും നിലനിൽക്കും!
- പക്ഷെ , പ്രശ്നം അതൊന്നുമായിരുന്നില്ല. - ഇതിൻറെ മുഴുവൻ ജോലികളും ആരെയാണ് വിശ്വസിച്ച് ഏൽപ്പിക്കുക..?
തീർച്ചയായും, ഇതിൻ്റെ നിർമ്മാണത്തെക്കുറിച്ച് അറിയാത്തവരാണങ്കിൽ കാര്യങ്ങൾ തകിടം മറിഞ്ഞതുതന്നെ.!
- ഞാൻ മനസ്സിലാലോചിച്ചു -
"എന്താണ് ആലോചിക്കുന്നത്..?"
- മാത്യൂസ് ചേട്ടൻ ചോദിച്ചു -
" ... അല്ല കാര്യങ്ങൾ കണ്ട് ബോദ്ധ്യപ്പെട്ട സ്ഥിതിക്ക്, ഇത്തരം ബ്രിക്കുകൾ ഉപയോഗിച്ചു തന്നെ വീട് നിർമ്മാണം നടത്തണമെന്നുണ്ട്.
...പക്ഷെ ആരെയാണ് വിശ്വസിച്ച് ഏൽപ്പിക്കുക..?"
- എൻറെ ചോദ്യം കേട്ട് അദ്ദേഹം പൊട്ടിച്ചിരിച്ചു...എന്നിട്ട് പറഞ്ഞു - "സാറ് യഥാർത്ഥത്തിൽ ഇങ്ങിനെയൊരു വീട് നിർമ്മിക്കാൻ കാര്യമെന്താണ്?"
"അൽപ്പം പണത്തിൻറെ കുറവ്.."
" ആണല്ലോ ?... പിന്നെന്തിന് വീട് പണിക്ക് ഒരു കരാറുകാരനെ
അന്വേഷിക്കുന്നു. ?"
" ... എന്നെ സംബന്ധിച്ചിടത്തോളം എനിക്ക് ഇതിനെക്കുറിച്ച് കുറച്ച് പരിചയമില്ലായ്മയും, സമയക്കുറവുമുണ്ട്..." - ഞാൻ പറഞ്ഞു
" അതു തന്നെയാണ് സാറെ പ്രശ്നം... നമ്മുടെ ഇത്തരം കാര്യങ്ങളാണ് മറ്റുള്ളവർ മുതലെടുക്കുന്നത്..." - അദ്ദേഹം പറഞ്ഞു -
"അതിരിക്കട്ടെ... സാറ് തറ കെട്ടി കഴിഞ്ഞന്നല്ലേ പറഞ്ഞത്...?"
"അതേ !"
"പിന്നെ ഇപ്പോഴത്തെ പ്രശ്നമെന്ത്? കട്ട വെച്ച് മേലോട്ട് കെട്ടണം... അത്രയല്ലേ ഒള്ളൂ...?!"
" ..അതെ കട്ട കെട്ടിയാൽ മാത്രം പോരല്ലോ... വാർക്ക . കട്ടില, ജനൽ . വയറിംഗ് ..!?"
.ഇഷ്ടികകൾ കെട്ടിപ്പോക്കുന്നതിനൊക്കെ തീർച്ചയായും, പരിചയ സമ്പന്നരായ ആളുകൾ തന്നെ വേണം.
ബാക്കി ജോലികൾക്കെല്ലാം നാട്ടിൽ തന്നെ മികച്ച തൊഴിലാളികളില്ലേ...?
- "അതാകുമ്പോ..കുറേ അധികം പൈസ ലാഭവും കിട്ടും.. ഏറ്റവും മികച്ച സാധനങ്ങൾ ഉപയോഗിച്ച് വീടു പണിതീർക്കുകയും ചെയ്യാം...
എങ്ങിനെയായാലും വീട് നിർമ്മാണത്തിൻ്റെ ബാക്കി ജോലികൾ അവരെ തന്നെ ഏൽപ്പിക്കുന്നതാകും, കൂടുതൽ നല്ലത്.!
അതാകുമ്പോ നമ്മുടെ അഭിപ്രായങ്ങൾക്കനുസരിച്ച് പണി ചെയ്യിക്കുകയും, കൂടാതെ.. കുറേ കാലം കഴിഞ്ഞ് എന്തെങ്കിലും റിപ്പയറിംഗ് ജോലികൾ ആവശ്യമായി വന്നാൽ അവരെ തന്നെ ആശ്രയിക്കുകയും ചെയ്യാം.!
