ആത്മീയതയിൽ മതത്തിൻറെ സ്ഥാനമെന്താണ്?

 എന്താണ് ആത്മീയത ?

സ്വന്തം വീടുകളിലെ പ്രാർത്ഥന, മുതൽ  ഒരുമനുഷ്യജീവിതത്തിൻറെ അന്ത്യംവരെ   ദൈവ സങ്കൽപ്പവുമായി  ബന്ധപ്പെട്ടു കിടക്കുന്ന ഒരു നേർരേഖയാണ്  പലരുടേയും ആത്മീയസങ്കൽപ്പങ്ങൾ.

അത്തരം ആത്മീയ ചിന്തകളുടെ ഭാഗമായി , കണ്ടു മറന്നതും, കേട്ടുമറന്നതുമായ അനേകം , കഥകളും , ചിന്തകളുമെല്ലാം കൂടിക്കുഴഞ്ഞ് , മറ്റൊരു വിധത്തിൽ    ചാത്തനും, മറുതയും, ഭൂതപ്രേത പിശാചുക്കളും മുതൽ അനേകം , അതീന്ദ്രിയ അനുഭവങ്ങളും,പുനർജന്മ കഥകളും ഉൾപ്പെടെ കണ്ണെത്താ ദൂരത്തോളം നീണ്ടു പരന്നുകിടക്കുന്ന വലിയൊരു ആഴക്കടലായാണ് പലരും ആത്മീയതയെ  സമീപിക്കുന്നത്.

ത്യത്തിൽ എന്താണ് ഈ ആത്മീയത?

ഈ ചോദ്യത്തിന് പലരും തരുന്ന ഉത്തരം  പരസ്പരബന്ധമില്ലാത്തതും, യാതൊരുവിധ യുക്തികൾക്കും നിരക്കാത്തവയുമാണ്.  കാരണം, ഇന്ന് മതവും, ആത്മീയതുമെല്ലാം സമൂഹത്തിലെ ഏറ്റവും വിലപിടിപ്പുള്ള വിൽപ്പനച്ചരക്കും, ഏതൊരു മനുഷ്യനേയും തന്ത്രപൂർവ്വം വലയിലാക്കി സ്വാർഥലാഭങ്ങൾ നേടിയെടുക്കുവാനുള്ള കുറുക്കുവഴിയായി രാഷ്ട്രീയപ്പാർട്ടികളും, വ്യക്തികളും, സംഘടനകളുമൊക്കെ  ഉപയോഗിച്ചു പോരുന്നതുകൊണ്ട് , എന്താണ് യഥാർഥ ആത്മീയത എന്നതു പോലും മനുഷ്യർ വല്ലാതെറ്റിധരിക്കപ്പെട്ടിട്ടുള്ള ഒരു കാലഘട്ടത്തിലാണ് നാം ജീവിക്കുന്നത്.

മാത്രമല്ല ആത്മീയത എന്നതിൻ്റെ വ്യാഖ്യാനം തേടിപ്പോയാൽ ഏവരും അവരവർക്ക്  താത്പര്യമുള്ള മതത്തെ ചേർത്തുനിർത്തിക്കൊണ്ടാകും പലവ്യാഖ്യാനങ്ങളും നടത്തുക .    

അപ്പോൾ അവിടേയും പ്രശ്നം, സ്വന്തം മതം മാത്രമാണ് ശരിയെന്നും, ആ മതവുമായി ബന്ധപ്പെട്ട, ഗ്രന്ഥങ്ങൾ പറഞ്ഞു വെയ്ക്കുന്നതും, നടപ്പിലാക്കുന്നതുമാണ് യഥാർഥ ആത്മീയതയിലേക്കുള്ള വഴിയെന്നു കൂടിയാണ്. ഈ മതവുമായി ചേർന്നു നിന്ന് ആത്മീയ കച്ചവടം നടത്തുന്ന  മിക്കവാറും എല്ലാ ആത്മീയാചാര്യൻമാരെന്ന് പറയുന്നവരെല്ലാം ആവർത്തിക്കുന്നത്. 

എന്നാൽ വളരെ സ്വതന്ത്രമായി ഒരു മനുഷ്യൻ എന്ന നിലയിൽ ചിന്തിച്ചാൽ എന്താണ് മനുഷ്യ ജീവിതത്തിൽ ആത്മീയതയ്ക്കുള്ള സ്ഥാനം?

 അഥവാ ഇനി മതപുരോഹിതർ വിളിച്ചു കൂവുന്ന പോലെ ഹിന്ദു ആത്മീയത, മുസ്ലീം ആത്മീയത, ക്രിസ്ത്യൻ ആത്മീയത അങ്ങിനെയെല്ലാമുണ്ടോ..?

ഈ പറയുന്ന തന്ത്രങ്ങളും മന്ത്രങ്ങളും വിഗ്രഹാരാധനകളുമെല്ലാം ഈ പറഞ്ഞു വരുന്ന ആത്മീയതയുടെ ചട്ടക്കൂടുകൾക്കുള്ളിൽ നിലനിൽക്കുന്ന കർമ്മ രീതികളാണോ? 

