തിരിച്ചറിയണം ടോക്സിക് ബന്ധങ്ങളെ.

 ഏതുതരം ബന്ധങ്ങളിലായാലും, അതൊരുടോക്സിക് റിലേഷൻ ഷിപ്പായി ബോദ്ധ്യപ്പെടുവാൻ തുടങ്ങിയെങ്കിൽ അതിൽ നിന്നും വിടുതൽ നേടുകയോ, അതല്ല,.... അതിനു കഴിയില്ലയെങ്കിൽ ,ക്രമേണ ഒരു അകലം, പാലിച്ച് മാറിനിൽക്കുവാൻ ശ്രമിക്കുകയോ ഒക്കെയാകും ഉചിതം. അല്ലാത്തപക്ഷം അത് വലിയൊരു ദുരന്തത്തിലോ അതുമല്ലങ്കിൽ തീർത്തും അസഹനീയമായ രീതിയിൽ ഒരുപക്ഷേ ഒരു ജീവിതകാലമത്രയോ, യാതൊരു സ്വസ്ഥതയും ഇല്ലാത്ത വിധം അലട്ടിക്കൊണ്ടിരിക്കും.!

ടോക്സിക് റിലേഷൻഷിപ്പ്

എന്താണ് ഈ ടോക്സിക് റിലേഷൻ ഷിപ്പ്...?

 അതിന് ഒറ്റവാക്കിൽ ഉത്തരം പറയുക എന്നത് അസാദ്ധ്യമാണ്. കാരണം അതിൻറെ ഉറവിടം ഒന്നിലേറെ കാര്യങ്ങൾകൊണ്ട് നിറഞ്ഞുനിൽക്കുന്നതാണ്. എങ്കിലും, സ്വതന്ത്രമല്ലാത്തതും, തീർത്തും അനാരോഗ്യകരമായി അനുഭവപ്പെടുന്ന ഏതൊരു ബന്ധത്തേയും ടോക്സിക് റിലേഷൻ ഷിപ്പായി കണക്കാക്കാം.

ഇതോടൊപ്പം ഒരു ടോക്സിക് റിലേഷൻ ഷിപ്പിൽ പൊതുവായി കാണുന്ന പല കാര്യങ്ങളും, ചിലപ്പോൾ ചില ശക്തമായ ബന്ധങ്ങളിലും, കണ്ടെന്നുവരാം. പക്ഷെ ഇവിടെ രണ്ടു വ്യക്തികൾ തമ്മിലുള്ള ബന്ധങ്ങൾക്കിടയിൽ അത് അനാരോഗ്യകരമായ ഒരു പ്രവണതയായി മാറിത്തുടങ്ങുമ്പോഴാണ് അത് ടോക്സിക്കായി മാറിത്തീരുന്നത്..

 ഒരു ഉദാഹരണത്തിന്. അവൾ തൻറേതുമാത്രമെന്ന ഉറച്ച ചിന്ത. അതല്ലങ്കിൽ അവൻ അല്ലങ്കിൽ അവൾ മറ്റൊരാളുമായി സംസാരിക്കുന്നതോ, കൂട്ടുകൂടുന്നതോ ഇഷ്ടമല്ല. കൂടെയുള്ള വ്യക്തിയെ അനാവശ്യമായി സംശയിക്കുക, അവരെ പിന്തുടരുക. കൂടെയുള്ള ആൾ എന്തുചെയ്യണം, അതല്ലങ്കിൽ എന്തു ചെയ്യരുത് എന്നെല്ലാം സ്വയം തീരുമാനിക്കുക. ഇങ്ങിനെ കൂടെയുള്ളവരുടെ എല്ലാപ്രശ്നങ്ങളിലും അമിതമായി കൈകടത്തി അവരുടെ വ്യക്തി സ്വാതന്ത്ര്യം പൂർണ്ണമായും ഇല്ലാതാക്കി ആ ബന്ധം പൂർണ്ണമായും വഷളായിക്കഴിയുന്നതിനേയാണ് ഒരു ടോക്സിക് റിലേഷൻ ഷിപ്പായി കണക്കാക്കുന്നത്.

