കൂവരക് (രാഗി ) ചിരട്ട പുട്ട് പ്രമേഹ രോഗം ഉള്ളവർക്കും, ഇല്ലാത്തവർക്കും, കഴിക്കാവുന്നതും, വളരെയേറെ പോഷകസമ്പുഷ്ടവും അതോടൊപ്പം അൽപ്പം പോലും എണ്ണമയവുമില്ലാത്തതുമായ ഒരു മികച്ച ഭക്ഷണമാണ് കൂവരക് ചിരട്ട പുട്ട് . പ്രമേഹ രോഗ ഓർഗാനിക്ക് ചിരട്ട പുട്ട് പലപ്പോഴും വിവിധ തരം ജീവിതശൈലീ രോഗങ്ങളാൽ കഷ്ടപ്പെടുന്നവർ, തങ്ങൾ ഏതുതരം ഭക്ഷണങ്ങൾ കഴിക്കണമെന്ന ആശയക്കുഴപ്പങ്ങളിൽപ്പെടാറുണ്ട്. പ്രത്യേകിച്ചും പ്രമേഹരോഗം ബാധിച്ചവർ. അത്തരക്കാർക്ക് തികച്ചും ധൈര്യമായികഴിക്കാവുന്ന ഒന്നാണ് ഈഓർഗാനിക്ചിരട്ടപുട്ട് . കാൽസ്യവും, ഇരുമ്പും ധാരാളമായി ഇതിൽ അടങ്ങിയിട്ടുള്ളതിനാൽ, ഇത് വിളർച്ച തടയുവാനും, പല്ലുകളുടെ ആരോഗ്യത്തിനും , കുട്ടികൾക്ക് നൽകാവുന്നതുമായ ഒരു നല്ല ഭക്ഷണം കൂടിയാണ്. കുട്ടികൾക്കായി തയ്യാറാക്കുമ്പോൾ അവർക്ക് താത്പര്യമുള്ള പച്ചക്കറികളോ മധുരമോ അങ്ങിനെ എന്തെങ്കിലും ആവശ്യമാണെങ്കിൽ അതുകൂടി ഈ പുട്ടിനൊപ്പം ചേർത്ത് വേവിക്കാവുന്നതുമാണ്. പുട്ട് ഉണ്ടാക്കുന്ന വിധം ഇത്, കൂവരക് ഉപയോഗിച്ചുള്ള ഓർഗാനിക്ക് പുട്ട് ആയതിനാൽ, ആദ്യം മാർക്കറ്റിൽ നിന്നും ധാന്യങ്ങളുടെ രൂപത്തിലുള്ള കൂവരക് ലഭ്യമാണെങ്കിൽ അത് ആവശ്യമുള്ളത്രയും രാവിലെ വെള്ളത...
 |
വാർദ്ധക്യത്തിൽ നിന്ന് തിരിഞ്ഞു നടക്കാം. |
വാർദ്ധക്യമെന്നത് , ജീവിതത്തിൻറെ മറ്റൊരു മനോഹരമായ ഏടാണ്. അതിനെയാണ് ഏറെ മനോഹരമായി ആഘോഷിക്കേണ്ടതും. ഉത്സവമാക്കി തീർക്കേണ്ടതും .!
എന്നാൽ വിധിവൈപരീത്യമെന്നു പറയട്ടെ, ഇന്ന് മിക്കവാറും എല്ലാ മനുഷ്യരും വാർദ്ധക്യത്തെ വളരെ ഭയാശങ്കകളോടെയാണ് വീക്ഷിക്കുന്നതും, സംസാരിക്കുന്നതുമെല്ലാം .
അതിന് മുഖ്യകാരണമായി പറയുന്നത് ബാല്യം, കൗമാരം, യൗവനം, അങ്ങിനെ എല്ലാകടമ്പകളും കഴിഞ്ഞു. ഇനിവാർദ്ധക്യമാണ്. അതായത്, മരണം .
അതല്ലെങ്കിൽ മരണം കാത്തുള്ള യാത്ര.! സത്യത്തിൽ ഇതിൽ എന്തെങ്കിലും കഴമ്പുണ്ടോ ? അതല്ലങ്കിൽ ഒരാളുടെ പ്രായമാണോ മരണത്തിൻറെ അളവുകോൽ?
