എന്താണ് ജീവിതം ? | Meaning of Life.

 എന്താണ് ജീവിതം? മനുഷ്യർ ആവശ്യത്തിലേറെ ജീവിതം ഘോഷിച്ചു തീർക്കുമ്പോഴും, വല്ലാത്ത ദുരന്തക്കയങ്ങളിലേക്ക് അപ്രതീക്ഷിതമായി മുങ്ങിത്താഴുമ്പോമ്പോഴും സ്വയം ചോദിക്കും, എന്താണ് ജീവിതം? അതല്ലങ്കിൽ എന്തിന് ജീവിക്കണം?

ഇത് ഒരിക്കലും ഒരാൾക്കും ഒറ്റ വാക്കിൽ ഉത്തരം പറയുവാൻ കഴിയുന്ന ഒന്നല്ല.

എങ്കിലും നമുക്ക് ചെയ്യാൻ കഴിയുന്ന ചിലതുണ്ട്.അത് മനോഹരമായി ജീവിക്കുക എന്നതുമാത്രമാണ്.

എത്രവർഷം ഒരാൾ ജീവിച്ചിരുന്നു എന്നതല്ല. അയാൾ എങ്ങിനെ ജീവിച്ചു എന്നതാണ് പ്രധാനം.

വളരെ ചെറുപ്പത്തിലേ മൃതിയടഞ്ഞ എത്രയോ പ്രഗത്ഭരായ മനുഷ്യരേയാണ് ലോകം നൂറ്റാണ്ടുകൾക്കിപ്പുറവും, ഇപ്പോഴും മനസ്സുകൊണ്ട് നമിക്കുകയും, ആരാധിക്കുകയും, അവർ ഇപ്പോഴും ജീവിച്ചിരുന്നങ്കിലെന്ന് അറിയാതെ ആഗ്രഹിച്ചുപോവുകയും ചെയ്യുന്നത്.

- ഒറ്റവാക്കിൽ അവരുടെ ഭൗതികശരീരംമാത്രമാണ് യഥാർഥത്തിൽ ഈ ഭൂമിയിൽനിന്നും അപ്രത്യക്ഷമാകുന്നൊള്ളൂ. അവർഅവശേഷിപ്പിച്ച നൻമകൾ തന്നെയാണ് അന്തിമമായി ഈ ഭൂമിയിൽ നിലനിൽക്കുന്നതും.- അതിനാൽതന്നെ മനോഹരമായി ജീവിക്കുക എന്നതുതന്നെയാകും പ്രധാനം. അത് വാക്കുകൊണ്ടും, ചിന്തകൊണ്ടും, പ്രവൃത്തികൊണ്ടുമാകാം.

ഇതിൽ നിന്നുതന്നെ ജീവിതത്തിൻറെ പൊരുൾ എന്തെന്ന് വ്യക്തമാണ്.

സ്വന്തം സൗകര്യങ്ങൾക്കും, മന:സന്തോഷം നൽകുന്നതുമായ രീതിയിൽ, ഒരിക്കലും മറ്റുള്ളവർക്ക് ബുദ്ധിമുട്ടില്ലാത്തവിധം സ്വന്തം നിലയിൽ മനോഹരമായി ജീവിച്ചു തീർക്കുക.എന്നതാകും പരമപ്രധാനം.

കാരണം ജീവിതം അത്രയേറെ, നൈമിഷികമാണ്. അത് എവിടെ തുടങ്ങുന്നുവെന്നോ, എവിടെ അവസാനിക്കുന്നെന്നോ ആർക്കും ഊഹിക്കാൻ പോലും കഴിയാത്ത വളരെ മനോഹരവും, നിഗൂഢവുമായ ഒരു കടങ്കഥയാണ്.

പക്ഷെ, ദൈർഘ്യമേറിയ ഒരു മനുഷ്യ ജീവിത സഞ്ചാരത്തിൻ്റെ അവസാന നിമിഷത്തിൽപ്പോലും , മരണപ്പെട്ടവനെയോർത്ത് ഒരു ദീർഘശ്വാസം പൊഴിക്കുവാനോ, അൽപ്പം കണ്ണീരൊഴുക്കുവാനോ പോലും ഒരാൾ പോലുമുണ്ടായിരുന്നില്ലെങ്കിൽ പിന്നെ എന്തിനായിരുന്നു വെറുതെ പാഴായ ആ മനുഷ്യ ജീവിതം? എന്നതാണ് സുപ്രധാനമായ ചോദ്യവും!

