ഇഷ്ടിക പൊടിയുന്ന ഇൻറർലോക്ക് വീടുകൾ !

ഇൻറർലോക്ക് ഇഷ്ടിക വീടുകൾ

ഇൻ്റർലോക്ക് ഇഷ്ടികകൾ പൊടിയുമോ?

 ഇഷ്ടിക വീടുകളെക്കുറിച്ചു പറഞ്ഞാൽ, എത്ര പറഞ്ഞാലും തീരാത്ത സംശയങ്ങളാണ് പലർക്കും.

അതിൽ മുഖ്യമായുള്ളത് ഇഷ്ടികകൾ വെള്ളം നനഞ്ഞാൽ പൊടിഞ്ഞു പോകുമോ എന്നതാണ്.

 ഇൻ്റർലോക്ക് ഇഷ്ടിക തീർച്ചയായും പൊടിയും. ഒരു തർക്കവും
 വേണ്ട.!

 നിർമ്മിച്ചിരിക്കുന്ന ഇഷ്ടിക ഗുണനിലവാരമില്ലാത്തതാണങ്കിൽ മാത്രം !

ഗുണനിലവാരം കുറഞ്ഞ മണ്ണിൽ നിർമ്മിച്ചിരിക്കുന്നവയും, ആവശ്യത്തിനുള്ള അനുപാതത്തിൽ സിമൻറും . വെള്ളവും ചേർത്ത് അതിൻ്റെ നിർമ്മാണം കൃത്യമായതുമല്ലങ്കിൽ തീർച്ചയായും ഇഷ്ടിക പൊടിയുക തന്നെ ചെയ്യും. 

മുകളിൽ കൊടുത്തിരിക്കുന്ന ചിത്രം പൂർണ്ണമായും ഇൻറർലോക് ഇഷ്ടികകൾ ഉപയോഗിച്ച് രണ്ടായിരം സ്ക്വയർ ഫീറ്റിൽ നിർമ്മിച്ചിരിക്കുന്ന ഒരു വീടിൻ്റേതാണ്. ഇഷ്ടികയുടെ ഗുണമേൻമ പരിശോധനക്ക് ശേഷം മാത്രമായിരുന്നു, അതിൻ്റെ നിർമ്മാണം. കേരളത്തിലെ വാസ്തുനിർമ്മാണ രംഗത്തെ പ്രഗത്ഭരായ ഹാബിറ്റാറ്റ് ഗ്രൂപ്പാണ് ഈ ഇരുനില വീട് നിർമ്മിച്ചത്. 

 മേൽത്തരം ഇഷ്ടികകൾ ഉപയോഗിച്ച് നിർമ്മിച്ച വീടുകൾ എല്ലാംതന്നെ. ഏതാണ്ട് ഇരുപത്തിയഞ്ച് വർഷങ്ങൾക്ക് ശേഷവും ഇപ്പോഴും ഏതെങ്കിലും തരത്തിലുള്ള പുനർ നിർമ്മാണമൊന്നും ആവശ്യമില്ലാതെ തന്നെ നിലകൊള്ളുന്നുണ്ട്.

 പലരും,ഇൻറർലോക് ഇഷ്ടികകൾ വിലക്കുറവിലും, ക്വാളിറ്റി കുറഞ്ഞ രീതിയിലും നിർമ്മിക്കുകയും . പിന്നീട് അതുപയോഗിച്ച് നിർമ്മിച്ച ശേഷം, പിൽക്കാലങ്ങളിൽ പിന്നീട് പലർക്കും  അതിനു മുകളിൽ സിമൻ്റ് പ്ലാസ്റ്റർ ചെയ്യേണ്ടതായും വന്നിട്ടുണ്ട്.  

ഇഷ്ടികകളുടെ ക്വാളിറ്റി എങ്ങിനെ പരീക്ഷിക്കാം?

വാങ്ങുന്ന ഇഷ്ടികകൾ നാലോ അഞ്ചോ ദിവസം വെള്ളത്തിലിട്ട്  അതിൻ്റെ ഗുണനിലവാരം ഉറപ്പു വരുത്താം. ( വേണമെങ്കിൽ ഒരാൾ പൊക്കത്തിൽ നിന്നും താഴേക്കിട്ട് കട്ട പൊടിഞ്ഞു പോകുന്നുണ്ടോ എന്നും പരീക്ഷിക്കാവുന്നതാണ് )

രണ്ടാമതായി ഇൻ്റർലോക്ക് ഇഷ്ടികകൾ ഉപയോഗിച്ച് വീടുകൾ നിർമ്മിക്കുമ്പോൾ, മേൽത്തരം ഇഷ്ടികകൾ തിരഞ്ഞെടുക്കുന്നത് കൂടാതെ അത്തരം വീടുകളുടെ നിർമ്മാണം കൃത്യമായി പരിശീലനം സിദ്ധിച്ചവരെക്കൊണ്ടു മാത്രം ചെയ്യിക്കേണ്ടതും  പ്രധാനമാണ്. 