ഒരിക്കലും അങ്ങിനെയാകാൻ തരമില്ല. ജീവിതത്തിൻറെ ആയുർദൈർഘ്യം ശരാശരി യെല്ലാം , കുറഞ്ഞുവെന്ന് ഒരുപക്ഷേ കണക്കുകളിലെല്ലാം കണ്ടേക്കാം. എങ്കിലും അത്തരം കണക്കുകളാണോ നമ്മുടെ ജീവിതം നിശ്ചയിക്കേണ്ടത്, ..?
ചിന്തിച്ചാൽ മരണത്തിന് അങ്ങിനെയൊരു പ്രത്യേകപ്രായമൊന്നുമില്ല..!
ആരോപറഞ്ഞപോലെ, മരണം എപ്പോൾവേണമെങ്കിലും കടന്നുവരാവുന്ന ക്ഷണിക്കപ്പെടാത്ത ഒരു അതിഥി തന്നെ.!
കഴിഞ്ഞ കാലം തന്നെ എടുത്തുനോക്കൂ, ഒരുപക്ഷേ അതുതന്നെയാകും, അതിന് മികച്ച ഒരു ഉദാഹരണം.
കോവിഡായാലും, മറ്റേതൊരു മഹാമാരിയായാൽപ്പോലും, അതിനുശേഷമാണെങ്കിലും, എത്രയോലക്ഷം മനുഷ്യരാണ് ഈ ഭൂമിയിൽ നിന്നും ഒട്ടും നിനച്ചിരിക്കാതെ കടന്നുപോയത്. അതിൽ തന്നെ ഏറ്റവും കൂടുതൽ കുട്ടികളും, യുവാക്കളും.!
അപ്പോൾ പ്രായത്തിലൊന്നുമല്ല, ...പിന്നെയോ, ആരോഗ്യത്തോടെ ജീവിക്കുക എന്നത് തന്നെയാണ് കാര്യം.!
അപ്പോൾ എന്താണ് ആരോഗ്യം?
ആരോഗ്യമെന്നാൽ നന്നായി ഭക്ഷണം കഴിക്കുന്നതോ, വ്യായാമം ചെയ്യുകയോ, അസുഖങ്ങൾ വരാതിരിക്കലോ മാത്രമാണോ? ഒരിക്കലുമല്ല! .പിന്നെയെന്താണ്...? എല്ലാത്തിലുമുപരി മാനസികാരോഗ്യം സംരക്ഷിക്കുക എന്നതാണ്. !
കാരണം മനസ്സിന് സ്വസ്ഥതയും, സമാധാനവും ഉണ്ടെങ്കിൽ മാത്രമേ നമുക്ക് ഭക്ഷണം പോലും യഥാർത്ഥ രുചിയോടെ കഴിക്കുവാൻ കഴിയൂ. ചുരുക്കിപ്പറഞ്ഞാൽ മനസ്സിനേയും, ശരീരത്തേയും ചേർത്തുനിർത്തുന്ന, ഒരു സന്തുലിതാവസ്ഥ കൈവരിക്കുക എന്നതാണ് ശരിയായ ആരോഗ്യം എന്നതിൽ പ്രധാനം.
മാനസ്സിക ആരോഗ്യം
അപ്പോൾ തീർച്ചയും, ന്യായമായ അടുത്ത ഒരു ചോദ്യം, എങ്ങിനെയാണ് മാനസ്സികാരോഗ്യം സംരക്ഷിക്കുക ...?
അതിന് ഒറ്റവാക്കിലാണ് ഉത്തരമെങ്കിൽ, നിസ്സംശയം പറയാം, നമുക്ക് താത്പര്യമില്ലാത്തതും, അനാവശ്യമെന്ന് തോന്നുന്നതുമായ എല്ലാ കാര്യങ്ങളും ഒഴിവാക്കുക.!