ഇത് എഴുതുന്നനിടയിൽ തന്നെയായിരുന്നു,
വീടിന് പുറത്തായി അനേകംമനുഷ്യരുടെ കാൽപ്പെരുമാറ്റവും, ശബ്ദവുമെല്ലാം കേട്ടത്

എഴുന്നേറ്റു നോക്കുമ്പോൾ, മുന്നിലുള്ള ഇടവഴിയിൽ പതിവില്ലാത്ത ആൾപ്പെരുമാറ്റം.!

എന്താകും...? ആരോടെങ്കിലും ചോദിക്കാമെന്നു കരുതിയാൽ തീർത്തും അപരിചിതരായ മനുഷ്യരും.

പണ്ട് ഒത്തിരി അകലങ്ങളിൽ അഞ്ചോ, ആറോ, വീടുകളാണ് ഇവിടെ ഉണ്ടായിരുന്നത്. പക്ഷെ ഇപ്പോൾ, കാലംമാറിയപ്പോൾ വഴിനടക്കാൻ പോലും കഴിയാത്തവിധം ഓരോ സെൻ്റിലും അനേകം,വീടുകളാണ്.

മാത്രമല്ല ആർക്കും ആരുമായും എന്തെങ്കിലും പരിചയമോ,ബന്ധങ്ങളോ ഒന്നും തന്നെയില്ല. എന്തിനാണ് ഈമനുഷ്യരെല്ലാം ഇത്ര അപരിചത്വംഭാവിച്ച് വലിയ മുഖംമൂടി ധരിച്ച് നടക്കുന്നതെന്തിനെന്നും എത്ര ആലോചിച്ചിട്ടും. മനസ്സിലാകുന്നതുമില്ല.

എങ്കിലും, ആദ്യംകണ്ടയാളോട് രണ്ടും കല്പ്പിച്ചു , ചോദിച്ചു.

" എന്താണ് എല്ലാവരും അങ്ങോട്ടുപോകുന്നത്? "

" അറിഞ്ഞില്ലേ.. ? ദാ, വീട്ടിലെ കുമാരേട്ടൻ മരിച്ചു ! "

- കുമാരേട്ടൻ - തൊട്ടയൽപ്പക്കത്തെ, അൽപ്പം പ്രായം ചെന്ന ഒരുമനുഷ്യനാണ്. എന്നിട്ടുപോലും ഒരാൾ പറഞ്ഞുപോലും അറിഞ്ഞില്ല. -

ചുറ്റുപാടും വെറുതെയൊന്നു കണ്ണോടിച്ചു.

അടുത്തരണ്ടുവീടുകളിലും ടി.വി. ഓൺചെയ്തുവെച്ചിരിക്കുന്നു. കുട്ടികളുടെ ആഹ്ളാദാരവങ്ങൾ . ക്രിക്കറ്റ് കളി ലൈവാണ്. പതിയെ ആ വീട്ടിലേക്ക് നടന്നു.

കോളിംഗ് ബെല്ലിൻ്റെ ശബ്ദം കേട്ട് , ടി.വി.യുടെ ശബ്ദം അൽപ്പം കുറച്ച് വെച്ച് അയൽ വീട്ടുകാരൻ പുറത്തേക്കിറങ്ങി വന്നു.

"അപ്പുറത്തെ വീട്ടിലെ കുമാരേട്ടൻ മരിച്ചുവല്ലേ..?"ഞാൻ ചോദിച്ചു.

" അതെ അൽപ്പംമുൻപ് വാട്സ് ആപ്പിലെ ഒരു മെസേജ് കണ്ടാ ഞാൻ അറിഞ്ഞേ..! അറിഞ്ഞ സ്ഥിതിക്ക് അവിടം വരെപോയി തിരിച്ചുപോന്നു. മരണം രാവിലെയായിരുന്നു..., എല്ലാം കഴിഞ്ഞു."

- കുട്ടികൾ ടി.വി.യിൽ നോക്കി വീണ്ടും ആർത്തുവിളിച്ചു -

"ഓ, അടുത്തവിക്കറ്റും വീണു സൂപ്പർ കളി തന്നെ."

അയൽപക്കക്കാരൻ ടി.വി.യിൽ നിന്ന് കണ്ണെടുക്കാതെ ധൃതിയിൽ അകത്തേക്കുതന്നെ തിരിച്ചു പോയി.