ചുവരുകളുടെ ദീർഘകാല സംരക്ഷണം.

 ചുവരുകളുടെ  ഇഷ്ടിക കെട്ടിയശേഷം അതിൻറെ വിടവുകൾ സുർക്കി, സിമൻറ് എന്നിവ കൂട്ടിക്കുഴച്ച മിശ്രിതം (അതല്ലങ്കിൽ സാധാരണ വാൾ പുട്ടി)ഉപയോഗിച്ച് അടക്കുകയും . നിർബന്ധമായും, എല്ലാ ജോലികളും തീർന്ന ശേഷം വാർണിഷോ , പെയിൻറോ ചെയ്ത് ഭംഗിയാക്കേണ്ടതുമാണ്.  

വാർണീഷാണ് ചെയ്യുന്നതെങ്കിൽ വാട്ടർ ബെയ്സ്ഡ് വാർണീഷുകൾ പലഗുണനിലവാരത്തിലുമുള്ളവയും മാർക്കറ്റിൽ ലഭ്യമാണ്.

 ഇഷ്ടിക പോയൻറിംഗ് ( വിടവുകൾ ഫിൽ ചെയ്യുന്ന ) ജോലികൾ കഴിഞ്ഞാൽ ഉടൻ തന്നെ വാർണിഷ് ചെയ്യുന്നതാണ് ഉത്തമം. കാരണം വാർണീഷിംഗിന് ശേഷം ഇഷ്ടികകൾക്ക് കൂടുതൽ ഉറപ്പ് ലഭിക്കും, ഒരു ലാമിനേഷൻ കോട്ടിംഗ് പോലെ നിൽക്കുന്നതിനാൽ, വെള്ളം, പൂപ്പൽ, പായൽ എന്നിവയൊന്നും പിടിക്കാതെ കൂടുതൽ തിളക്കവും, സംരക്ഷണവും നൽകുകയും, വർഷത്തിലെ പെയിൻറിംഗ് ചിലവുകൾ ഒഴിവാക്കുകയും ചെയ്യാം.

 പെയിൻറിങ് ആണ് ഉദ്ദേശിക്കുന്നതെങ്കിൽ ഉൾവശമുള്ള ഭിത്തികൾക്കെല്ലാം വെളുപ്പ് കൂടുതൽ കലർന്ന നിറങ്ങൾ നൽകിയാൽ മുറികളിൽ കൂടുതൽ വെളിച്ചവും, വലിപ്പവും തോന്നും.

രണ്ടു നില വീടുകൾ നിർമ്മിക്കാനാകുമോ?

 അപൂർവ്വം ചില വീടുകൾ ഒഴിച്ചാൽ മിക്കവാറും വീടുകളുടെ നിർമ്മാണം എല്ലാം  രണ്ടു നില തന്നെയാണ്. അത്തരം  ചില കെട്ടിടങ്ങൾ പില്ലറുകൾ പോലും നൽകാതെയും നിർമ്മിച്ചിരിക്കുന്നതായി കണ്ടിട്ടുണ്ട്.

ഇൻ്റർലോക്ക് വീടുകൾ നിർമ്മിക്കുമ്പോൾ .

ഇതിൽ ഏറ്റവും പ്രധാനപ്പെട്ട കാര്യം, ആ വീട്ടിൽ താമസിക്കുവാൻ ഉദ്ദേശിക്കുന്നവർക്ക് ഇത്തരം നിർമ്മാണത്തിൽ താത്പര്യമുണ്ടോ എന്നതാണ്. ഇല്ലാത്തപക്ഷം ധനലാഭം മാത്രം നോക്കാതെ മറ്റു മാതൃകകൾ പിൻതുടരുന്നതാകും ഉചിതം.

കാരണം പലപ്പോഴും ഇത് സാമ്പ്രദായിക മാതൃകകൾ പിൻതുടരുന്ന ഒരു നിർമ്മാണ രീതിയുടെ ഭാഗമല്ലാതിരിക്കുകയും, കൂടാതെ   നിലനിൽക്കുന്ന വീടു നിർമ്മാണങ്ങളുടെ പൊതുധാരണകൾക്ക് വിപരീതമായതുമാണ്.

 അതിനാൽ ഇത്തരം നിർമ്മാണങ്ങളുടെ  ഗുണദോഷങ്ങൾ മനസ്സിലാക്കിയും, അതിന് ശേഷം താത്പര്യമുണ്ടങ്കിൽ മാത്രം നിർമ്മാണത്തിലേക്ക് പ്രവേശിക്കുന്നതാകും നല്ലത്!