അത്യാവശ്യം ഒരു പൈപ്പ് പൊട്ടിയാൽ പോലും പ്രദേശത്തെ ജോലിക്കാരാകുമ്പോൾ, ഓടിച്ചെന്ന് വിളിച്ചാൽ കാര്യങ്ങൾ പെട്ടെന്ന് നടക്കും!, മറ്റേതാകുമ്പോൾ ..."!
- അദ്ദേഹം പൊട്ടിച്ചിരിച്ചു.-
"അല്ലാ ഞാൻ പലരുടേയും അനുഭവം കൊണ്ട് പറഞ്ഞതാ ..." !
പിന്നെ, ഇത്തരം നിർമ്മാണത്തിൽ ശ്രദ്ധിക്കേണ്ട മറ്റൊരു പ്രധാന കാര്യം,
ഭിത്തികെട്ടിപൊക്കിയശേഷം ലിൻ്റലും, മുഖ്യവാർക്കയുമൊക്കെ ചെയ്യുമ്പോൾ, അബദ്ധവശാൽ പോലും ഒരു തുള്ളി പോലും കോൺക്രീറ്റ് മിശ്രിതം കെട്ടിയിരിക്കുന്ന ഇഷ്ടികകളിൽ ഒലിച്ചു വീഴാതെ ശ്രദ്ധിക്കണം.
അഥവാ വീണാൽ തന്നെ ഉടനടി തുടച്ചുകളയുകയോ, കഴുകി കളയുകയോ ചെയ്യാത്തപക്ഷം, പിന്നീട് അത് ഒന്നും ചെയ്യാൻ കഴിയാതെ ഭിത്തി മുഴുവനായും പ്ളാസ്റ്റർ ചെയ്യേണ്ട ഗതികേടിലേക്കെത്തിച്ചേർന്ന്, അനാവശ്യമായി ഒരുപാടു സാമ്പത്തികവും, സമയനഷ്ടങ്ങൾക്കും ഇടവരും.! പിന്നീട് ഈ ചെയ്തു വെച്ചതൊക്കെ വൃഥാവിലാകും. പണിയെടുക്കാൻ വരുന്ന തൊഴിലാളികളോട് പ്രധാനമായും പറയേണ്ടതും നമ്മൾ മുഖ്യമായും ശ്രദ്ധിക്കേണ്ടതുമായ ഒരു കാര്യം അതു തന്നെയാണ്.
ഏതായാലും കട്ട കെട്ടിപ്പൊക്കുവാനുള്ള പരിചയ സമ്പന്നരായ പണിക്കാരെ ഞാൻ തരാം.
സർ, അതിനിടയിൽ കട്ടിലയും. ജനലുമെല്ലാം . മരമാണോ , സ്റ്റീൽ ആണോ ..അതുമല്ല... വാർക്കയാണോ എന്നെല്ലാം തീരുമാനിച്ചുറപ്പിച്ച് എന്നെ വിളിക്ക് ... നമുക്ക് പണി പെട്ടെന്ന് തീർക്കാം മറ്റാരേയും ഏൽപ്പിക്കാൻ നിൽക്കണ്ട... " !
- ആലോചിച്ചപ്പോൾ, അദ്ദേഹം പറഞ്ഞ പല കാര്യങ്ങളും ശരിയാണന്നു തോന്നി.
നമ്മൾ തന്നെ നേരിട്ട് ചെയ്യുമ്പോൾ നമ്മുടെ താത്പര്യങ്ങൾക്കനുസൃതമായ രീതിയിൽ വീടു നിർമ്മാണം, മുന്നോട്ടു കൊണ്ടുപോവുകയും ... കയ്യിൽ വരുന്ന പണത്തിന് യോജിച്ച രീതിയിൽ, സമയം അൽപ്പം കൂടുതലായാൽ തന്നെയും, യാതൊരു ടെൻഷനുമില്ലാതെ വീടിന് മോടി കൂട്ടുകയോ കുറക്കുകയോ അങ്ങിനെ എന്ത് വേണമെങ്കിലും ചെയ്യാമെന്നും വലിയ ഒരു മെച്ചവുമുണ്ട്.!
മാത്രമല്ല.. ഒരുമിച്ച് കടവും . വിലയും മേടിച്ച് പണം ഒന്നാകെ ഉണ്ടാക്കി ബുദ്ധിമുട്ടുക എന്ന തലവേദനയിൽ നിന്നും ഒഴിവാകുകയും ചെയ്യാം...!