- ആലോചിച്ചപ്പോൾ ദേഷ്യവും, സങ്കടവുമെല്ലാം ഒരുമിച്ചു വന്നു-

മരണപ്പെട്ട ആ മനുഷ്യൻ, തനിക്ക് ചെറുപ്രായത്തിൽ എത്രയേറെ ചോക്ലേറ്റുകളും, മിഠായികളുമൊക്കെയാണ് വാങ്ങിത്തന്നിട്ടുള്ളത്....!

പണ്ട് പറമ്പിലെ പണികൾക്കും, വീടുകളിലെ ഏതുജോലിക്കും ആമനുഷ്യൻ വേണമായിരുന്നു. പ്രായംകൂടിയതോടെ പിന്നീട് പലർക്കും ആമനുഷ്യനെ കാണുന്നതുതന്നെ ചതുർഥിയായി.

ഫോൺ ഓൺചെയ്തു. വാട്സ് ആപ്പിൻറെ ഒരറ്റത്ത് മരണപ്പെട്ടയാളുടെ ഒരുപഴയഫോട്ടോ. ചുവട്ടിൽ കണ്ണീർവാർക്കുന്ന ഒരു ഇമോജിയും, ആദരാഞ്ജലികൾ എന്നെഴുതിയ ഒരു കുറിപ്പും.!

- തീർന്നു... !ഒരു മനുഷ്യ ജന്മത്തിൻറെ വിടവാങ്ങൽ...! -ഒരുദിവസം, ചിലപ്പോൾ ഇൻറർനെറ്റില്ലങ്കിൽ തീരും, എല്ലാ ബന്ധങ്ങളും. ചിലപ്പോൾ ലോകം തന്നെ -

ആലോചിച്ചപ്പോൾ, ഏതാനും വർഷം മുൻപുള്ള നാട്ടിലെ ചില മരണ വീടുകളുടെ ചിത്രമാണ് വളരെപ്പെട്ടെന്ന്, മനസ്സിലേക്കോടിയെത്തിയത്.!

മരണമടഞ്ഞത് ആരായാലും, എപ്പോഴായാലും, എങ്ങിനെയെങ്കിലുമൊക്കെയായി , മരണ അറിയിപ്പെത്തും.

പ്രത്യേകിച്ച് മരണം സംഭവിച്ചത് രാത്രികാലത്താണങ്കിൽ ഓരോ ഇടവഴികളിലും ടോർച്ചും , കുറേ പന്തങ്ങളുമൊക്കെ മിന്നിമറയുന്നതാകും കാഴ്ച്ച.

മരണ വീട് നിമിഷ നേരം കൊണ്ട് തന്നെ ആൾക്കൂട്ടത്താൽ നിറഞ്ഞു കവിയും.

പിന്നീട്, മരിച്ചവനെക്കുറിച്ചുള്ള ഓർമ്മകളും , കഥകളും, കണ്ണീരുമൊക്കെയായിട്ടാകും ആ രാത്രി കടന്നുപോവുക , അതിനിടെ വരാനുള്ള ബന്ധുക്കളെക്കുറിച്ചുള്ള അന്വേഷണങ്ങൾ, വന്നുചേർന്ന ബന്ധുക്കളുടെ ദൈന്യമായ തേങ്ങലുകൾ....! കട്ടൻ ചായയും ഭക്ഷണങ്ങളുമൊക്കെയായി ഓടി നടക്കുന്ന അയൽപക്കത്തെ വീട്ടുകാർ. !

മരണശേഷം അനന്തരമുള്ള കർമ്മങ്ങളും, ക്രിയകൾക്കുമെല്ലാം ശേഷം കുടുംബാംഗങ്ങളുടേയും,ബന്ധുജനങ്ങളുടേയും സാന്നിദ്ധ്യത്തിലുള്ള ഒത്തുചേരൽ.

പലപ്പോഴും ഗൃഹനാഥൻ മരണപ്പെട്ട ആ കുടുംബത്തിൻ്റെ നിലവിലുള്ള ശോചനീയാവസ്ഥകളെക്കുറിച്ച് മറ്റുള്ളവർ മനസ്സിലാക്കുന്നതുപോലും അപ്പോഴാകും.!
-പ്രത്യേകിച്ച് ആർക്കും ഒന്നും ചെയ്യുവാൻ കഴിയുന്നത്ര ത്രാണിയില്ലങ്കിൽ പോലും, ആ നിമിഷത്തെ ഒരു കൂട്ടായ്മയും, ഒത്തുചേരലുമെല്ലാം മരിച്ചു പോയയാളുടെ കുടുംബത്തിന് വല്ലാത്തൊരു ആത്മധൈര്യവും, വിശ്വാസവുമെല്ലാം ഉണ്ടാക്കിക്കൊടുക്കും. കൂട്ടത്തിൽ തങ്ങളാരും സമൂഹത്തിൽഒറ്റപ്പെട്ടവരല്ലന്നെല്ലാമുള്ള, ഒരു തോന്നലും -
-മരിച്ചവീട്ടിലേയ്ക്കുതന്നെ നടന്നു-