അവിടെ പ്രധാനം, നമ്മളും നമ്മുടെ താത്പര്യങ്ങളും എന്നതുമാത്രമാകണം. മറ്റുള്ളവർക്ക് താത്പര്യമുള്ളവ ഒരു പക്ഷേ നമുക്ക് താത്പര്യമുള്ളതാകാം, അതല്ലങ്കിൽ ഇല്ലാത്തതാകാം. എന്തായാലും നമ്മൾ എന്ത് ഇഷ്ടപ്പെടുന്നു എന്നത് തന്നെയാണ് മുഖ്യം.!
നമ്മൾ നമ്മളായിരിക്കുക
നമ്മുടെ സന്തോഷമെന്നത് ഒരിക്കലും മറ്റൊരാൾ കൊണ്ടുവന്ന് തരുന്നതല്ല. അത് ഉണ്ടാക്കിയെടുക്കേണ്ടബാദ്ധ്യതയും നമ്മളിൽ തന്നെ നിക്ഷിപ്തമാണ്.!ചുരുക്കി പറഞ്ഞാൽ സന്തോഷകരമല്ലാത്ത ഏതവസ്ഥയിൽ നിന്നും മാറി നടക്കുക എന്നതുതന്നെയാണ് പ്രധാനം.
കുറച്ചുകൂടി വിശദമാക്കിയാൽ, ഒരുപക്ഷേ നമുക്ക് തീർത്തും താത്പര്യമില്ലാത്ത ഒരു വ്യക്തിയുമായി കുറച്ചുനേരം സംസാരിക്കേണ്ടി വന്നുവെന്നിരിക്കട്ടെ. ചിലപ്പോൾ ആ ഒരു കാരണം കൊണ്ടുതന്നെ ഒരു ദിവസത്തിൻ്റെ പ്രസന്നത തന്നെ മാഞ്ഞുപോകും. അപ്പോൾ അത്തരം കാര്യങ്ങളിൽ ചെയ്യാവുന്നത് , അത്തരം വ്യക്തികളെന്നല്ല, സാഹചര്യങ്ങൾ, സംഭാഷണങ്ങൾ, കാഴ്ച്ചകൾ ഇതിൽ നിന്നെല്ലാം നാം വളരെയധികം . അകന്നു നടക്കുക എന്നതുതന്നെ.
അതല്ലങ്കിൽ , നമ്മുടെ മാനസികാരോഗ്യ ഘടനക്കായി വ്യക്തമായ ഒരു തിരഞ്ഞെടുപ്പ് തന്നെ, നമുക്ക് എല്ലാ കാര്യങ്ങളിലും ഉണ്ടാകേണ്ടതായുണ്ട്.
സോഷ്യൽ മീഡിയ ഉപയോഗം
ഇക്കാര്യത്തിൽ ,ഇപ്പോൾ സോഷ്യൽ മീഡിയയുടെ ഉപയോഗവും ഒരു പ്രശ്നം തന്നെയാണ്.
കണ്ണിൽ കണ്ടതും വളച്ചൊടിക്കപ്പെട്ടതും, യാഥാർത്ഥ്യവുമായി യാതൊരു ബന്ധവുമില്ലാത്തതും, വ്യക്തി വിദ്വേഷങ്ങളും, കാപട്യങ്ങളും മാത്രം നിറയ്ക്കപ്പെട്ട, തീർത്തും അക്രമണോത്സുകമായ ഒരു വലിയ വിപുലമായ ഒരു ലോകം മാത്രമായി സോഷ്യൽ മീഡിയ തീർന്നിട്ടുണ്ട്. . അതിനാൽ മനസ്സിനെ വളരെ പോസിറ്റീവായി നിലനിർത്തുവാൻ വ്യക്തമായ തിരഞ്ഞെടുപ്പ് വേണ്ടതായ മറ്റൊരു ശക്തമായ ഇടം കൂടിയാണ് സമൂഹമാദ്ധ്യമങ്ങൾ!.
കൂടാതെ അതിൻറെ അമിതോപയോഗം മാനസികാരോഗ്യത്തെ മാത്രമല്ല, കണ്ണിൻ്റേയും, തലച്ചോറിൻ്റേയും, സകല നാഡീവ്യൂഹങ്ങളുടേയും പ്രവർത്തനങ്ങളേയും വളരെ ദോഷകരമായി ബാധിക്കുകയും ചെയ്യും.