ചില ഘട്ടങ്ങളിൽ അത് കൂടെയുള്ളവരെ ഇകഴ്ത്തി സംസാരിക്കുന്നതിലാകാം, ചിലപ്പോൾ അവരുടെ കുറ്റങ്ങളും കുറവുകളും കണ്ടെത്തി അത് മാത്രം പറഞ്ഞുകൊണ്ട് മറ്റേവ്യക്തിയെ വേദനിപ്പിച്ച് സുഖംകണ്ടെത്തിക്കൊണ്ടാകാം. ഇങ്ങിനെ കൂടെയുള്ളവരുടെ വികാരങ്ങൾ മാനിക്കാതെ സ്വന്തം നിലക്ക് കൂടെയുള്ളവർ എന്തുചെയ്യണം, എങ്ങനെ പെരുമാറണമെന്നെല്ലാം സ്വയം തീരുമാനിക്കുന്നവരും ഈ കൂട്ടത്തിൽ പെട്ടവർ തന്നെ.

എങ്കിലും നമ്മുടെ സമൂഹത്തിൽ, പ്രത്യേകിച്ച് സാമൂഹ്യ മാദ്ധ്യമങ്ങളുടെ അതിപ്രസരത്തോടുകൂടി കുറച്ചുകൂടി ഗൗരവവും, ശ്രദ്ധിക്കേണ്ടതുമായ ചില റിലേഷൻ ഷിപ്പുകളുണ്ട്. അത് കുറച്ചുകൂടി ആഴത്തിലും, വ്യക്തമായും മനസ്സിലാക്കിയില്ലങ്കിൽ തീർച്ചയായും ഒരിക്കലും തിരിച്ചുകയറാനാകാത്ത വിധം ജീവിതം, തകർച്ചയിലേയ്ക്കുതന്നെ വഴുതി വീണുവെന്നും വരാം..

 ഒന്നാമതായി നമ്മൾ ടോക്സിക്കായി കണക്കാക്കുന്ന ഒരു വ്യക്തിയെ സംബന്ധിച്ച് അയാൾ എവിടെയെക്കെയോ, കൃത്യമായി മറച്ചുവെച്ചിരിക്കുന്ന ഒരു അജൻഡ ഉള്ളതായി വ്യക്തമായി കാണാൻ കഴിയും, അത് ഇടപെടുന്ന വ്യക്തിയെ ഏതെങ്കിലും വിധത്തിൽ ചൂഷണം ചെയ്യാൻ ഉദ്ദേശിച്ചുള്ളതോ, അതല്ലങ്കിൽ ഏതെങ്കിലും പ്രത്യേക താത്പര്യ നിർവഹണത്തിൻറെ ഭാഗമായതോ, അങ്ങിനെ എന്തുമാകാം.. 

അതായത് തീർത്തും സൗഹാർദ്ദപരമോ, നിഷ്കളങ്കമോ, ആരോഗ്യകരമോ ആയ ഒരു ബന്ധമായിരിക്കില്ല അതെന്ന് സാരം. അത്,  ഭാര്യ ഭർത്തൃ ബന്ധങ്ങളിലാകാം, പ്രണയബന്ധങ്ങളിലാകാം, ഏതുതരം ബന്ധങ്ങളിലും ഈ ഒരു പ്രത്യേകത നമുക്ക് പലപ്പോഴും കാണുവാൻ കഴിഞ്ഞെന്നുവരും.  ഇത്തരക്കാർ കൂടെയുള്ള വ്യക്തിയുടെ ഇഷ്ടാഅനിഷ്‌ടങ്ങൾക്കൊന്നും യാതൊരു പ്രാധാന്യവും കൽപ്പിക്കാതെ വളരെ പെട്ടെന്ന് മറ്റുള്ളവരുടെ പ്രീതിപിടിച്ചുപറ്റുവാൻ ശ്രമിക്കുന്നതും  കാണാം, കൂടാതെ, നിങ്ങൾ ആവശ്യപ്പെടാതെ തന്നെ, നിരവധി വാഗ്ദാനങ്ങൾ, കലവറയില്ലാത്ത സ്നേഹം, സഹായം, പിൻതുണ, ഇതെല്ലാം ഇവരുടെ, പൊതു സ്വഭാവങ്ങൾ തന്നെ.