വീടിൻറെ നീണ്ട വരാന്തക്കൊരുകോണിൽ മരണപ്പെട്ട മനുഷ്യൻ്റെ മകനിരിപ്പുണ്ട്.

നരകൾ പടർന്നുകയറി, എല്ലുകൾ പുറത്തേയ്ക്കുതള്ളി, ഒരുജീവിതത്തിൻറെ മുഴുവൻ ഭാരങ്ങളും അയാളുടെ ചുമലിൽ കാണാം.

കുറച്ചു കനലും, പുകയുമായി മാത്രം അവശേഷിപ്പിക്കപ്പെട്ട ഒരു മനുഷ്യജന്മത്തിൻറെ ജീവിതവ്യർഥതകളോർത്ത് ഒരുപക്ഷേ അയാളും എന്നെപ്പോലെ പരിതപിക്കുന്നുണ്ടാകാം.

"ഇപ്പോൾ അറിഞ്ഞതേയൊള്ളൂ... നല്ല സുഖമുണ്ടായില്ല. " ശബ്ദം താഴ്ത്തി ഞാൻ പറഞ്ഞു -

"ങ്ങും..!! പ്രത്യേകിച്ച് അസുഖമൊന്നുമുണ്ടായില്ല. പെട്ടെന്നായിരുന്നു."- നീണ്ട താടിരോമങ്ങളിൽ വിരലോടിച്ചുകൊണ്ട് അയാൾ പതിഞ്ഞ ശബ്ദത്തിൽ പറഞ്ഞു.

- ചുറ്റുപാടുമൊന്നു കണ്ണോടിച്ചു. കനത്തവെയിലിൽ, ചിതയിലെ തിളങ്ങുന്നകനൽകട്ടകളും, വീടിൻറ അകത്തളങ്ങളിൽ മൗനത്തിൽ മൂടിക്കെട്ടി നിറഞ്ഞുനിൽക്കുന്ന കനത്ത ഇരുളുംമാത്രം ബാക്കിനിൽക്കുന്നു.. !

-ഞാനോർത്തു. -

ഒരു മരണ വീടുപോലും എത്ര പെട്ടെന്നാണ് ഒരാളനക്കമില്ലാതെ ഒഴിഞ്ഞു കാലിയാകുന്നത്..!

ഏതൊരു മരണവും സാധാരണ രീതിയിൽ ഒന്നും ബാക്കിവെയ്ക്കുന്നതേയില്ല.

ഒരാളുടെ ജീവിതം, അയാൾ വെട്ടിത്തെളിച്ചപാതകൾ, കനത്തതോൽവികൾ , വിജയങ്ങൾ, ഭാവിപദ്ധതികൾ, ചിന്തകൾ, ഇങ്ങിനെയെല്ലാം വീണ്ടും ഒരുകൂന മൺതരികളിലേക്ക് തന്നെ...

എരിഞ്ഞടങ്ങാറായ ചിതയിലേയ്ക്ക് നോക്കി കുമാരേട്ടൻ്റെ മകൻ പറഞ്ഞു.

" ജീവിച്ചിരുന്നപ്പോൾ തോന്നാതിരുന്ന വല്ലാത്ത വലിയൊരു ശൂന്യത ! "

" പലപ്പോഴും, കാര്യമൊന്നുമില്ലാതിരുന്നെങ്കിലും,വെറുതെ ഒരു ​​സമാധാനത്തിന്, എന്തു കാര്യത്തിലും ഒരു അഭിപ്രായം ചോദിക്കാൻ ഒരാളുണ്ടായതാ ..! അതും തീർന്നു."
- അയാളുടെ കണ്ണുകളിൽ നിരാശയുടെയും, ഏകാന്തതയുടെയും കനത്ത പുകച്ചുരുളുകൾ -
തിളച്ചുമറിയുന്ന ഉച്ച വെയിലിൽ ഒരു മനുഷ്യ ജൻമത്തിൻറെ അവസാന ഓർമ്മകളും, ഇളം ചാരനിറം പൂകി ആകാശത്തിലേയ്ക്ക് .
- അതെ, അതൊരു ശൂന്യത തന്നെയാകും, ... !