പലപ്പോഴും വാർദ്ധക്യത്തിലേക്ക് പ്രവേശിക്കുന്ന പലരും, പലകാര്യങ്ങളുടേയും അപ്ഡേറ്റുകൾക്കും, ഏകാന്തതയിൽ നിന്ന് താത്ക്കാലിക മോചനം നേടുവാനുമൊക്കെയാണ് മൊബൈൽ ഫോണുകൾ, സാമൂഹ്യമാദ്ധ്യമങ്ങളുമൊക്കെ തുടക്കത്തിൽ ഉപയോഗിക്കുന്നത്, പക്ഷേ ഒരിക്കലും അതിൽ കാണുന്നതോ, പറയുന്നതോ, സത്യസന്ധമോ , നിഷ്കളങ്കമോ ,ആകുവാനിടയില്ല എന്ന യാഥാർഥ്യവും കൂടി മനസ്സിലാക്കപ്പെടേ ണ്ടതുണ്ട് .
പല ആശയങ്ങളും ചില പ്രത്യേക ലക്ഷ്യം ഉള്ളിൽ വെച്ചുകൊണ്ടാണ് ഇപ്പോൾ പലപ്പോഴും നിർമ്മിക്കപ്പെടുന്നത്, അത് സമൂഹത്തിൻ്റെ ഉന്നമനത്തേയോ, സന്തോഷത്തേയോ, ഒരിക്കലും പ്രതിനിധാനം ചെയ്യണമെന്നുമില്ല., അതിന് എന്തെങ്കിലും സാമൂഹ്യപ്രതിബദ്ധതയോ , അതല്ലെങ്കിൽ വേറിട്ട ഒരു മാദ്ധ്യമ സംസ്ക്കാരങ്ങളോ ഒന്നും തന്നെ അവകാശപ്പെടുവാനില്ലതാനും.
വായിക്കാൻ ക്ലിക്ക് ചെയ്യൂ. സോഷ്യൽമീഡിയകളിൽ ഒളിപ്പിച്ചിരിക്കുന്ന ഞെട്ടിക്കുന്ന സത്യങ്ങൾ.
സമൂഹമാദ്ധ്യമങ്ങൾ പലതും ലക്ഷ്യം വെയ്ക്കുക്കുന്നത്, ഒന്നുകിൽ അത് നിർമ്മിക്കുന്നവർക്കനുകൂലമായ പ്രചരണ തന്ത്രങ്ങളോ, അതുവഴിയുള്ള സാമ്പത്തിക നേട്ടങ്ങളോ, കൂടാതെ ജനവിഭാഗങ്ങളെ ആകെ തന്നെ തെറ്റിധരിപ്പിക്കുന്ന നിലകളിലേക്കുമെല്ലാം ഇന്ന് അതിൻ്റെ ഉപയോഗം വളരെ താഴ്ന്നിരിക്കുന്നു. മാത്രമല്ല എല്ലാവർക്കും കൃത്യമായ അജണ്ടകളും, അതിനെ പിൻതാങ്ങുന്ന വലിയ ഗ്രൂപ്പുകളുമൊക്കെയായാണ് അതിൻ്റെ വ്യാപനങ്ങളും .
ഏറ്റവുമൊടുവിൽ അത് സൈബർ ഗുണ്ടായിസം, സൈബർ ഗുണ്ടകൾ എന്ന വ്യാഖ്യാനങ്ങളിൽ വരെ വന്നെത്തി നിൽക്കുന്നു.
വാർദ്ധക്യത്തെ യൗവനയുക്തമാക്കാം
കഴിയുന്നതും വീട്ടിടങ്ങളിൽ നിന്നും പുറത്തേക്ക് സഞ്ചരിക്കുവാൻ കഴിയുക എന്നതാണ് മാനസ്സികവും, ശാരീരികവുമായ ഊർജ്ജം നിലനിർത്തുവാൻ പലപ്പോഴും നല്ലമാർഗ്ഗം. അത് ഒരു വ്യായാമമായും, കൂടാതെ മറ്റനേകം മനുഷ്യരുമായുള്ള ഇടപഴുകലും സാദ്ധ്യമാക്കി മനസ്സിനേയും, ശരീരത്തേയും ഉത്തേജിപ്പിക്കുന്നു.