ഏതായാലും, അദ്ദേഹവുമായി സംസാരിച്ചതിൽ നിന്നും ഇഷ്ടികകളുടെ ഗുണനിലവാരം എങ്ങനെ കണ്ടത്താമെന്ന് നന്നായി ബോദ്ധ്യപ്പെട്ടു, ഇനി ഭിത്തികൾ വിദഗ്ധരായ തൊഴിലാളികളെ കൊണ്ട് നിർമ്മിച്ചു കഴിഞ്ഞാൽ, ബാക്കി നിർമ്മാണ ജോലികൾ എല്ലാം സാധാരണ വീടുനിർമ്മാണം പോലെതന്നെയാണ് എന്നതുകൊണ്ട് ഇതിൽ മറ്റ് കാര്യങ്ങളെക്കുറിച്ചൊന്നും അറിയേണ്ടതില്ലന്നും, മനസ്സിലായി.
കൂടാതെ ഇഷ്ടികകൾക്ക് കൂടുതൽ ഉറപ്പും, തിളക്കവുമെല്ലാം ലഭിക്കുന്നതിനുമൊക്കെ മാർക്കറ്റിൽ ഇപ്പോൾ ഉയർന്ന നിലവാരത്തിലുള്ള വാർണീഷും ലഭ്യമാണ്.
അതുകൊണ്ട് പലരും പറഞ്ഞ് ഭയപ്പെടുത്തുന്ന പോലെ ഈർപ്പവും, പായലുമൊന്നും ബാധിക്കുമെന്ന ഭയവും ആവശ്യമില്ല.
തത്ഫലമായി, പെയിൻറിംഗ് പോലുള്ളവ ഒഴിവാക്കി ആ ഇനത്തിൽ വരാവുന്ന ഭീമമായ വലിയൊരു തുകയും ലാഭിക്കാമെന്ന മെച്ചവുമുണ്ട്.
പല സ്ഥലങ്ങളിലും ഇപ്പോൾ വലുതും ചെറുതുമായ ഒരുപാടുവീടുകൾ ഇപ്പോൾ ഇൻറർലോക് ഇഷ്ടികകൾ ഉപയോഗിച്ച് കേരളത്തിലെ വൻകിട ഭവനനിർമ്മാതാക്കൾ ഉൾപ്പടെ നിർമ്മിക്കുന്നുണ്ട്. അതിൽ ചിലർ പില്ലറുകൾ പോലും നൽകാതെ രണ്ടു നിലകെട്ടിടങ്ങളും നിർമ്മിച്ചിരിക്കുന്നതായി കണ്ടു. അതെല്ലാം ഇത്തരം വീടുകൾ നിർമ്മിക്കുവാൻ ഇറങ്ങിത്തിരിക്കുന്നവർക്ക് കൂടുതൽ ആത്മ വിശ്വാസവും, ധൈര്യവും നൽകുന്ന കാര്യം തന്നെ.
എന്തായാലും ഇതിൽ വളരെ പോസിറ്റീവായി തോന്നിയത്. തറ കെട്ടിക്കഴിഞ്ഞ ശേഷം ഏറിയാൽ ഒരാഴ്ചക്കുള്ളിൽ ഭിത്തി കെട്ടുകയും, പിന്നീട് മുകൾവശത്തെ വാർക്കയും കഴിഞ്ഞാൽ ഏകദേശം രണ്ടാഴ്ചക്കുള്ളിൽ ഒരു വീട് തയ്യാറാകും എന്നതാണ്.
കൂടാതെ ഇഷ്ടികകൾ തമ്മിൽ തമ്മിൽ ലോക്കിംഗ് സിസ്റ്റത്തിലൂടെ വളരെ പെട്ടെന്ന് കെട്ടി ഉയർത്തുന്നതിനാൽ ഇതിൻ്റെ നിർമ്മാണത്തിന് അൽപ്പം പോലും, സിമൻ്റോ - മണലോ ആവശ്യമില്ലന്നുള്ളതും വലിയ ലാഭം തന്നെയാണ്.
അതിനാൽ തന്നെ കയ്യിലുള്ള പണമുപയോഗിച്ച് വീടിൻ്റെ സ്കെൽട്ടൺ തയ്യാറായാൽ പിന്നീട് വളരെ സൗകര്യപ്രദമായി ആലോചിക്കാം അത് ലോ- കോസ്റ്റ് വേണോ, ഹൈ കോസ്റ്റ് വേണോ എന്നത്!
എന്തായാലും, അന്നേ ദിവസം മാത്യൂസ് ചേട്ടനെ കണ്ടത്തിയതിന് ദൈവത്തോട് നന്ദി പറഞ്ഞ് അവിടെ നിന്നും നിറഞ്ഞ മനസ്സോടെ തന്നെ പടിയിറങ്ങി.
അഭിപ്രായങ്ങള്