എവിടെയും ഒറ്റയ്ക്കല്ലന്ന ഒരു ധൈര്യം, ഒരു പഴയ തലമുറയുടെ അനുഭവജ്ഞാനം, ജീവിതത്തെക്കുറിച്ചുള്ള തിരിച്ചറിവ്...!
-ഒരുപുതുതലമുറക്കുവേണ്ടി, പഴമക്കാരുടെ മൂല്യവത്തായ സമ്പാദ്യം -
-ആ സമ്പാദ്യത്തിൻ്റെ കരുത്തിലായിരുന്നു പിന്നയങ്ങോട്ടുള്ള ജീവിതയാത്രകൾ-
ഇടയ്ക്ക് കാലൊന്നിടറിയാൽ, തൊണ്ടയൊന്നിടറിയാൽ, ശക്തിയൊന്നു ചോർന്നാൽ, എപ്പോഴങ്കിലും തനിച്ചൊരു നിലനിൽപ്പ് സാദ്ധ്യമല്ലന്ന് തോന്നിയാൽ ....

ആശ്വാസത്തിനെങ്കിലുമായുള്ള ഒരു ചേർത്തുപിടിക്കൽ,! എല്ലാത്തിനും ഞാനില്ലേയെന്ന ഒരു സമാധാനിപ്പിക്കൽ ...!

യഥാർഥത്തിൽ പുകഞ്ഞ് ആകാശത്തേക്കുയരുന്നത്, ഒരുകാലത്തിൻറെ സ്പന്ദനങ്ങളായിരുന്നു.

പലരും തിരിച്ചറിയാതെപോയ സമൃദ്ധമായ ഒരുപഴയകാലത്തിൻറെ മനുഷ്യസ്നേഹത്തിൽ അധിഷ്ഠിതമായ ഒരു ജീവിത സംസ്ക്കാരം.

പിൻതിരിഞ്ഞുനോക്കുമ്പോൾ, സ്വന്തംജീവിതംകൊണ്ട് ഭൗതികസുഖങ്ങൾക്കപ്പുറം, മറ്റുള്ളവർക്ക് എന്തുനൽകുവാൻ കഴിഞ്ഞു എന്നതാകാം ചിലപ്പോൾ പരമപ്രധാനമായ കാര്യം.

മരണവക്രത്തിൽനിന്നും തിരിച്ചെത്തിയ പലരും പറഞ്ഞുകേട്ടിട്ടുണ്ട്. ശരീരവും മനസ്സും ശക്തിചോർന്ന് എങ്ങോട്ടോ പറന്നുനീങ്ങാൻ തുടങ്ങുമ്പോൾ താൻ ചെയ്ത ദുഷ്കർമ്മങ്ങളുടെ ചിത്രങ്ങളാണ് ആനിമിഷത്തിൽ മനസ്സിലേക്കോടിയെത്തിയതെന്നും, തീർത്തും ആനിസ്സഹായവസ്ഥയിൽ താൻ തകർന്നുപോയെന്നും.

പറഞ്ഞത് സത്യമോ ? മിഥ്യയോ ?ആർക്കറിയാം. എന്തുതന്നെയായാലും ചെയ്തുവെച്ച നീചകർമ്മങ്ങൾ ഒരുമനുഷ്യനെ ജീവിതാന്ത്യം വരെ പിൻതുടരുമെന്നറപ്പ്.

ജീവിതം ഒന്നേയൊള്ളൂ. അതാകട്ടെ ഏതുനിമിഷത്തിലും കെട്ടുപോകാവുന്നതും. മനുഷ്യനായി ജീവിക്കുക എന്നതുമാത്രമാണ് അനന്തമായ ഈ ഭൂഗോളത്തിൽ പ്രകൃതിനൽകുന്ന പാഠം. മനുഷ്യനായി ജീവിക്കുന്നവന് യഥാർഥത്തിൽ ജീവിതത്തിൻറെ പൊരുളോ, അർഥമോ തേടേണ്ടതില്ലന്നുമുള്ളതുമാണ്. സത്യവും, വസ്തുതയും.

ഇക്കിഗായ് പ്രായോഗിക ജീവിതത്തിൽ | Ikigai Malayalam

ആയുസ്സിൻ്റെ രഹസ്യമായ ഇക്കിഗായ് | Ikigai Philosophy