ഇൻറർലോക് ഇഷ്ടികകൾ കൊണ്ടു ഭിത്തി കെട്ടി ഉയർത്തിയ ശേഷം ആവശ്യമെങ്കിൽ ഭിത്തികളിൽ മഡ് പ്ളാസ്റ്ററിങ്ങ് നടത്തുന്നത് വീടിന് കൂടുതൽ ഫിനിഷിംഗും, ഭംഗിയും, കൂടുതൽ വെളിച്ചം മുറിക്കുള്ളിൽ തങ്ങി നിൽക്കുന്നതിനും, നല്ല തണുപ്പ് നിലനിർത്തുവാനും സഹായകരമാണ്.

 അൽപ്പം പ്രായക്കൂടുതൽ ഉള്ളവർ താമസിക്കുന്ന വീടുകളിൽ , ടൈൽ വിരിച്ച പ്രതലത്തിലൂടെ നടക്കുമ്പോൾ കാലുകൾക്ക് ഉണ്ടാകാവുന്ന അസ്വസ്ഥതകൾ ഒഴിവാക്കാനായി കളിമണ്ണ് ഉപയോഗിച്ചുള്ള ടെറാക്കോട്ട ടൈലുകളും പരീക്ഷിക്കാവുന്നതാണ്.

അതുപോലെ തന്നെ വീടിൻ്റെ ഉൾത്തളങ്ങളിൽ ഇൻറീരിയറിൽ ട്രീറ്റ് ചെയ്ത മുളകൾകൊണ്ടുള്ള മനോഹരമായ അലമാരികളും, സ്റ്റെയർ കെയ്സ് കൈവരികളുമെല്ലാം ഇപ്പോൾ പലരും നിർമ്മിക്കുന്നതും മനോഹരവുമായ കാഴ്ചകളാണ്.

പലപ്പോഴും പ്രകൃതിയോടു ചേരുന്ന വീടുകൾ എന്ന ആശയം മുന്നോട്ടു വെയ്ക്കുമ്പോൾ കേരളീയ വാസ്തുവിദ്യയെ

അടിസ്ഥാനപ്പെടുത്തിയുള്ള നാലുകെട്ട് മാതൃകകളാണ് പലരും പിന്തുടരുന്നത്. തീർച്ചയായും, കൂടുതൽ സ്ഥല സൗകര്യമുള്ളയിടങ്ങളിലും... നാലുകെട്ടു മാതൃകാ വീടുകൾ നിർമ്മിക്കാനുദ്ദേശിക്കുന്നവർക്കും, ഇത്തരം ഇൻറർലോക്ക് ഇഷ്ടിക ഉപയോഗിച്ചുള്ള നിർമ്മാണ രീതികൾ പിന്തുടരാവുന്നതാണ്.

വളരെ കുറഞ്ഞ സമയത്തിനുള്ളിലും, സാധാരണ രീതിയിലുള്ള വീടു നിർമ്മാണത്തേക്കാൾ ചിലവുകുറഞ്ഞ രീതിയിലും വീട് നിർമ്മാണം ആഗ്രഹിക്കുന്നവർക്കും ഇത് ഒരു മികച്ച ഓപ്ഷനാണ്.  കാരണം സൺഷൈഡ് വാർക്കയുടെയും, മെയിൻ വാർക്കയുടെയും, കാലതാമസം ഒഴിവാക്കിയാൽ നാലോ, അഞ്ചോ ദിവസം കൊണ്ട് , ഭിത്തിയുടെ നിർമ്മാണം അവസാനിക്കും എന്നതിനാൽ, തീർത്തും ഭവന രഹിതരായവർക്ക് താമസിച്ചുകൊണ്ടുതന്നെ കയ്യിൽ വരുന്ന പണത്തിന് അനുസൃതമായി ബാക്കി ജോലി കൂടി പൂർത്തീകരിക്കാമെന്ന സൗകര്യം കൂടി ഇതിനുണ്ട്.

എന്തൊക്കെയായാലും, ഇഷ്ടികകളുടെ ഗുണനിലവാരവും, വിദഗ്ദ്ധരായ പണിക്കാരും, അതിന് യോജിച്ച രീതിയിലുള്ള ഫിനിഷിംഗ് ജോലികളും പൂർത്തീകരിച്ചാൽ, ഉയർന്നു വരുന്ന ചൂടേറിയ കാലാവസ്ഥയെ പ്രതിരോധിക്കുവാനും, കുറഞ്ഞ ചിലവിലും, കൂടുതൽ പ്രകൃതിയോട് ചേർന്ന് നിൽക്കുന്നതുമായ ഒരു അന്തരീക്ഷത്തിൽ സുഖകരമായി ജീവിക്കാം എന്നത് തന്നെയാണ് ഇതിൻറെ ഏറ്റവും വലിയ പ്രത്യേകത.

 

 

 

 

 

 . 

 

  

.