ഇൻഡ്യ കണ്ട ഏറ്റവും വലിയ യോഗിവര്യന്മാരും, മഹാത്മാക്കളുമെല്ലാം ഈ ആത്മീയതയെ കണ്ടെത്തിയതും, വ്യാഖ്യാനിച്ചതുമെല്ലാം  എങ്ങിനെയാണ്?

കുറേക്കാലമായുള്ള ഇത്തരം കുറേ സംശയങ്ങളുമായി കടന്നുചെന്നത് ആലുവ അദ്വൈതാശ്രമം മഠാധിപതി സ്വാമി.ധർമ്മചൈതന്യയുടെ അരികിലേക്കായിരുന്നു.

എന്താണ് ആത്മീയത , എന്താണ് അതിന് മതവുമായുള്ള ബന്ധം?

ചോദ്യം കേട്ട് സ്വാമി പുഞ്ചിരിച്ചു.

സ്വാമി.ധർമ്മചൈതന്യ

" സത്യത്തിൽ ആത്മീയതയും, മതവുമായി യാതൊരു ബന്ധവുമില്ല.മാത്രമല്ല അതിന് പൂജാദികർമ്മങ്ങളോടോ, ഏതെങ്കിലും ആചാരാനുഷ്ഠാനങ്ങളോടോ തന്ത്രമോ, മന്ത്ര വിദ്യകളുമായോ ഒന്നും ചേർത്തുവെക്കേണ്ടതുമില്ല."

പിന്നെയെങ്ങിനെയാണ് ആത്മീയതയെ വ്യാഖ്യാനിക്കുക?

'ആത്മീയത എന്നവാക്കിൻറെ അർത്ഥംതന്നെ, നമുക്ക് നമ്മെക്കുറിച്ചുള്ള അറിവ് എന്നാണ്.അല്ലങ്കിൽ ഞാൻ ആരാണ് എന്ന അറിവാണ്".

 "എൻ്റെ നിലനിൽപ്പിന് ആധാരമായ പൊരുൾ എന്താണന്നറിയുന്നതിനേയാണ് ആത്മജ്ഞാനം എന്നുപറയുന്നത്." 

"  നമ്മൾ മനുഷ്യർ ഈ ഭൂമിയിൽ ജനിച്ച്, ജീവിച്ച്, മരിച്ചുപോകുമ്പോൾ - ഇവിടെ നമ്മുടെ നിലനിൽപ്പിന് ആധാരമായ പൊരുളിനെക്കുറിച്ച് ഒരു ബോധമുണ്ടായിരിക്കണം."

"എന്താണ് എൻറെ നിലനിൽപ്പിന് ആധാരമായ ആ പൊരുൾ? 

 " ഞാൻ ഈ ലോകത്തേയ്ക്ക് പിറന്നുവീഴും മുമ്പ് എനിക്കൊരു നിലനിൽപ്പുണ്ടായിരുന്നോ? സത്യമെന്താണ് ? മരണാനന്തരം എനിക്ക് എന്ത് സംഭവിക്കുന്നു? മരണശേഷം ഞാൻ ഈ ഭൂമിയിൽ എന്തെങ്കിലും അവശേഷിപ്പിക്കുന്നുണ്ടോ?" 

"അതായത് ഒറ്റവാക്കിൽ വിശദീകരിച്ചാൽ അവനവനെക്കുറിച്ചും, കൂടാതെ ഈ ലോകത്തെക്കുറിച്ചുമുള്ളഅറിവും കൂടിച്ചേരുമ്പോഴാണ്അറിവിൻറെ പൂർണ്ണതയായ ആത്മജ്ഞാനം നേടുന്നതും അതുവഴി ഒരു മനുഷ്യൻ ആത്മീയതയിലേയ്ക്കു പ്രവേശിക്കുന്നതും."

 മതവും, ആത്മീയതയും.

" അപ്പോൾ ഇവിടെ എവിടെയാണ് അല്ലങ്കിൽ എങ്ങിനെയാണ് മതത്തിന് പ്രസക്തി കൈവരുന്നത് ? "

" ഒന്നാമതായി മതം എന്നത് രണ്ട് ഘടകങ്ങൾ കൂടിച്ചേരുന്നതാണ്.

അതിൽ ഒന്നാമതെന്ന് പറയുന്നത്, ഏതുമതത്തിൻറേതായാലും, മതഗുരുവിനുണ്ടായ സത്യദർശനങ്ങളുടെ അനുഭവമാണ്.അതാണ് ആ മതത്തിൻറെ പൊരുളായി പറയപ്പെടുന്നത്.