ചിലർ അമിതമായ സ്നേഹവിശ്വാസങ്ങൾ പ്രകടിപ്പിച്ചുകൊണ്ട്, കൂടെക്കൂടുകയും,പങ്കാളിയെ വളരെയേറെ തന്നിലേയ്ക്കാകർഷിച്ച് കീഴ്പ്പെടുത്തുവാനുമാകും ശ്രമിക്കുക. മറ്റു ചിലർ കൂടെയുള്ള വ്യക്തിയുടെ ദൗർബല്യങ്ങളെ ചൂഷണം ചെയ്യും, മറ്റുചിലർ വീഴ്ച്ചകളിൽ സഹായ ഹസ്തം നീട്ടിക്കൊണ്ടും,. ഇങ്ങിനെ വിവിധ മാർഗ്ഗങ്ങൾ പിന്തുടർന്ന് തൻറെ ആഗ്രഹപൂർത്തീകരണങ്ങൾക്കായി പങ്കാളിയെ പൂർണ്ണമായും ഉപയോഗപ്പെടുത്തുക എന്നതുമാത്രമാണ് ഇതിൻറെ തന്ത്രം. ഇവിടെ സ്നേഹമെന്നത് ഒരു ഉപാധിയായി മാറ്റിത്തീർക്കുന്നുവെന്നുമാത്രം.

 പലപ്പോഴും  കൂടെയുള്ളവർ ഇത്,  തിരിച്ചറിയാൻ വൈകുന്നു എന്നതാണ് പ്രധാന പ്രശ്നം. തിരിച്ചറിയുമ്പോഴാകട്ടെ കൂടെയുള്ള   വ്യക്തിക്ക് ശ്വാസം നേരെവിടാൻ പോലും കഴിയാത്തവിധം കീഴ് പ്പെടുത്തി പൂർണ്ണമായും, തൻറെ വരുതിയിലാക്കിയിരിക്കുകയും ചെയ്യും.

 പലപ്പോഴും ഇത് ഒരിക്കലും ചികിത്സിച്ച്ഭേദമാക്കുവാനോ, ടോക്സിക്കായ വ്യക്തിയെ പറഞ്ഞു മനസ്സിലാക്കലോ അസാദ്ധ്യമായും വരും. കാരണം ഇവർ പലകാര്യങ്ങളും, ചിന്തിച്ചുകൂട്ടുന്നതും, ആസൂത്രണം ചെയ്യുന്നതും വളരെ നിഗൂഢമായ ബുദ്ധി ഉപയോഗിച്ചായിരിക്കും എന്നതുതന്നെ.

മറ്റുചിലർ ചിലപ്രത്യേക സാഹചര്യങ്ങൾകൊണ്ടുമാത്രം ടോക്സിക്കായി മാറിപ്പോയവരുമുണ്ടാകാം. അത്തരക്കാരെ കൃത്യമായ കൗൺസിലിംഗിൽക്കൂടിയോ, അതല്ലങ്കിൽ മറ്റേതെങ്കിലും മാർഗ്ഗത്തിലോ ശരിയായ മാനസികാരോഗ്യ അവസ്ഥയിലേക്കെത്തിക്കാമെങ്കിലും, മറ്റ് ചില കേസുകളിൽ അത് സാദ്ധ്യമല്ലന്നും, വളരെ തന്ത്രപരമായി, അവർക്കുപോലും തീരെ ബോദ്ധ്യപ്പെടാത്ത വിധത്തിൽ  ഇതിൽനിന്നും, രക്ഷപ്പെടൽ തന്നെയാണ് ഉചിതമായ മാർഗ്ഗമെന്നും ഈ രംഗത്തെ പ്രമുഖരായ ചില മാനസികാരോഗ്യ വിദഗ്ധരും അഭിപ്രായപ്പെടുന്നു.