കൂടാതെ ഇപ്പോൾ വളരെ വ്യാപകമായരീതിയിൽ തന്നെ സംഘടിപ്പിക്കപ്പെട്ടിരിക്കുന്ന യു.ത്രീ. എ. പോലുള്ള വയോജന ഗ്രൂപ്പുകൾ, അതിനകത്തുതന്നെയുള്ള വിപുലമായ കലാ സാംസ്കാരിക പ്രവർത്തനങ്ങൾ, കൂടാതെ നാട്ടിൻപുറങ്ങളിലെ ഗ്രന്ഥശാല പ്രവർത്തനങ്ങൾ. ഇങ്ങിനെ ഒരുപാട് സാദ്ധ്യതകളാണ് ഇപ്പോൾ ലോകം മുഴുവൻ തുറന്നുകിടക്കുന്നത്.
എന്തുതന്നെയായാലും നമുക്ക് ഇഷ്ടമുള്ളവയെ കണ്ടെത്തുകയും, അത് തിരഞ്ഞെടുക്കുകയും അതിൽ മുഴുകിച്ചേരുക എന്നതുമൊക്കെതന്നെയാണ് പ്രധാനം.
മനസ്സിനെ ഏതെങ്കിലും ഒരു പ്രത്യേക വിഷയത്തെ മാത്രം ചുറ്റിപ്പറ്റി സ്ഥിരമായി ചിന്തിക്കാൻ പ്രേരിപ്പിക്കാതിരിക്കുന്നതും നല്ലതാണ്.
അതുപോലെതന്നെ കൃഷി പോലുള്ള കാര്യങ്ങളിൽ ഇടപെടുന്നതും തികഞ്ഞ മാനസികാരോഗ്യത്തോടെ മനസ്സിനെ നിലനിർത്താൻ നല്ല ഒരു മാർഗ്ഗമാണ്.
ഒരു വിത്തു നട്ടുകയും, അതിനെ പരിപാലിക്കുകയും, തുടർന്ന് അത് കായ് ഫലം നൽകുന്നവരെയുള്ള ഒരു കാലയളവ്, അതെല്ലാം ശരീരത്തിനും മനസ്സിനുമെല്ലാം വളരെയധികം സന്തോഷം നൽകുന്നവയാണ്.
അതുപോലെ തന്നെ വിഷ രഹിത പച്ചക്കറിയുടെ ഉത്പാദനവും, വിപണനം പോലുള്ളവയിലെല്ലാം ഇടപെടുകയും, അതിനെയെല്ലാം പ്രോത്സാഹിപ്പിക്കുകയും ചെയ്യുക എന്നതെല്ലാം വളരെയേറെ രസകരവും, ആരോഗ്യദായകവുമായ കാര്യങ്ങൾ തന്നെയാണ്.!
മനസ്സിനേയും ശരീരത്തേയും ഏതെങ്കിലും ഒരു പ്രത്യേക കോണിൽ ഒതുക്കി നിർത്തുക എന്നതല്ല. മറിച്ച് മനസ്സിനെ പരിപൂർണ്ണ സ്വാതന്ത്ര്യത്തോടെ തുറന്നു വിടുകയും, പുതിയ കാലത്തേയും, കാഴ്ചകളേയും ഉൾക്കൊള്ളുവാനും അതിൽ ഭാഗഭക്കാവുകയും ചെയ്തു കൊണ്ടാകണം അപ്പൂപ്പൻമാർ മക്കളുടേയും, ചെറുമക്കളുടേയുമെല്ലാം മികച്ച സുഹൃത്തുക്കളായി മാറിത്തീർന്നു കൊണ്ട് വാർദ്ധക്യത്തെ യൗവനയുക്തമാക്കുവാൻ!
അഭിപ്രായങ്ങള്