പിന്നീട് സംഭവിക്കുന്നത് ആ മതഗുരുവിനെ മുൻനിർത്തി ഒരുപറ്റം ആളുകൾ കൂടിച്ചേർന്ന് അതിനെ സംഘടിത രൂപമാക്കി സ്ഥാപനവത്ക്കരിക്കുകയും,

 അത് ഒരുപൗരോഹിത്യത്തിൻ കീഴിലായിരിക്കുകയും, കൃത്യമായ ഉദ്ദേശ ലക്ഷ്യങ്ങളോടെ സംഘടിപ്പിക്കുകയും ചെയ്യും

 ശേഷം സംഭവിക്കുന്നതോ...! സ്ഥാപനമായിക്കഴിഞ്ഞാൽപ്പിന്നെ അതിനാവശ്യമായ ഭൗതിക സാഹചര്യങ്ങൾ ഒരുക്കി,.അതിൽ,കെട്ടിടങ്ങളും, കോളേജുകളും, ആശുപത്രികളുമൊക്കെ നിർമ്മിച്ച് കച്ചവടസ്ഥാപനമാക്കി മാറ്റും.

അങ്ങിനെ സമൂഹത്തിൽ നിലകൊള്ളുന്ന  ഇത്തരം മതസ്ഥാപനങ്ങൾക്ക് എങ്ങിനെയാണ് ഈ ആത്മീയതയുമായി കൈകോർക്കാൻ കഴിയുക?

 കൂടാതെ, ഇന്ന് മതസ്ഥാപനങ്ങളെന്ന് പറയുന്നവയിൽ ഭൂരിപക്ഷവും കച്ചവടകേന്ദ്രങ്ങളായി മാറിത്തീരുകയും ചെയ്തു."

"നോക്കൂ ഇവിടെ ഈ സമൂഹത്തിന് വേണ്ടി ജീവിതം ഉഴിഞ്ഞു വെച്ച ഗുരുദേവൻ പോലും ഉയർത്തിപ്പിടിച്ച ആശയം തന്നെ മതാതീതമായ ആത്മീയതയാണ്.  "

" ഒരു മനുഷ്യ സമൂഹത്തെയാകയും, തന്നെത്തന്നെയും മാറ്റിത്തീർക്കാൻ ഉപയുക്തമായ ജ്ഞാനത്തിൻ്റെയും, ക്ഷമയുടേയും, സ്നേഹത്തിൻ്റെയും, ത്യാഗത്തിൻ്റേയും ഉന്നത മൂല്യങ്ങൾ കൂടിക്കലർന്ന ആ മനോഹരമായ ആത്മീയതകൾക്കകത്ത്  എവിടെയാണ് ഈ നീചസങ്കൽപ്പങ്ങളായ മതത്തിൻ്റെയും ജാതിയുടേയും സ്ഥാനം? "

 "സത്യത്തിൽ ക്ഷേത്ര സങ്കൽപ്പങ്ങളിൽപ്പോലും നമുക്ക് ആത്മീയതയുടെ ഒരംശം പോലും കണ്ടെത്താൻ കഴിയില്ല. കാരണം, അത് നേരത്തെ പറഞ്ഞതുപോലെ പൗരോഹിത്യത്തിൽ അധിഷ്ഠിതവും, തന്ത്രി, പൂജാരി, ജ്യോത്സ്യൻ, ഇവരുടെയെല്ലാം നേതൃത്വത്തിലും ,കൃത്യമായ ശമ്പളവേതനാടിസ്ഥാനത്തിൽ നടക്കുന്ന, ഒരു സ്ഥാപനം മാത്രമാണ്.

"ആത്മീയത എന്നാൽ വളരെ ലളിതമാണ്. അതിന് ഇത്തരം മതങ്ങളുടേയോ, സ്ഥാപനങ്ങളുടേയോ യാതൊരു പിൻതുണയും ആവശ്യമില്ല."

"യഥാർത്ഥത്തിൽ ആത്മീയത എന്നത് ലക്ഷ്യം വെയ്ക്കുന്നത്. ഒരുവൻ ഏകാന്തതയിലിരുന്നുകൊണ്ട് അവനവനെക്കുറിച്ചുതന്നെ ചിന്തിക്കുന്നതും, അവനിൽതന്നെ പൊരുളായിരിക്കുന്ന സത്യത്തെ ദർശിക്കുവാനും ഇടവരുത്തുക എന്നതാണ് .

 കൂടാതെ, അതിന് യോഗ്യമായ ഒരു സാഹചര്യവും സൃഷ്ടിച്ചെടുക്കുക എന്നതുമാണ് ആത്മീയത എന്ന പ്രയോഗം കൊണ്ട് വിവക്ഷിക്കുന്നത്.

അല്ലാതെ അതിന് മറ്റേതെങ്കിലും, ജാതിയോ, മതമോ, വ്യകതിയോ, അങ്ങിനെയെന്തെങ്കിലുമായി യാതൊരു ബന്ധവുമില്ല. അഥവാ അങ്ങിനെയൊരു ബന്ധം സ്ഥാപിച്ചെടുക്കുവാൻ ശ്രമിക്കുന്നതിനെ ആത്മീയതയുമായോ, കറകളഞ്ഞ ഭത്തിയുമായോ ഒന്നും ബന്ധപ്പെടുത്തേണ്ടതുമില്ല. ഒറ്റവാക്കിൽ പറഞ്ഞാൽ നല്ലൊരു മനുഷ്യനായിത്തീരുവാനുള്ള ഒരു മനോഹരമായ കുറുക്കുവഴി കൂടിയാണ് ആത്മീയതയും, ഭക്തിയുമെല്ലാം !